ಹಳೇ ವೈಷಮ್ಯ: ಒಂದೇ ಕುಟುಂಬದ ನಾಲ್ವರ ಬರ್ಬರ ಹತ್ಯೆ

ಬಂಡಾ, ಉತ್ತರ ಪ್ರದೇಶ : ನಗರ ಹೊರವಲಯದ ಛೋಟೆ ಕಾ ಪುರ್ವಾ ಪ್ರದೇಶದಲ್ಲಿ ಅಪರಿಚಿತ ಹಂತಕರು ಒಂದೇ ಕುಟುಂಬದ ನಾಲ್ವರನ್ನು ಕೊಚ್ಚಿ ಕೊಂದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಹತ್ಯೆಗೀಡಾದ ಮಹಾವೀರ್‌ 46, ಆತನ ಪತ್ನಿ ಚುನ್ನೀ 43, ಇಬ್ಬರು ಬಾಲಕರಾದ ರಾಜ್‌ಕುಮಾರ್‌ ಮತ್ತು ಪವನ್‌ ಕುಮಾರ್‌ ಅವರ ಮೃತ ದೇಹಗಳು ಅವರ ಮನೆಯಲ್ಲೇ ಪತ್ತೆಯಾದವು ಎಂದು ಡಿಐಜಿ ಜ್ಞಾನೇಶ್ವರ್‌ ತಿವಾರಿ ತಿಳಿಸಿದ್ದಾರೆ.

ಈ ಕೊಲೆಗಳು ಮೇಲ್ನೋಟಕ್ಕೆ ಹಳೇ ವೈಷಮ್ಯದ ಕಾರಣಕ್ಕೆ ನಡೆದಿರುವುದಾಗಿ ಕಂಡು ಬರುತ್ತದೆ. ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ ಎದು ತಿವಾರಿ ಹೇಳಿದರು. 

ಮಹಾವೀರ್‌ ಅವರ ಆರು ವರ್ಷದ ಪುತ್ರಿ ಮತ್ತು ಒಬ್ಬ ಮಗ ನೆರೆಮನೆಯಲ್ಲಿ ಮಲಗಿಕೊಂಡಿದ್ದರಿಂದ ಅವರು ಹತ್ಯೆಯಾಗುವುದರಿಂದ ಪಾರಾದರು ಎಂದು ತಿವಾರಿ ಹೇಳಿದರು.

ಮೃತ ದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದವರು ಹೇಳಿದರು.