ಫ್ಯಾನ್‌ ಫಾಲೋವಿಂಗ್‌ ಒಳ್ಳೇದಲ್ಲ…

ಬಿಸಿಲಾದರೇನು, ಮಳೆಯಾದರೇನು… ಕೆಲವರಿಗಂತೂ ಫ್ಯಾನ್‌ ಬೇಕೇ ಬೇಕು. ಮೈ ಕೊರೆಯುವ ಚಳಿ ಇದ್ದರೂ, ಫ್ಯಾನು ತಿರುಗದಿದ್ದರೆ, ಅದರ ಶಬ್ದ ಕಿವಿಗೆ ಬೀಳದಿದ್ದರೆ ನಿದ್ದೆ ಬರುವುದಿಲ್ಲ ಅನ್ನುವವರಿದ್ದಾರೆ. ಆದರೆ, ಹೀಗೆ ಹಗಲೂ-ರಾತ್ರಿ ಫ್ಯಾನ್‌ನ ಗಾಳಿ ಸೇವಿಸುವುದು ಒಳ್ಳೆಯದಲ್ಲ ಅನ್ನುತ್ತವೆ ಸಂಶೋಧನೆಗಳು. ತಣ್ಣನೆಯ ಗಾಳಿ ಎಷ್ಟು ಆಹ್ಲಾದಕರವೋ, ಅಷ್ಟೇ ಅಪಾಯಕಾರಿಯೂ ಹೌದಂತೆ. ಹಾಗಾದ್ರೆ, ಫ್ಯಾನ್‌ ಬಳಕೆಗೆ ಮುನ್ನ ತಿಳಿದುಕೊಳ್ಳಬೇಕಾದ ಮಾಹಿತಿ ಇಲ್ಲಿದೆ.

-ಫ್ಯಾನ್‌ನ ಕಾರಣದಿಂದ, ಕೋಣೆಯಲ್ಲಿ ಗಾಳಿ ಸದಾ ಚಲನೆಯಲ್ಲಿರುತ್ತದೆ. ಆಗ, ಗಾಳಿಯಲ್ಲಿನ ಧೂಳು, ಮೂಗಿನೊಳಗೆ ಸೇರುವ ಸಂಭವ ಹೆಚ್ಚಿದ್ದು, ಶ್ವಾಸಕೋಶದ ಅಲರ್ಜಿಯುಂಟಾಗುವ ಅಪಾಯವೂ ಹೆಚ್ಚಿರುತ್ತದೆ.

– ತಜ್ಞರು ಹೇಳುವ ಪ್ರಕಾರ, ಅಸ್ತಮಾ, ಶೀತ-ಜ್ವರ, ಧೂಳಿನ ಅಲರ್ಜಿ ಉಳ್ಳವರಿಗೆ ಫ್ಯಾನ್‌ನ ಕೃತಕ ಗಾಳಿ ಒಳ್ಳೆಯದಲ್ಲ.

– ಫ್ಯಾನ್‌ ಗಾಳಿಯಿಂದ ಏಳುವ ಧೂಳಿನ ಕಣಗಳು ಚರ್ಮಕ್ಕೆ ಹಾನಿಯನ್ನುಂಟು ಮಾಡುತ್ತವೆ. ಕೃತಕ ಗಾಳಿಯಿಂದ ಶುಷ್ಕ ಚರ್ಮ ಮತ್ತಷ್ಟು ಶುಷ್ಕವಾಗಬಹುದು.

– ಅರೆಗಣ್ಣು ತೆರೆದು ಮಲಗುವ ಅಭ್ಯಾಸವಿದ್ದವರ ಕಣ್ಣಿನ ದ್ರವವನ್ನು ಫ್ಯಾನ್‌ ಗಾಳಿಯು ಸಂಪೂರ್ಣವಾಗಿ ಒಣಗಿಸುತ್ತದೆ. ಇದರಿಂದ ಕಣ್ಣಿನ ಅಲರ್ಜಿಯೂ ಉಂಟಾಗಬಹುದು.

-ಬಾಯಿಯನ್ನು ಸಂಪೂರ್ಣ ಮುಚ್ಚದೇ ಮಲಗಿದರೆ, ಗಾಳಿಯಲ್ಲಿ ತೇಲಿ ಬರುವ ಕ್ರಿಮಿ ಕೀಟಗಳು ಬಾಯಿಯ ಮೂಲಕ ದೇಹ ಸೇರುವ ಸಾಧ್ಯತೆ ಹೆಚ್ಚಿರುತ್ತದೆ.

-ಶೀತ ದೇಹದವರಿಗೆ ಕೃತಕ ಗಾಳಿ ಒಗ್ಗುವುದೇ ಇಲ್ಲ. ಯಾಕೆಂದರೆ, ಗಾಳಿಯಿಂದ ಮೂಗು ಕಟ್ಟಿ, ಉಸಿರಾಟಕ್ಕೆ ತೊಂದರೆ ಆಗುತ್ತದೆ. -ಕೃತಕ ಗಾಳಿಯಿಂದಾಗಿ ಮೂಗಿನ ಮೇಲ್ಭಾಗವು ಒಣಗಿ, ಕಫ‌ದ ರೀತಿ ಲೋಳೆ ಉತ್ಪಾದನೆಯಾಗಿ ಉಸಿರಾಟಕ್ಕೆ ಅಡಚಣೆಯಾಗಬಹುದು.

-ದೇಹದಲ್ಲಿ ಸ್ವಲ್ಪ ಸುಸ್ತು, ಸ್ನಾಯು ಸೆಳೆತ ಕಾಣಿಸಿಕೊಂಡರೂ ಮೊದಲು ನೆನಪಾಗುವುದು ಮೇಜಿನ ಮೇಲಿನ ಪುಟ್ಟ ಟೇಬಲ್‌ ಫ್ಯಾನ್‌. ಅದನ್ನು ಆನ್‌ ಮಾಡಿದಾಗ ತಕ್ಷಣದಲ್ಲಿ ಹಾಯ್‌ ಎನಿಸಿದರೂ, ಅತಿ ಹತ್ತಿರದಿಂದ ಕೃತಕ ಗಾಳಿ ಸೇವಿಸುವುದರಿಂದ ಭವಿಷ್ಯದಲ್ಲಿ ಶಾಶ್ವತ ಸ್ನಾಯು ಸೆಳೆತ ಉಂಟಾಗಬಹುದು ಅನ್ನುತ್ತವೆ ಸಂಶೋಧನೆಗಳು.

-ಪುಷ್ಪಾ