ಎಚ್ಚರ: ರಾಜ್ಯಕ್ಕೂ ಕಾಲಿಟ್ಟಿದೆ ಬ್ಲೂವೇಲ್ , ಕೈ ಕುಯ್ದುಕೊಂಡ ಪೋರಿ!

ಹುಬ್ಬಳ್ಳಿ: ಸಾಮಾಜಿಕ ಜಾಲತಾಣಗಳ ನೆರವಿನಿಂದ ಆಡುವ ಬ್ಲೂವೇಲ್ ಸೂಸೈಡ್ ಚಾಲೆಂಜ್ ಗೇಮ್ ಇದೀಗ ರಾಜ್ಯಕ್ಕೂ ಕಾಲಿಟ್ಟಿದೆ. ಈಗಾಗಲೇ ಜಗತ್ತಿನಾದ್ಯಂತ ಹಲವು ಜೀವಗಳನ್ನು ಬಲಿ ಪಡೆದಿರುವ ಈ ಡೆಡ್ಲಿ ಚಾಲೆಂಜ್ ಗೇಮ್ ರಾಜ್ಯಕ್ಕೂ ಕಾಲಿಟ್ಟಿರುವುದು ಕಳವಳಕಾರಿ.

ಹುಬ್ಬಳ್ಳಿಯಲ್ಲಿ 11 ವರ್ಷದ ಬಾಲಕಿಯೊಬ್ಬಳು ಬ್ಲೂವೇಲ್ ಗೇಮ್ ಆಡುತ್ತಾ ಬೆರಳು ಕುಯ್ದುಕೊಂಡ ಘಟನೆ ರಾಜನಗರದಲ್ಲಿ ನಡೆದಿರುವುದಾಗಿ ಮಾಧ್ಯಮಗಳ ವರದಿ ತಿಳಿಸಿದೆ. ಈಕೆ ಮನೆಯಲ್ಲಿಯೇ ಬೆರಳನ್ನು ಕುಯ್ದುಕೊಂಡು ನೇರ ಶಾಲೆಗೆ ಬಂದಿದ್ದು, ಇದನ್ನು ಸಹಪಾಠಿಗಳು, ಶಿಕ್ಷಕರ ಗಮನಕ್ಕೆ ತಂದಿರುವುದಾಗಿ ವರದಿ ವಿವರಿಸಿದೆ.

ಬಳಿಕ ಶಿಕ್ಷಕರು ವಿದ್ಯಾರ್ಥಿನಿಯನ್ನು ಕರೆದು ವಿಚಾರಿಸಿದಾಗ ಬ್ಲೂವೇಲ್ ಗೇಮ್ ವಿಷಯ ಬಾಯ್ಬಿಟ್ಟಿದ್ದಾಳೆ. ತದನಂತರ ಶಿಕ್ಷಕರು ವಿದ್ಯಾರ್ಥಿನಿಯ ಪೋಷಕರನ್ನು ಕರೆಯಿಸಿ ಪ್ರಾಣಕ್ಕೆ ಕುತ್ತು ತರುವ ಬ್ಲೂವೇಲ್ ಸೂಸೈಡ್ ಚಾಲೆಂಜ್ ಗೇಮ್ ಬಗ್ಗೆ ಮಾಹಿತಿ ನೀಡಿರುವುದಾಗಿ ವರದಿ ತಿಳಿಸಿದೆ. ಅಲ್ಲದೇ ಕೂಡಲೇ ಪೋಷಕರ ಸಭೆ ಕರೆದು ಬ್ಲೂವೇಲ್ ಗೇಮ್ ಕುರಿತು ಜಾಗೃತಿ ಮೂಡಿಸಲು ನಿರ್ಧರಿಸಿದ್ದಾರೆ.