ಹೆರಕಲ್ ಯೋಜನೆಯಿಂದ ರೈತರಿಗೆ ಅನುಕೂಲ

ಬಾಗಲಕೋಟೆ: ಹೆರಕಲ್ ಏತ ನೀರಾವರಿ ಯೋಜನೆಯ ದಕ್ಷಿಣ ವಿಸ್ತರಣೆ ಭಾಗದ ನೀರಾವರಿ ಯೋಜನೆಯನ್ನು 18 ತಿಂಗಳಲ್ಲಿ ಗುಣಮಟ್ಟದ ಕಾಮಗಾರಿಯೊಂದಿಗೆ ಪೂರ್ಣಗೊಳಿಸುವಂತೆ ಉಪ ಮುಖ್ಯಮಂತ್ರಿ ಗೋವಿಂದ ಕಾರಜೋಳ ಹೇಳಿದರು.

ಕೃಷ್ಣಾ ಭಾಗ್ಯ ಜಲ ನಿಮಗದ ವತಿಯಿಂದ ಬೀಳಗಿ ಮತಕ್ಷೇತ್ರದ ಬಾದಾಮಿ ತಾಲೂಕಿನ ಕೈನಕಟ್ಟಿ ಗ್ರಾಮದಲ್ಲಿ 238 ಕೋಟಿ ರೂ ವೆಚ್ಚದ ನೀರಾವರಿ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು. ಹೆರಕಲ್ ಬಳಿ ಇರುವ ಚಿಕ್ಕ ಆಣೆಕಟ್ಟಿನಿಂದ ನೀರನ್ನು ಬಳಸಿಕೊಂಡು 15 ಸಾವಿರ ಎಕರೆ ಭೂಮಿ ನೀರಾವರಿ ಹಾಗೂ 7 ಕೆರೆ ತುಂಬಿಸುವ ಯೋಜನೆ ಇದಾಗಿದೆ ಎಂದರು. ರಾಜ್ಯದಲ್ಲಿ 2012-13ನೇ ಸಾಲಿನಲ್ಲಿ 600 ಕೋಟಿ ರೂ.ಗಳ ವೆಚ್ಚದಲ್ಲಿ 52 ಸಾವಿರ ಎಕರೆ ನೀರಾವರಿ ಕ್ಷೇತ್ರವನ್ನಾಗಿಸಬೇಕೆಂಬ ಗುರಿ ಹೊಂದಲಾಗಿತ್ತು. ಕಾರಣಾಂತರಗಳಿಂದ ಆ ಕಾರ್ಯ ಇಂದು ಕೈಗೂಡಿದೆ ಎಂದರು.

ಜನರಿಗೆ ಉಪಯುಕ್ತ ಯೋಜನೆ ಅನುಷ್ಠಾನಗೊಳಿಸುವಲ್ಲಿ ಕೇಂದ್ರ ಸರಕಾರ ಅನೇಕ ಯೋಜನೆ ಹಾಕಿಕೊಂಡಿದ್ದು, ಮಾಜಿ ಪ್ರಧಾನಿ ದಿ.ಅಟಲ್ಬಿಹಾರಿ ವಾಜಪೇಯಿ ಅವರ ಆಡಳಿತದಲ್ಲಿ 5.30 ಲಕ್ಷ ಕೋಟಿ ಯೋಜನೆಗಳನ್ನು ಕೇಂದ್ರ ಸರಕಾರ ಅನುಷ್ಠಾನಗೊಳಿಸಲಾಗಿದೆ. ಈ ನಿಟ್ಟಿನಲ್ಲಿ ವಿದ್ಯುತ್‌, ನೀರಾವರಿ ಹಾಗೂ ವ್ಯಥ‌ರ್ವಾದ ನೀರು ಹರಿಯುವುದನ್ನು ತಡೆದು ರೈತರ ಜಮೀನುಗಳಿಗೆ ನೀರಾವರಿ ಕಲ್ಪಿಸುವ ಉದ್ದೇಶವಾಗಿದೆ ಎಂದು ಹೇಳಿದರು.

ಕೃಷ್ಣಾ ನ್ಯಾಯಾಧೀಕರಣದ ಅಂತಿಮ ತೀರ್ಪಿನಂತೆ ಆಲಮಟ್ಟಿ ಆಣೆಕಟ್ಟಿನ 173 ಟಿ.ಎಂ.ಸಿ ನೀರು ಬಳಕೆಗೆ ರಾಜ್ಯ ಸರ್ಕಾರ ಬದ್ಧವಾಗಿದೆ. ಆಲಮಟ್ಟಿ ಜಲಾಶಯ ವನ್ನು 524.256 ಮೀಟರ್‌ ಎತ್ತರಿಸಿದಾಗ ಈ ನೀರು ಬಳಕೆಗೆ ನಮಗೆ ದೊರೆಯಲಿದ್ದು, ಈ ಕಾರ್ಯಕ್ಕೆ ಮುಖ್ಯ ಮಂತ್ರಿಗಳಿಗೆ ವಿಶೇಷ ಮನವಿ ಮಾಡಲಾಗಿದೆ ಎಂದರು.

ಅಧ್ಯಕ್ಷತೆ ವಹಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದ ಬೀಳಗಿ ಶಾಸಕ ಮುರಗೇಶ ನಿರಾಣಿ, ಜಿಲ್ಲೆಯ ನೀರಾವರಿ ವಂಚಿತ ತಾಲೂಕಾದ ಬಾದಾಮಿಗೆ 10 ಸಾವಿರ ಎಕರೆ ನೀರಾವರಿ ಮೊದಲನೇ ಹಂತದಲ್ಲಿ ಹಾಗೂ 2ನೇ ಹಂತದಲ್ಲಿ 15 ಸಾವಿರ ಎಕರೆ ಭೂಮಿಗೆ ನೀರಾವರಿ ಕಲ್ಪಿಸುವುದರ ಜೊತೆಗೆ ಈ ಭಾಗದ ಕೆರೆಗಳನ್ನು ತುಂಬಿಸುವ ಯೋಜನೆ ಇದಾಗಿದ್ದು, ವ್ಯವಸ್ಥಿತವಾಗಿ ನೀರಾವರಿಗೆ ಯೋಜನೆ ರೂಪಿಸಲು ನೀರಾವರಿ ತಜ್ಞರಾದ ಸಂದೀಪ ನಾಡಗೀರ ನೇತೃತ್ವದಲ್ಲಿ ಕಾರ್ಯ ಕೈಗೊಳ್ಳಲಾಗುತ್ತಿದೆ ಎಂದರು.

ಈ ಯೋಜನೆಯಲ್ಲಿ ಬೀಳಗಿ ಮತಕ್ಷೇತ್ರದ ಗಲಗಲಿ, ಹಲಗಲಿ, ಸುನಗ ಸೇರಿದಂತೆ 16 ಕೆರೆಗಳು ಇನ್ನೊಂದು ಭಾಗವಾಗಿ ತೆಗ್ಗಿ, ಸಿದ್ದಾಪುರ ಗ್ರಾಮಗಳಿಗೆ ನೀರಾವರಿ ಕಲ್ಪಿಸುವ ಮತ್ತು ಬಾದಾಮಿ ತಾಲೂಕಿನ ಸಿಪರಮಟ್ಟಿ, ನರೇನೂರ, ಬೆಳ್ಳಿಕಿಂಡಿ ಗ್ರಾಮಗಳಿಗೆ ಕುಡಿಯುವ ನೀರಿಗಾಗಿ ಬಳಸಿಕೊಳ್ಳಲಾಗುತ್ತಿದೆ. ಬಹುಗ್ರಾಮ ನೀರಾವರಿಗಾಗಿ ಸಿಪರಮಟ್ಟಿ, ಹನಮನೇರಿ, ನರೇನೂರ ತಾಂಡಾ, ನೀರಲಕೇರಿ ರಡ್ಡೇರ ತಿಮ್ಮಾಪುರ, ನಂದಿಹಾಳ ಹಾಗೂ ಜಂಗ್ವಾಡ ಗ್ರಾಮಗಳಿಗೆ ನೀರಾವರಿ ಕಲ್ಪಿಸಲಾಗುವುದೆಂದರು.

ತಜ್ಞರಾದ ಸಂದೀಪ ನಾಡಗೀರ ಮಾತನಾಡಿದರು. ಸಂಸದ ಪಿ.ಸಿ.ಗದ್ದಿಗೌಡರ, ಮಾಜಿ ಶಾಸಕ ಪಿ.ಎಚ್.ಪೂಜಾರ ಮಾತನಾಡಿದರು. ಕಾರ್ಯಕ್ರಮದ ಸಾನ್ನಿಧ್ಯವನ್ನು ನಿಂಗಪ್ಪಜ್ಜ ವಹಿಸಿದ್ದು, ವಿಧಾನಪರಿಷತ್‌ ಮಾಜಿ ಸದಸ್ಯ ಸದಸ್ಯ ನಾರಾಯಣಸಾ ಭಾಂಡಗೆ, ಜಿಪಂ ಸದಸ್ಯರಾದ ಭೀಮನಗೌಡ ಪಾಟೀಲ, ಹೂವಪ್ಪ ರಾಠೊಡ, ಕೃಷ್ಣಾ ಓಗೇನ್ನವರ, ಪಿಎಲ್ಡಿ ಬ್ಯಾಂಕಿನ ಅಧ್ಯಕ್ಷ ಮಹಾಂತೇಶ ಮಮದಾಪುರ ಉಪಸ್ಥಿತರಿದ್ದರು.