ಹೌರಾ ಸ್ಟೇಶನ್‌: ಹಳಿ ತಪ್ಪಿದ ಎಕ್ಸ್‌ಪ್ರೆಸ್‌ ರೈಲಿನ ಇಂಜಿನ್‌, ಕೋಚ್‌

ಕೋಲ್ಕತ : ಹೌರಾ – ತಿತಾಗಢ ಇಸ್ಪಾತ್‌ ಎಕ್ಸ್‌ಪ್ರೆಸ್‌ ರೈಲಿನ (12871) ಖಾಲಿ ರೇಕ್‌ನ ಇಂಜಿನ್‌ ಮತ್ತು ಒಂದು ಬೋಗಿ ಇಂದು ಬೆಳಗ್ಗೆ ರೈಲು ಹೌರಾ ಸ್ಟೇಶನ್‌ ಪ್ರವೇಶಿಸುತ್ತಿದ್ದಂತೆಯೇ ಹಳಿ ತಪ್ಪಿದ ದುರಂತ ಸಂಭವಿಸಿದೆ. ಪರಿಣಾಮವಾಗಿ ಆಗ್ನೇಯ ರೈಲ್ವೆಯ ಹಲವಾರು ರೈಲುಗಳ ಸೇವೆ ತೀವ್ರವಾಗಿ ಬಾಧಿತವಾಗಿದೆ.

ಖಾಲಿ ರೈಲು ತನ್ನ ಕಾರ್‌ ಶೆಡ್‌ನಿಂದ ಹೊರಟು ತಿತಾಗಢ ಪ್ರಯಾಣಕ್ಕೆ ಅಣಿಯಾಗುತ್ತಿದ್ದ ವೇಳೆ ಹಳಿ ತಪ್ಪಿತು. ರೈಲು ಖಾಲಿ ಇದ್ದುದರಿಂದ ಯಾರೂ ಗಾಯಗೊಳ್ಳುವ ಪ್ರಮೇಯ ಬರಲಿಲ್ಲ ಎಂದು ಎಸ್‌ಇಆರ್‌ ವಕ್ತಾರ ಹೇಳಿದ್ದಾರೆ.

ಬೆಳಗ್ಗೆ 6 ಗಂಟೆಯ ಸುಮಾರಿಗೆ ಸಂಭವಿಸಿದ ಹಳಿ ತಪ್ಪಿದ ದುರಂತದಿಂದಾಗಿ ಹೌರಾ ಸ್ಟೇಶನ್‌ನ ಹೊಸ ಸಂಕೀಣದ ಮೂರು ಪ್ಲಾಟ್‌ಫಾರಂ ಗಳು ಬ್ಲಾಕ್‌ ಆದವು. ಪರಿಣಾಮವಾಗಿ ಕೆಲವೊಂದು ರೈಲುಗಳ ವೇಳಾ ಪಟ್ಟಿಯನ್ನು ಪರಿಷ್ಕರಿಸಲಾಯಿತು ಅಥವಾ ತತ್ಕಾಲಕ್ಕೆ ರದ್ದುಪಡಿಸಲಾಯಿತು. ಮೂರು ಜೋಡಿ ಇಎಂಯು ಲೋಕಲ್‌ಗ‌ಳನ್ನು ರದ್ದು ಪಡಿಸಲಾಯಿತು ಎಂದು ಮೂಲಗಳು ಹೇಳಿವೆ.