ಅಂಡರ್‌-17 ವಿಶ್ವಕಪ್‌ ಫ‌ುಟ್‌ಬಾಲ್‌ ಮಾಜಿ ಆಟಗಾರರಿಗೆ ಆಹ್ವಾನ

ಕೋಲ್ಕತಾ: ಭಾರತದ ಆತಿಥ್ಯದಲ್ಲಿ ಮುಂದಿನ ತಿಂಗಳು ನಡೆಯಲಿರುವ ಫಿಫಾ ಅಂಡರ್‌-17 ವಿಶ್ವಕಪ್‌ ಫ‌ುಟ್ಬಾಲ್‌ ಕೂಟದ ಪಂದ್ಯಗಳ ವೇಳೆ ದೇಶದ ಮಾಜಿ ಆಟಗಾರರನ್ನು ಆಹ್ವಾನಿಸಲು ಸ್ಥಳೀಯ ಸಂಘಟನಾ ಸಮಿತಿ (ಎಲ್‌ಒಸಿ) ನಿರ್ಧರಿಸಿದೆ.

ಕೋಲ್ಕತಾದ “ಸಾಲ್ಟ್ಲೇಕ್‌ ಸ್ಟೇಡಿಯಂ’ನಲ್ಲಿ ನಡೆಯುವ ಪಂದ್ಯಗಳೂ ಸೇರಿದಂತೆ ಎಲ್ಲ 6 ತಾಣಗಳಲ್ಲೂ ಮಾಜಿ ಫ‌ುಟ್ಬಾಲಿಗರಿಗೆ ವೀಕ್ಷಣೆಯ ಅವಕಾಶ ನೀಡಲಾಗುವುದು. ಇದಕ್ಕಾಗಿ ಭಾರತೀಯ ಫ‌ುಟ್‌ಬಾಲ್‌ ಅಸೋಸಿಯೇಶನ್‌ನಿಂದ ಆಟಗಾರರ ಯಾದಿಯೊಂದನ್ನು ತರಿಸಿಕೊಂಡಿರುವ ಎಲ್‌ಒಸಿ, ಆಯಾ ರಾಜ್ಯಗಳ ಫ‌ುಟ್‌ಬಾಲ್‌ ಸಂಸ್ಥೆಗಳಿಗೆ ಇದರ ಹೊಣೆ ವಹಿಸಿದೆ.

ಭಾರತದ ಲೆಜೆಂಡ್ರಿ ಫ‌ುಟ್‌ಬಾಲ್‌ ಆಟಗಾರ ಪಿ.ಕೆ. ಬ್ಯಾನರ್ಜಿ ಅವರನ್ನು ಮುಖತಃ ಭೇಟಿಯಾಗಿ ಆಹ್ವಾನ ನೀಡುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಹಾಗೆಯೇ 84ರ ಹರೆಯದ ಹಿರಿಯ ಫ‌ುಟ್‌ಬಾಲ್‌ ಆಟಗಾರ ಪನ್ನಾಲಾಲ್‌ ಚಟರ್ಜಿ ಮತ್ತು ಅವರ ಪತ್ನಿ ಚೈತಾಲಿ ಅವರಿಗೆ ವಿಶೇಷ ಆಹ್ವಾನ ನೀಡಲು ನಿರ್ಧರಿಸಲಾಗಿದೆ.