ಕಪ್ಪತಗುಡ್ಡಕ್ಕೆ ಮತ್ತೆ ಬೆಂಕಿ

ಗದಗ: ಮುಂಡರಗಿ ತಾಲೂಕಿನ ಡೋಣಿ ಗ್ರಾಮ ಸಮೀಪದ ಕಪ್ಪತಗುಡ್ಡಕ್ಕೆ ಮಂಗಳವಾರ ಸಂಜೆ ಬೆಂಕಿ ಬಿದ್ದಿದ್ದು, ವಿವಿಧ ರೀತಿಯ ಔಷಧಿ ಸಸ್ಯಗಳು ಹಾಗೂ ಜೀವಜಂತುಗಳು ಬಲಿಯಾಗಿವೆ. ಬೇಸಿಗೆ ಆರಂಭಕ್ಕೂ ಮುನ್ನವೇ ಅಗ್ನಿ ಅವಘಡ ಸಂಭವಿಸಿದೆ.

ಸಂಜೆ 6 ಗಂಟೆ ಸುಮಾರಿಗೆ ಬೆಂಕಿ ಹೊತ್ತಿಕೊಂಡಿದ್ದು, ಸುಮಾರು ಅರ್ಧ ಗಂಟೆ ಹೊತ್ತಿ ಉರಿದಿದೆ. ಈ ವೇಳೆಗೆ ಕೆಲ ಎಕರೆ ಪ್ರದೇಶಗಳಷ್ಟು ಬೆಂಕಿ ಕೆನ್ನಾಲಿಗೆ ವ್ಯಾಪಿಸಿಕೊಂಡಿದ್ದು, ಈ ಭಾಗದಲ್ಲಿನ ಔಷಧಿ ಸಸ್ಯಗಳು ಹಾಗೂ ಜೀವ, ಜಂತುಗಳು ಬೆಂಕಿಗಾಹುತಿಯಾಗಿವೆ. ಆದರೆ, ಈ ಕುರಿತು ಪ್ರತಿಕ್ರಿಯಿಸಿರುವ ಮುಂಡರಗಿ ಆರ್‌ಎಫ್‌ಒ ಮಹಾಂತೇಶ ನ್ಯಾಮತಿ, ಡೋಣಿ ಬಳಿ ಕೇವಲ ಒಂದೆರಡು ಎಕರೆ ಪ್ರದೇಶದಲ್ಲಿ ಬೆಂಕಿ ಹೊತ್ತಿಕೊಂಡಿತ್ತು. ಈ ಬಗ್ಗೆ ಮಾಹಿತಿ ಲಭ್ಯವಾದ 10 ನಿಮಿಷದಲ್ಲಿ ಇಲಾಖೆಯ ಸ್ಕ್ವಾಡ್‌ಗಳು ಸ್ಥಳಕ್ಕೆ ಧಾವಿಸಿ, ಬೆಂಕಿ ನಂದಿಸಿದ್ದಾರೆ.

ಈ ಘಟನೆ ಸಂಭವಿಸಿದ ಪ್ರದೇಶದಲ್ಲಿ ದೋಣಿಯಿಂದ ಮತ್ತೂಂದು ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ಕಾಡ್‌ ರೋಡ್‌ನ‌ಲ್ಲಿ ಗ್ರಾಮಸ್ಥರು ಸಿಗರೇಟ್‌ ಸೇದಿ ಬಿಸಾಡಿದ್ದರಿಂದ ದುರ್ಘ‌ಟನೆ ಸಂಭವಿಸಿರುವ ಬಗ್ಗೆ ಸಂಶಯವಿದೆ. ಅರಣ್ಯದಲ್ಲಿ ಬೆಂಕಿ ಹಚ್ಚದಂತೆ ಸುತ್ತಲಿನ ಗ್ರಾಮಸ್ಥರಿಗೂ ಅರಿವು ಮೂಡಿಸಲಾಗುತ್ತಿದೆ ಎಂದು ತಿಳಿಸಿದರು.