ನಿತ್ಯ 400 ಮಂದಿಗೆ ಇಫ್ತಾರ್‌ ಆಯೋಜನೆ

ಚಿಕ್ಕಬಳ್ಳಾಪುರ: ಪವಿತ್ರ ರಂಜಾನ್‌ ಮಾಸಚಾರಣೆ ಜಿಲ್ಲಾದ್ಯಂತ ಶುರುವಾದಂತೆ ಇಫ್ತಾರ್‌ ಕೂಟಗಳ ಆಯೋಜನೆ ಕೂಡ ಸಾಗಿದೆ. ಮುಸ್ಲಿಂ ಸಮುದಾಯದ ಪಾಲಿಗೆ ಶ್ರೇಷ್ಠವಾದ ರಂಜಾನ್‌ ಪ್ರಯುಕ್ತ ಜಿಲ್ಲೆಯ ಮಸೀದಿಗಳಲ್ಲಿ ದಿನಕ್ಕೆ ಐದು ಬಾರಿ ವಿಶೇಷ ಪ್ರಾರ್ಥನಾ ಕೂಟಗಳು ನಡೆಯುತ್ತಿದ್ದು, ಉಪವಾಸ ಅಂತ್ಯಗೊಳಿಸುವ ಸಂದರ್ಭದಲ್ಲಿ ಇಫ್ತಾರ್‌ ಕೂಟ ಆಯೋಜಿಸಲಾಗುತ್ತಿದೆ.

ನಿತ್ಯ 400 ಮಂದಿಗೆ ಇಫ್ತಾರ್‌: ಜಿಲ್ಲಾ ಕೇಂದ್ರ ಚಿಕ್ಕಬಳ್ಳಾಪುರದಲ್ಲಿ ದೊಡ್ಡ ಮಸೀದಿಯೆಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ನಗರದ ಜೂನಿಯರ್‌ ಕಾಲೇಜು ಮುಂಭಾಗ ಇರುವ ಮಸೀದ್‌ ಎ ಹುಸೇನಿಯಾದಲ್ಲಿ ರಂಜಾನ್‌ ಮಾಸ ಪ್ರಯುಕ್ತ ನಮಾಜ್‌ ಮಾಡುವ 400 ಕ್ಕೂ ಹೆಚ್ಚು ಮಂದಿಗೆ ನಿತ್ಯ ಇಫ್ತಾರ್‌ ಕೂಟ ಆಯೋಜಿಸುವ ಮೂಲಕ ಗಮನ ಸೆಳೆಯುತ್ತಿದೆ.

ನಗರದ ಇಬ್ರಾಹೀಂ ಕಲೀಲ್, ಮೌಲ, ಸೈಯದ್‌ ಇಮ್ಲಾದ್‌ ಸೇರಿದಂತೆ ಯುವಕರ ಗುಂಪು ರಂಜಾನ್‌ನಲ್ಲಿ ಉಪವಾಸ ಇರುವ ಭಕ್ತರಿಗೆ ಹಾಗೂ ಪ್ರವಾಸಿಗರಿಗೆ ಹಾಗೂ ಹಾಸ್ಟೆಲ್ ವಿದ್ಯಾರ್ಥಿಗಳಿಗೆ ಇಫ್ತಾರ್‌ ಹಾಗೂ ಸೆಹ್ರಿ ವ್ಯವಸ್ಥೆಯನ್ನು ರಂಜಾನ್‌ ಮಾಸಾಂತ್ಯ ಮುಗಿಯುವವರೆಗೂ ಆಯೋಜಿಸಿದೆ.

ರಂಜಾನ್‌ ಹಬ್ಬದ ಸಂದರ್ಭದಲ್ಲಿ ಇಫ್ತಾರ್‌ ಕೂಟ ಆಯೋಜಿಸುವುದು ಸಂಪ್ರದಾಯ. ನಿತ್ಯ ನೂರಾರು ಮಂದಿ ಉಪವಾಸ ಇದ್ದು ನಮಾಜ್‌ ಮಾಡಿದ ಬಳಿಕ ಆಹಾರ ಸೇವನೆ ಮಾಡುತ್ತಾರೆಂದು ಚಿಕ್ಕಬಳ್ಳಾಪುರದ ಮಹಮ್ಮದ್‌ ಜಿಲಾನಿ ಹೇಳಿದರು.