ಇಂದಿನಿಂದ ಅತ್ತೂರು ಸಂತ ಲಾರೆನ್ಸ್‌ ಬಸಿಲಿಕಾ ಮಹೋತ್ಸವ

ಕಾರ್ಕಳ: ಕಾರ್ಲದ ದೇವೆರ್‌, ನಾಡಿನ ಪವಾಡ ಪುರುಷ ಅತ್ತೂರು ಸಂತ ಲಾರೆನ್ಸರ ಬಸಿಲಿಕಾ ಪುಣ್ಯ ಕ್ಷೇತ್ರ ವಾರ್ಷಿಕ ಮಹೋತ್ಸವಕ್ಕೆ ಮತ್ತೆ ಸಿದ್ಧಗೊಂಡಿದೆ. ಅತ್ತೂರು ಜಾತ್ರೆ, ಸಾಂತ್‌ಮಾರಿ ಮುಂತಾದ ಹೆಸರಿನಲ್ಲಿ ಕರೆಯಲ್ಪಡುವ ಅತ್ತೂರು ಜಾತ್ರೆ ಈ ಸಲ “ನೀವು ನನಗೆ ಸಾಕ್ಷಿಗಳಾಗಿರಿ’ ಎನ್ನುವ ಘೋಷ ವಾಕ್ಯದೊಂದಿಗೆ ವಿಜೃಂಭಣೆಯಿಂದ ಜ. 22ರಿಂದ 26ರ ವರೆಗೆ ನಡೆಯಲಿದೆ.

ಬಲಿಪೂಜೆ, ವಿಶೇಷ ದಿವ್ಯ ಪೂಜೆ ಜ. 22ರಂದು ಬೆಳಗ್ಗೆ 7.30ಕ್ಕೆ ದಿವ್ಯ ಬಲಿಪೂಜೆಯೊಂದಿಗೆ ಭಾÅತೃತ್ವದ ರವಿವಾರ ಆಚರಿಸಿ ದಿವ್ಯ ಪರಮ ಪ್ರಸಾದದ ಮೆರವಣಿಗೆಯೊಂದಿಗೆ ಈ ವರ್ಷದ ವಾರ್ಷಿಕ ಮಹೋತ್ಸವ ಪ್ರಾರಂಭಗೊಳ್ಳಲಿದೆ. ಅಂದು ಅಪರಾಹ್ನ 3 ಹಾಗೂ 5 ಗಂಟೆಗೆ ಮಕ್ಕಳಿಗಾಗಿ ವಿಶೇಷ ಬಲಿಪೂಜೆ ಅರ್ಪಿಸಲಾಗುವುದು.

ಜ. 23ರ ಬೆಳಗ್ಗೆ 10 ಗಂಟೆಗೆ ಮಕ್ಕಳಿಗಾಗಿ ವಿಶೇಷ ದಿವ್ಯ ಬಲಿಪೂಜೆ ಹಾಗೂ ಅಪರಾಹ್ನ 3.30ಕ್ಕೆ ಅಸ್ವಸ್ಥರಿಗಾಗಿ ವಿಶೇಷ ಬಲಿಪೂಜೆ ನಡೆಯಲಿದೆ.

ವಾರ್ಷಿಕ ಮಹೋತ್ಸವದ ದಿನಗಳಲ್ಲಿ 31 ದಿವ್ಯ ಬಲಿ ಪೂಜೆಗಳನ್ನು ಕೊಂಕಣಿ ಹಾಗೂ 12 ದಿವ್ಯ ಬಲಿ ಪೂಜೆಗಳನ್ನು ಕನ್ನಡ ಭಾಷೆಗಳಲ್ಲಿ ಅರ್ಪಿಸಲಾಗುವುದು. ವಾರ್ಷಿಕ ಮಹೋತ್ಸವದ ದಿನಗಳಲ್ಲಿ ಬೆಂಗಳೂರಿನ ಮಹಾ ಧರ್ಮಾಧ್ಯಕ್ಷರು, ಬಳ್ಳಾರಿಯ ಧರ್ಮಾಧ್ಯಕ್ಷರು, ಬೆಳ್ತಂಗಡಿಯ ಧರ್ಮಾಧ್ಯಕ್ಷರು, ಮಂಗಳೂರಿನ ಧರ್ಮಾಧ್ಯಕ್ಷರು ಹಾಗೂ ಉಡುಪಿ ಧರ್ಮಾಧ್ಯಕ್ಷರು ಕ್ಷೇತ್ರಕ್ಕೆ ಆಗಮಿಸಿ ಬಲಿಪೂಜೆ ಅರ್ಪಿಸಲಿದ್ದಾರೆ.