ಫಸ್ಟ್ ಲವ್: ಲವ್ ಗುರುವಿನ ಮೊದಲ ಪ್ರೇಮ ಪ್ರಕರಣ

ಇದುವರೆಗೂ ಅವರ ಧ್ವನಿ ಮಾತ್ರ ಜನರಿಗೆ ಗೊತ್ತಿತ್ತು. ಈಗ ಕೊನೆಗೆ “ಲವ್‌ ಗುರು’ ರಾಜೇಶ್‌ ಅವರ ಮುಖ ಪರಿಚಯ ಕನ್ನಡಿಗರಿಗಾಗುತ್ತಿದೆ. ಈ ಶುಕ್ರವಾರ (ಆಗಸ್ಟ್‌ 18) ಬಿಡುಗಡೆಯಾಗುತ್ತಿರುವ “ಫ‌ಸ್ಟ್‌ ಲವ್‌’ ಎಂಬ ಚಿತ್ರದ ಮೂಲಕ “ಲವ್‌ ಗುರು’ ರಾಜೇಶ್‌ ಹೀರೋ ಆಗುತ್ತಿದ್ದಾರೆ. ಈ ಚಿತ್ರವನ್ನು ಅಶೋಕ್‌ ಲಮಾಣಿ ಅವರು ನಿರ್ಮಿಸಿದರೆ, ಮಲ್ಲಿಕಾರ್ಜುನ್‌ ಅಲಿಯಾಸ್‌ ಮಲ್ಲಿ ಎನ್ನುವವರು ಚಿತ್ರಕ್ಕೆ ಕಥೆ-ಚಿತ್ರಕಥೆಯನ್ನು ರಚಿಸಿದ್ದಾರೆ. ಇಷ್ಟಕ್ಕೂ ಏನೀ “ಫ‌ಸ್ಟ್‌ ಲವ್‌’ ಎಂಬ ಕುತೂಹಲ ಬರದೇ ಇರದು. ಇದು ಪ್ರತಿಯೊಬ್ಬರ ಜೀವನದ ಮೊದಲ ಪ್ರೇಮ ಎನ್ನುತ್ತಾರೆ ನಿರ್ದೇಶಕ ಮಲ್ಲಿ.

“ಪ್ರತಿಯೊಬ್ಬರ ಜೀವನದಲ್ಲೂ ಒಮ್ಮೆಯಾದರೂ ಪ್ರೇಮಾಂಕುರವಾಗುತ್ತದೆ ಮತ್ತು ಅಂತಹ ಪ್ರೇಮದ ಕಥೆಯೇ ಈ ಚಿತ್ರ’ ಎನ್ನುತ್ತಾರೆ ಅವರು. ಇದೇನು ಅವರ ಪ್ರೇಮಕಥೆಯಾ ಎಂದರೆ, ಅಲ್ಲಲ್ಲ ನಿರ್ಮಾಪಕರ ಮಿತ್ರರದು ಎನ್ನುತ್ತಾರೆ ಅವರು.  ಮಲ್ಲಿ, ನಿರ್ಮಾಪಕ ಅಶೋಕ್‌ ಲಮಾಣಿ ಅವರಿಗೆ ಒಂದು ಕಥೆ ಹೇಳಿ ಒಪ್ಪಿಸುವುದಕ್ಕೆ ಹೋಗಿದ್ದರಂತೆ. ಕಥೆ ಕೇಳಿದ ಅಶೋಕ್‌ ಲಮಾಣಿ, “ಕಥೆಯೇನೋ ಚೆನ್ನಾಗಿದೆ. ಆದರೆ,
ಇದಕ್ಕಿಂತ ಇನ್ನೂ ಒಂದು ಚೆಂದದ ಕಥೆ ಇದೆ’ ಎಂದರಂತೆ. ಯಾವುದದು ಕಥೆ ಎಂದು ನೋಡಿದರೆ, ಅದು ನಿರ್ಮಾಪಕರ ಸ್ನೇಹಿತರ ಜೀವನದಲ್ಲಾದ ಒಂದು ನೈಜ ಘಟಣೆ. ಆ ಘಟನೆಯನ್ನು ಅಶೋಕ್‌ ಲಮಾಣಿ ಒಮ್ಮೆ ಕೇಳಿಸಿದರಂತೆ. ಕಥೆ ಕೇಳಿ ಖುಷಿಯಾದ
ಮಲ್ಲಿ, ತಮ್ಮ ಕಥೆ ಪಕ್ಕಕ್ಕಿಟ್ಟು, ಈ ಕಥೆಗೆ ಚಿತ್ರ ಬರೆದು ನಿರ್ದೇಶನ ಮಾಡಿದ್ದಾರೆ. ಈ ಕಥೆಯಲ್ಲೊಂದು ಅದ್ಭುತವಾದ ಸಂದೇಶವಿದೆಯಂತೆ. ಅದೇ ಈ ಚಿತ್ರದ ಹೈಲೈಟ್‌ ಎನ್ನುತ್ತಾರೆ ಅವರು. ಇನ್ನು ಚಿತ್ರದ ಹಾಡುಗಳು ಮತ್ತು ಲೊಕೇಶನ್‌ ಗಳ ಬಗ್ಗೆಯೂ ಅವರಿಗೆ ಖುಷಿಯಿದೆ.

ಬಿಜಾಪುರ, ಚಿಕ್ಕಮಗಳೂರು, ಬೆಂಗಳೂರು ಮುಂತಾದ ಕಡೆ ಅವರು ಹಾಡುಗಳನ್ನು ಚಿತ್ರೀಕರಣ ಮಾಡಿದ್ದಾರೆ. ಚಿಕ್ಕಮಗಳೂರಿನಲ್ಲಿ ಹಿಮದ ನಡುವೆ ಚಿತ್ರೀಕರಣ ಮಾಡಿದ್ದು ಮರೆಯಲಾರದ ಅನುಭವ ಎನ್ನುತ್ತಾರೆ ಅವರು. ಇನ್ನು “ಲವ್‌ ಗುರು’ ರಾಜೇಶ್‌ ಅವರಿಗೆ ಇದು ಮೊದಲ ಸಿನಿಮಾ. ಇದಕ್ಕೂ ಮುನ್ನ ಅವರಿಗೆ ಅಭಿನಯದ ಗಂಧ-ಗಾಳಿ ಗೊತ್ತಿರಲಿಲ್ಲವಂತೆ.

ಆದರೂ ನಿರ್ದೇಶಕರ ಮೇಲಿನ ನಂಬಿಕೆಗೆ ಕ್ಯಾಮೆರಾ ಮುಂದೆ ಬಂದು ನಿಂತರಂತೆ. “ನಮ್ಮ ನಿರ್ದೇಶಕರು ಯಾವತ್ತೂ ಒಂದು ಮಾತು ಹೇಳುತ್ತಿದ್ದರು. ಪಾತ್ರವನ್ನು ಜೀವಿಸಬೇಕು ಅಂತ. ಹಾಗೆಂದರೆ ಏನು ಅಂತ ನನಗೆ ಅರ್ಥವಾಗೋಕೆ ಒಂದು ಹಂತದ ಚಿತ್ರೀಕರಣ
ಬೇಕಾಯ್ತು. ಸಾಮಾನ್ಯವಾಗಿ ಎಲ್ಲರೂ ಚಿತ್ರೀಕರಣದ ಸಂದರ್ಭವನ್ನು ಪಿಕ್‌ನಿಕ್‌ಗೆ ಹೋಲಿಸುತ್ತಾರೆ.

ಚಿತ್ರೀಕರಣ ಒಳ್ಳಿ ಪಿಕ್‌ನಿಕ್‌ ಇದ್ದ ಹಾಗಿತ್ತು ಎನ್ನುತ್ತಾರೆ. ಆದರೆ, ನನಗೆ ಖಂಡಿತಾ ಹಾಗನಿಸಲಿಲ್ಲ. ಏಕೆಂದರೆ, ಸಮಯ ಕಳೆಯೋಕೆ ಅವಕಾಶವೇ ಇರಲಿಲ್ಲ. ಹೊಸಬನಾದ್ದರಿಂದ ಕಲಿಯೋದು ತುಂಬಾ ಇತ್ತು. ಹಾಗಾಗಿ ಒಂದು ನಿಮಿಷ ವೇಸ್ಟ್‌ ಮಾಡದೆ, ಸತತವಾಗಿ
ಕಲಿತಿದ್ದೀನಿ. ಇನ್ನು ಮೊದಲೇ ಹೇಳಿದಂತೆ ನನಗೆ ನಟನೆ ಗೊತ್ತಿರಲಿಲ್ಲ. ನಿರ್ದೇಶಕರ ಸಹಕಾರವಿಲ್ಲದಿದ್ದರೆ ನಟಿಸೋಕೆ ಸಾಧ್ಯತೆ ಇರಲಿಲ್ಲ’ ಎನ್ನುತ್ತಾರೆ ರಾಜೇಶ್‌.

“ಫ‌ಸ್ಟ್‌ ಲವ್‌’ ಚಿತ್ರದಲ್ಲಿ ರೇಡಿಯೋ ಜಾಕಿ ರಾಜೇಶ್‌, ಕವಿತಾ ಗೌಡ, ಸ್ನೇಹ ನಾಯರ್‌, ವೆಂಕಟ್‌ ಮುಂತಾದವರು ನಟಿಸಿದ್ದಾರೆ. ಚಿತ್ರಕ್ಕೆ ಶ್ರೀಧರ್‌ ವಿ. ಸಂಭ್ರಮ್‌ ಅವರ ಸಂಗೀತ, ಸುರೇಶ್‌ ಬಾಬು ಅವರ ಛಾಯಾಗ್ರಹಣವಿದೆ.