ಫೇಸ್‌ಬುಕ್‌,ವಾಟ್ಸಾಪ್‌ಗೆ ಶೀಘ್ರದಲ್ಲಿ ಕಡಿವಾಣ :ಸುಪ್ರೀಂಗೆ ಕೇಂದ್ರ

ಹೊಸದಿಲ್ಲಿ : ಅಸ್ತಿತ್ವದಲ್ಲಿರುವ ಎಲ್ಲಾ ಸಾಮಾಜಿಕ ತಾಣಗಳ ಮೇಲೆ ನಿಯಂತ್ರಕ ಆಳ್ವಿಕೆಯ ಕ್ರಮ ರೂಪಿಸುವುದಾಗಿ ಬುಧವಾರ ಸುಪ್ರೀಂ ಕೋರ್ಟ್ ಗೆ ದೂರ ಸಂಪರ್ಕ ಸಚಿವಾಲಯ ಮಾಹಿತಿ ನೀಡಿದೆ. 

 ಕರ್ಮಣ್ಯ ಸಿಂಗ್‌ ಎನ್ನುವವರು ಸಾಮಾಜಿಕ ತಾಣಗಳ  ಗೌಪ್ಯತಾ ನೀತಿಯನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದರು. ಎಲ್ಲಾ ಸಾಮಾಜಿಕ ತಾಣಗಳ ಧ್ವನಿ ಮತ್ತು ಸಂದೇಶ  ಸೇವೆಗಳು ಮಾಹಿತಿ ತಂತ್ರಜ್ಞಾನ ಕಾಯ್ದೆ 2000 ನಿಬಂಧನೆಗಳ ಸೂತ್ರಗಳಿಗೆ ಬದ್ಧವಾಗಿಲ್ಲ ಎಂದಿದ್ದರು. 

ಅರ್ಜಿ ವಿಚಾರಣೆಗೆತ್ತಿಕೊಂಡ ಸುಪ್ರೀಂ ಕೋರ್ಟ್‌ ಈ ಬಗ್ಗೆ ದೂರ ಸಂಪರ್ಕ ಸಚಿವಾಲಯಕ್ಕೆ ಪ್ರತಿಕ್ರಿಯೆ ನೀಡಲು ಸೂಚಿಸಿತ್ತು. ಸರ್ಕಾರ ಇದೀಗ ಓವರ್‌ ದಿ ಟಾಪ್‌ ಸೇವೆಗಳಿಗೆ ನಿಯಮಾವಳಿಗಳನ್ನು ರೂಪಿಸುವುದಾಗಿ ಕೋರ್ಟ್ ಗೆ ಹೇಳಿದೆ.