ಭಾರತೀಯ ವಿದ್ಯಾರ್ಥಿಗಳಿಗೆ ನಾಲ್ಕು ವರ್ಷದ ವೀಸಾ?

ಲಂಡನ್‌: ವಿದೇಶಿಯರಿಗೆ ನೀಡಲಾಗುವ “ಅಧ್ಯಯನ ನಂತರದ ವೀಸಾ’ವನ್ನು ನಾಲ್ಕು ವರ್ಷಗಳಿಗೆ ದ್ವಿಗುಣಗೊಳಿಸಬೇಕೆಂದು ನೂತನ ವರದಿಯೊಂದು ಬ್ರಿಟನ್‌ ಸರಕಾರಕ್ಕೆ ಸಲಹೆ ನೀಡಿದೆ. ಇದರಿಂ­ದಾಗಿ 2024ರ ವೇಳೆಗೆ ಭಾರತೀಯ ವಿದ್ಯಾರ್ಥಿಗಳು ಬ್ರಿಟನ್‌ನ ವಿಶ್ವವಿದ್ಯಾಲಯಗಳನ್ನು ಆಯ್ಕೆ ಮಾಡಿಕೊ­ಳ್ಳುವ ಸಾಧ್ಯತೆ ದ್ವಿಗುಣಗೊಳ್ಳುವ ನಿರೀಕ್ಷೆ ಇದೆ ಎಂದು ಆಶಿಸಲಾಗಿದೆ.

ಬ್ರಿಟನ್‌ನ ಮಾಜಿ ಸಚಿವ ಜೋ ಜಾನ್ಸನ್‌ ಈ ಬಗ್ಗೆ ವರದಿ ಸಿದ್ಧ ಪಡಿಸಿದ್ದು, ಕೋವಿಡ್ ಹಿನ್ನೆಲೆಯಲ್ಲಿ ಶೇ.50-75ರಷ್ಟು ವಿದೇಶಿ ವಿದ್ಯಾರ್ಥಿಗಳು ವ್ಯಾಸಂಗ ಮೊಟಕುಗೊಳಿಸುವ ಸಾಧ್ಯತೆ ಇದೆ. ಇದು ದೇಶದ ಉನ್ನತ ಶಿಕ್ಷಣ ವಲಯಕ್ಕೆ ಸವಾಲಾಗಲಿದೆ. ಪದವಿಯ ಕೊನೆಯಲ್ಲಿ ಕೆಲಸ ಮಾಡುವ ಅವಕಾಶ ವಿಸ್ತರಣೆ, ಭಾರತೀಯ ವಿದ್ಯಾರ್ಥಿಗಳನ್ನು ಕಡಿಮೆ-ಅಪಾಯದ ವಿದ್ಯಾರ್ಥಿ ವೀಸಾ ವಿಭಾಗದಲ್ಲಿ ಸೇರಿಸುವುದರಿಂದ, ಭಾರತೀಯ ವಿದ್ಯಾರ್ಥಿ ಗಳನ್ನು ಸೆಳೆಯಲು ಅನುಕೂಲವಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಭಾರತೀಯ ವಿದ್ಯಾರ್ಥಿಗಳು ಬ್ರಿಟನ್‌ನ ವಿವಿಗಳನ್ನು ಹೆಚ್ಚಾಗಿ ಆಯ್ಕೆ ಮಾಡಿಕೊಳ್ಳುತ್ತಿರುವುದು ಕಂಡು ಬರುತ್ತಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.