ಆ್ಯಶ್ಲಿ ಬಾರ್ಟಿ, ಮ್ಯಾಡಿಸನ್‌ ಕೀಸ್‌ ಕ್ವಾರ್ಟರ್‌ ಫೈನಲ್‌ ಮುಖಾಮುಖೀ

ಪ್ಯಾರಿಸ್‌: ಆಸ್ಟ್ರೇಲಿಯದ 8ನೇ ಶ್ರೇಯಾಂಕದ ಆಟಗಾರ್ತಿ ಆ್ಯಶ್ಲಿ ಬಾರ್ಟಿ ಮತ್ತು ಅಮೆರಿಕದ 14ನೇ ಶ್ರೇಯಾಂಕಿತೆ ಮ್ಯಾಡಿಸನ್‌ ಕೀಸ್‌ ಫ್ರೆಂಚ್‌ ಓಪನ್‌ ಪಂದ್ಯಾವಳಿಯ ಕ್ವಾರ್ಟರ್‌ ಫೈನಲ್‌ನಲ್ಲಿ ಮುಖಾಮುಖೀಯಾಗಲಿದ್ದಾರೆ.

ಆ್ಯಶ್ಲಿ ಬಾರ್ಟಿ ಸೋಮವಾರದ ಪಂದ್ಯದಲ್ಲಿ ಅಮೆರಿಕದ ಸೋಫಿಯಾ ಕೆನಿನ್‌ ಅವರನ್ನು 6-3, 3-8, 6-0 ಅಂತರದಿಂದ ಪರಾಭವಗೊಳಿಸಿದರು. ಕೆನಿನ್‌ ನೆಚ್ಚಿನ ಆಟಗಾರ್ತಿ ಸೆರೆನಾ ವಿಲಿಯಮ್ಸ್‌ಗೆ ಸೋಲುಣಿಸಿ ಸುದ್ದಿಯಾಗಿದ್ದರು.

“ಈ ವಾರ ನಾನು ಈ ಸುಂದರವಾದ ಕೋರ್ಟ್‌ನಲ್ಲಿ ಆಡಿದ್ದು ಇದೇ ಮೊದಲು. ಇಲ್ಲಿ ಇನ್ನಷ್ಟು ಪಂದ್ಯಗಳನ್ನು ಆಡಬೇಕೆಂಬುದು ನನ್ನ ಆಸೆ’ ಎಂಬುದಾಗಿ 23ರ ಹರೆಯದ, ಮಾಜಿ ಕ್ರಿಕೆಟ್‌ ಆಟಗಾರ್ತಿಯೂ ಆಗಿರುವ ಬಾರ್ಟಿ ಹೇಳಿದರು.

ಮ್ಯಾಡಿಸನ್‌ ಕೀಸ್‌ ಜೆಕ್‌ ಆಟಗಾರ್ತಿ ಕ್ಯಾಥರಿನಾ ಸಿನಿಯಕೋವಾಗೆ 6-2, 6-4 ಅಂತರದಿಂದ ಆಘಾತವಿಕ್ಕಿದರು. ಇವರು ನಂ.1 ಆಟಗಾರ್ತಿ ನವೋಮಿ ಒಸಾಕಾ ಓಟಕ್ಕೆ ಬ್ರೇಕ್‌ ಹಾಕಿದ್ದರು. ಕೀಸ್‌ ಕಳೆದ ವರ್ಷ ಇಲ್ಲಿ ಸೆಮಿಫೈನಲ್‌ ತನಕ ಸಾಗಿದ್ದರು.

ಪುರುಷರ
ಕ್ವಾರ್ಟರ್‌ ಫೈನಲ್ಸ್‌
ಮಂಗಳವಾರ ನಡೆಯಲಿರುವ ಪುರುಷರ “ಆಲ್‌ ಸ್ವಿಸ್‌’ ಕ್ಟಾರ್ಟರ್‌ ಫೈನಲ್‌ನಲ್ಲಿ ರೋಜರ್‌ ಫೆಡರರ್‌-ಸ್ಟಾನಿಸ್ಲಾಸ್‌ ವಾವ್ರಿಂಕ ಪರಸ್ಪರ ಎದುರಾಗಲಿದ್ದಾರೆ. ಫೆಡರರ್‌ ಆರ್ಜೆಂಟೀನಾದ ಲಿಯೋನಾರ್ಡೊ ಮೇಯರ್‌ ಅವರನ್ನು 6-2, 6-3, 6-3ರಿಂದ ಮಣಿಸಿದರೆ, ಸ್ಟಾನಿಸ್ಲಾಸ್‌ ವಾವ್ರಿಂಕ ಗ್ರೀಕ್‌ನ ಅಪಾಯಕಾರಿ ಆಟಗಾರ ಸ್ಟೆಫ‌ನಸ್‌ ಸಿಸಿಪಸ್‌ ವಿರುದ್ಧ 5 ಸೆಟ್‌ಗಳ ಕಾದಾಟ ನಡೆಸಿ 7-6 (8-6), 5-7, 6-4, 3-6, 8-6 ಅಂತರದಿಂದ ಗೆದ್ದು ಬಂದರು.ಮಂಗಳವಾರದ ಇನ್ನೊಂದು ಕ್ವಾರ್ಟರ್‌ ಫೈನಲ್‌ ರಫೆಲ್‌ ನಡಾಲ್‌-ಕೀ ನಿಶಿಕೊರಿ ನಡುಬೆ ನಡೆಯಲಿದೆ.