ಭಾರತ ಗಡಿಯೊಳಗೆ ನುಸುಳಿ ಬಂದ ಪಾಕ್‌ ಮಹಿಳೆ ಯೋಧರ ಗುಂಡಿಗೆ ಬಲಿ

ಜಮ್ಮು : ಜಮ್ಮು ವಿಭಾಗದ ವಿವಿಧ ವಲಯಗಳಲ್ಲಿ, ಅಂತಾರಾಷ್ಟ್ರೀಯ ಗಡಿ ದಾಟಿ ಭಾರತದೊಳಗೆ ನುಸುಳಲು ಯತ್ನಿಸಿದ ಪಾಕ್‌ ಮಹಿಳೆಯೊಬ್ಬಳನ್ನು ಬಿಎಸ್‌ಎಫ್ ಯೋಧರು ಗುಂಡಿಕ್ಕಿ ಸಾಯಿಸಿದ್ದು ಇನ್ನೋರ್ವನನ್ನು ಸೆರೆ ಹಿಡಿದಿರುವುದಾಗಿ ವರದಿಯಾಗಿದೆ.

ಅಖನೂರ್‌ ತೆಹಶೀಲ್‌ ನ ಪರ್‌ಗ್ವಾಲ್‌ ವಲಯದಲ್ಲಿ ಪಾಕ್‌ ಮಹಿಳೆಯೊಬ್ಬಳು ಗುರುವಾರ ನಡು ರಾತ್ರಿ ಗಡಿದಾಟಿ ಒಳ ಬಂದಾಗ ಬಿಎಸ್‌ಎಫ್ ಯೋಧರು ಆಕೆಗೆ ಎಚ್ಚರಿಕೆ ಕೊಟ್ಟು ನಿಲ್ಲುವಂತೆ ಸೂಚಿಸಿದರು.

ಆದರೆ ಅದಕ್ಕೆ ಕಿವಿಗೊಡದೆ ಆಕೆ ಗಡಿ ನುಸುಳಿ ಒಳಬರತೊಡಗಿದಳು. ಒಡನೆಯೇ ಯೋಧರು ಗುಂಡಿಕ್ಕಿ ಆಕೆಯನ್ನು ಸಾಯಿಸಿದರು.  ಬಳಿಕ ಪಾಕ್‌ ರೇಂಜರ್‌ ಜತೆಗೆ ಮಾತುಕತೆ ನಡೆಸಿದ ಯೋಧರು ಆಕೆಯ ಛಾಯಾಚಿತ್ರವನ್ನು ಅವರಿಗೆ ತೋರಿಸಿ ಶವ ಪಡೆದುಕೊಳ್ಳುವಂತೆ ಕೇಳಿಕೊಂಡರು.  ಪಾಕ್‌ ರೇಂಜರ್‌ ಗಳು ಮಹಿಳೆಯ ಶವವನ್ನು ಅನಂತರ ಸ್ವೀಕರಿಸಿದರು.

ಕಠುವಾ ವಲಯದಲ್ಲಿ ಗಡಿ ಬೇಲಿ ದಾಟಿ ಒಳಬಂದ ಆಗಂತುಕನನ್ನು ಬಿಎಸ್‌ಎಫ್ ಯೋಧರು ಸೆರೆ ಹಿಡಿದರು. ಆತನನ್ನು ಈಗ ಪ್ರಶ್ನಿಸಲಾಗುತ್ತಿದೆ ಎಂದು ಬಿಎಸ್‌ಎಫ್ ಮೂಲಗಳು ತಿಳಿಸಿವೆ.