ಹೊಟ್ಟೆ ತುಂಬ ಊಟ ಮಾಡಿ….ರಾಯಲ್ ಎನ್‍ಫೀಲ್ಡ್ ಬುಲೆಟ್ ನಿಮ್ಮದಾಗಿಸಿಕೊಳ್ಳಿ!

ಪುಣೆ : ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಬಗೆಯ ಚಾಲೆಂಜ್‍ಗಳು ಟ್ರೆಂಡ್ ಆಗುತ್ತಿರುತ್ತವೆ. ಫಿಟ್ನೆಸ್ ಚಾಲೆಂಜ್, ಹಳೆಯ ಫೋಟೊ ಚಾಲೆಂಜ್, ಡ್ಯಾನ್ಸ್ ಚಾಲೆಂಜ್, ಪುಸ್ತಕ ಓದುವ ಚಾಲೆಂಜ್ ಹೀಗೆ ನಾನಾ ಬಗೆಯ ವಿನೂತನ ಸವಾಲುಗಳು ಗಮನ ಸೆಳೆಯುತ್ತಿರುತ್ತವೆ. ಇದೀಗ ಇಲ್ಲೊಬ್ಬ ಹೋಟೆಲ್ ಮಾಲೀಕ ಫುಡ್ ಚಾಲೆಂಜ್ ನೀಡುವುದರ ಮೂಲಕ ಗಮನ ಸೆಳೆಯುತ್ತಿದ್ದಾರೆ.

ಹಳೆಯ ಮುಂಬೈ-ಪುಣೆ ಹೆದ್ದಾರಿ ಬಳಿಯ ವಡ್ಗಾಂವ್ ಮಾವಲ್‍ನಲ್ಲಿರುವ ‘ಶಿವರಾಜ್ ಹೋಟೆಲ್’ ಈಗ ಫುಡ್ ಪ್ರಿಯರ ನೆಚ್ಚಿನ ತಾಣವಾಗಿದೆ. ಕಾರಣ ಇಲ್ಲಿ ದೊರೆಯುವ ರುಚಿ ರುಚಿಯಾದ ಆಹಾರ ಹಾಗೂ ವಿನೂತನ ಪ್ರಯೋಗಾತ್ಮಕ ಚಾಲೆಂಜ್‍ಗಳು.

‘ಹೊಟ್ಟೆ ತುಂಬ ಊಟ ಮಾಡಿ ಬಹುಮಾನ ಪಡೆಯಿರಿ’ ಎನ್ನುವ ಪರಿಕಲ್ಪನೆಯಡಿ ಶಿವರಾಜ್ ಹೋಟೆಲ್ ತನ್ನ ಗ್ರಾಹಕರಿಗೆ ನಾನಾ ಬಗೆಯ ಚಾಲೆಂಜ್ ಗಳನ್ನು ನೀಡುತ್ತ ಬಂದಿದೆ. ಸದ್ಯ ಈ ಹೋಟೆಲ್ ಘೋಷಿಸಿರುವ ಸವಾಲು ಎಲ್ಲರ ಚಿತ್ತ ಸೆಳೆದಿದೆ. ಹಾಗಾದರೆ ಈ ಚಾಲೆಂಜ್ ಯಾವುದು ಗೊತ್ತಾ ?

‘ಬುಲೆಟ್ ತಾಲಿ’ ಚಾಲೆಂಜ್

ತಿಂಡಿಪೋತರಿಗೋಸ್ಕರ ಶಿವರಾಜ್ ಹೋಟೆಲ್ ‘ಬುಲೆಟ್ ತಾಲಿ’ ಚಾಲೆಂಜ್ ಘೋಷಿಸಿದೆ. ಈ ಚಾಲೆಂಜ್‍ನಲ್ಲಿ ವಿಜಯ ಸಾಧಿಸಿದವರಿಗೆ ಒಂದು ಹೊಸ ರಾಯಲ್ ಎನ್‍ಫೀಲ್ಡ್ ಬುಲೆಟ್ ಬೈಕ್ ಬಹುಮಾನ ರೂಪದಲ್ಲಿ ನೀಡಲಿದೆ.

ಬುಲ್ಲೇಟ್ ತಾಲಿಯಲ್ಲಿ ಏನೇನು ಇರಲಿದೆ ?

ಹೆಸರಲ್ಲೇ ಸೂಚಿಸುವಂತೆ ಇದು ಬುಲೆಟ್ ತಾಲಿ. ಇದರಲ್ಲಿ ನಾಲ್ಕು ಕೆ.ಜಿ ನಾನ್ ವೆಜ್ ಆಹಾರ ಇರಲಿದೆ. ಪ್ರೌನ್ ಬಿರಿಯಾನಿ, ಫಿಶ್ ಪ್ರೈ, ಚಿಕನ್ ಸುಕ್ಕಾ, ಡ್ರೈ ಮಟನ್, ಮಟನ್ ಮಸಾಲಾ ಸೇರಿದಂತೆ 12 ಬಗೆಯ ಖಾದ್ಯಗಳು ಬುಲೆಟ್ ತಾಲಿ ಒಳಗೊಂಡಿದೆ.

60 ನಿಮಿಷದ ಗಡುವು :

ಬುಲೆಟ್ ತಾಲಿ ಚಾಲೆಂಜ್ ಸ್ವೀಕರಿಸಿದವರು 60 ನಿಮಿಷಗಳಲ್ಲಿ 4ಕೆ.ಜಿಯಷ್ಟಿರುವ ಭೂರಿ ಬೋಜನವನ್ನು ಮುಗಿಸಬೇಕು.

ಬುಲೆಟ್ ತಾಲಿ ದರ ?

ಶಿವರಾಜ್ ಹೋಟೆಲ್‍ನ ಕೆಲವೊಂದು ಚಾಲೆಂಜ್‍ಗಳಿಗೆ ಉಚಿತ ಪ್ರವೇಶ ಇರುತ್ತದೆ. ಆದರೆ, ಬುಲೆಟ್ ತಾಲಿ ಸ್ಪರ್ಧೆಯಲ್ಲಿ ಒಂದು ತಾಲಿಗೆ 2500 ರೂ. ದರ ನಿಗದಿಪಡಿಸಿದೆ.

ಗೆದ್ದವರಿಗೆ ‘ಬುಲೆಟ್’ ಬಹುಮಾನ :

ಇನ್ನು ‘ಬುಲೆಟ್ ತಾಲಿ’ ತಿಂದು ಮುಗಿಸುವವರಿಗೆ ಆಕರ್ಷಕ ಬಹುಮಾನ ಸಿಗಲಿದೆ. 1.60 ಲಕ್ಷ ರೂ. ಮೌಲ್ಯದ ಹೊಸ ಬುಲೆಟ್ ಬೈಕ್ ಬಹುಮಾನ ರೂಪದಲ್ಲಿ ಸಿಗಲಿದೆ.