ಅತ್ಯಾಚಾರಿ ಯೋಗ ಗುರುವಿಗೆ 5 ವರ್ಷ ಜೈಲು

ಬೆಂಗಳೂರು: ಅಪ್ರಾಪ್ತೆ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಯೋಗ ಗುರುವೊಬ್ಬನಿಗೆ ಒಂದನೇ ತ್ವರಿತ ನ್ಯಾಯಲಯ 5 ವರ್ಷ ಜೈಲು ಶಿಕ್ಷೆ ಹಾಗೂ ದಂಡ ವಿಧಿಸಿ ಆದೇಶಿಸಿದೆ.

ಸ್ವಾಮಿ ನಿರಂಜನ್‌(73) ಶಿಕ್ಷೆಗೊಳಗಾದ ಅಪರಾಧಿ. ಈತ ಜಯನಗರದಲ್ಲಿ ನಿಶಾನಾ ಧ್ಯಾನ ಮಂದಿರ ಇಟ್ಟುಕೊಂಡಿದ್ದು, ಸಾರ್ವಜನಿಕರಿಗೆ ಧ್ಯಾನ ಮತ್ತು ಯೋಗಸನಗಳ ತರಬೇತಿ ಕೊಡುತ್ತಿದ್ದ. ಸಂತ್ರಸ್ತೆಯ ತಾಯಿ ಅದೇ ಮಂದಿರದಲ್ಲಿ ಸೇವಾ ಕಾರ್ಯಕರ್ತೆಯಾಗಿದ್ದರು. 2018ರ ಆ.4ರಂದು ಸಂತ್ರಸ್ತೆಯನ್ನು ಶಾಲೆಯಿಂದ ತರೆತಂದು ಆಶ್ರಮದಲ್ಲಿ ಬಿಟ್ಟು ಹೋಗಿದ್ದರು. ಈ ವೇಳೆ ಅಪರಾಧಿ ಮಧ್ಯಾಹ್ನ 1.15ರ ಸುಮಾರಿಗೆ ಆಕೆಯ ತಾಯಿ, ಶಾಲಾ ಪುಸ್ತಕ ತೆಗೆದುಕೊಂಡು ಬರುವಂತೆ ಸೂಚಿಸಿದ್ದಾರೆ. ಆಗ ಸಂತ್ರಸ್ತೆ ಗೆಸ್ಟ್‌ ರೂಂಗೆ ಹೋದಾಗ ಅಪರಾಧಿ, ಕೊಠಡಿಯ ಬಾಗಿಲನ್ನು ಹಾಕಿಕೊಂಡು, ಸಂತ್ರಸ್ತೆಯ ಬಟ್ಟೆ ತೆಗೆದು, ಕೆನ್ನೆ ಹಾಗೂ ಮರ್ಮಾಂಗ ಮುಟ್ಟಿ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ. ಈ ಸಂಬಂಧ ಚಂದ್ರಾಲೇಔಟ್‌ ಠಾಣೆಯಲ್ಲಿ ದೂರು ದಾಖಲಾಗಿತ್ತು.

ಬಳಿಕ ಆಗಿನ ತನಿಖಾಧಿಕಾರಿ ರವಿಕುಮಾರ್‌ ಮತ್ತು ವಿರೇಂದ್ರ ಪ್ರಸಾದ್‌ ಆರೋಪಿಯನ್ನು ಬಂಧಿಸಿ, ಆತನ ಆರೋಪ ಸಾಬೀತು ಪಡಿಸಿ ಸಾಕ್ಷ್ಯಗಳ ಸಮೇತ ಆರೋಪಪಟ್ಟಿ ಕೂಡ ಸಲ್ಲಿಸಿದ್ದರು. ಈ ಕುರಿತು ವಿಚಾರಣೆ ನಡೆಸಿದ ಒಂದನೇ ತ್ವರಿತ ನ್ಯಾಯಾಲ ಯದ ನ್ಯಾಯಾಧೀಶರಾದ ಕೆ.ಎನ್‌. ರೂಪಾ ಪೋಕ್ಸೋ ಕಾಯ್ದೆ ಅಡಿ ಅಪರಾ ಧಿಗೆ ಐದು ವರ್ಷ ಜೈಲು ಶಿಕ್ಷೆ, 10 ಸಾವಿರ ರೂ. ದಂಡ ವಿಧಿಸಿದೆ. ಜತೆಗೆ ಸಂತ್ರಸ್ತೆಗೆ ಪರಿಹಾರವಾಗಿ ಡಿಎಲ್‌ಎಸ್‌ಎಯಿಂದ 50 ಸಾವಿರ ರೂ. ಪರಿಹಾರ ನೀಡುವಂತೆ ಆದೇಶಿಸಿದೆ. ಸರ್ಕಾರಿ ಅಭಿಯೋಜಕರಾಗಿ ಪಿ.ಕೃಷ್ಣವೇಣಿ ವಾದ ಮಂಡಿಸಿದರು.