ಜಾವೆಲಿನ್‌ ತಾರೆ ನೀರಜ್‌ ಫೆಡರೇಷನ್‌ ಕಪ್‌ಗೆ ಲಭ್ಯ

ಹೊಸದಿಲ್ಲಿ: ಸುದೀರ್ಘ‌ ವಿಶ್ರಾಂತಿಯ ಬಳಿಕ ಜಾವೆಲಿನ್‌ ತಾರೆ ನೀರಜ್‌ ಚೋಪ್ರಾ ಮುಂದಿನ ಎಪ್ರಿಲ್‌ನಲ್ಲಿ ನಡೆಯಲಿರುವ ಫೆಡರೇಷನ್‌ ಕಪ್‌ ಆ್ಯತ್ಲೆಟಿಕ್ಸ್‌ ಕೂಟಕ್ಕೆ ಮರಳಲಿದ್ದಾರೆ.

ಶಸ್ತ್ರಚಿಕಿತ್ಸೆಯಿಂದ ಸ್ಪರ್ಧಾತ್ಮಕ ಕೂಟಗಳಿಂದ ನೀರಜ್‌ ಚೋಪ್ರಾ ಹೊರಬಿದ್ದಿದ್ದರು. 2018ರಲ್ಲಿ ನೀರಜ್‌ ಚೋಪ್ರಾ ಕೊನೆಯದಾಗಿ ಜಕಾರ್ತಾ ಏಶ್ಯನ್‌ ಗೇಮ್ಸ್‌ನಲ್ಲಿ ಭಾಗವಹಿಸಿದ್ದರು. ಆ ಕೂಟದಲ್ಲಿ 88.06 ಮೀ. ಎಸೆಯುವ ಮೂಲಕ ರಾಷ್ಟ್ರೀಯ ದಾಖಲೆಯೊಂದಿಗೆ ಚಿನ್ನದ ಪದಕ ಗೆದ್ದಿದ್ದರು. ಆನಂತರ ಬೆಂಗಳೂರಿನಲ್ಲಿ ನಡೆದಿದ್ದ ಅಂತರ್‌ ಸರ್ವೀಸಸ್‌ ಆ್ಯತ್ಲೆಟಿಕ್ಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಪಾಲ್ಗೊಂಡಿದ್ದರು. ಇದಾದ ಬಳಿಕ ಗಾಯದ ಕಾರಣದಿಂದ ಪ್ರಮುಖ ಸ್ಪರ್ಧೆಗಳಿಂದ ಹಿಂದೆ ಸರಿಯಬೇಕಾಯಿತು.

ಸದ್ಯ ವಿದೇಶಿ ಕೋಚ್‌ಗಳ ಗರಡಿಯಲ್ಲಿ ನೀರಜ್‌ ತರಬೇತಿ ಪಡೆಯುತ್ತಿದ್ದಾರೆ. ಫೆಡರೇಷನ್‌ ಕಪ್‌ ಆ್ಯತ್ಲೆಟಿಕ್ಸ್‌ ಮುಗಿದ ಕೂಡಲೇ ನೀರಜ್‌ ಅಂತಾರಾಷ್ಟ್ರೀಯ ಮಟ್ಟದ ತರಬೇತಿ ಪಡೆಯಲು ಯುರೋಪ್‌ಗೆ ತೆರಳಲಿದ್ದಾರೆ.