ಯೂರೋ ಕಪ್‌ ಫ‌ುಟ್‌ಬಾಲ್‌-2020 : ಒಂದೇ ಗುಂಪಿನಲ್ಲಿ ಫ್ರಾನ್ಸ್‌, ಪೋರ್ಚುಗಲ್‌, ಜರ್ಮನಿ

ಬುಕಾರೆಸ್ಟ್‌ (ರೊಮೇನಿಯಾ): ಮುಂದಿನ ವರ್ಷದ ಯೂರೊ ಕಪ್‌ ಫ‌ುಟ್‌ಬಾಲ್‌ ಪಂದ್ಯಾವಳಿಯ ಗ್ರೂಪ್‌ಗ್ಳನ್ನು ರಚಿಸಲಾಗಿದೆ. ಹಾಲಿ ಚಾಂಪಿಯನ್‌ ಪೋರ್ಚುಗಲ್‌, ವಿಶ್ವ ಚಾಂಪಿಯನ್‌ ಫ್ರಾನ್ಸ್‌ ಮತ್ತು ಬಲಿಷ್ಠ ಜರ್ಮನಿ ತಂಡಗಳು ಒಂದೇ ಗುಂಪಿನಲ್ಲಿ ಸ್ಥಾನ ಪಡೆದಿವೆ. ಇವೆಲ್ಲವೂ “ಎಫ್’ ವಿಭಾಗದಲ್ಲಿವೆ.

ಒಟ್ಟು 24 ತಂಡಗಳು ಈ ಕೂಟ ದಲ್ಲಿ ಪಾಲ್ಗೊಳ್ಳಲಿದ್ದು, 4 ತಂಡ ಗಳನ್ನು “ಪ್ಲೇ-ಆಫ್’ ಮೂಲಕ ಆರಿಸಲಾಗುವುದು. ಒಂದು ತಿಂಗಳ ಅವಧಿಯ ಈ ಕಾಲ್ಚೆಂಡಿನ ಕಾದಾಟ ಜೂ. 12ರಿಂದ ಯುರೋಪ್‌ನ 12 ಪ್ರಮುಖ ನಗರಗಳಲ್ಲಿ ನಡೆಯಲಿದೆ. ಉದ್ಘಾಟನಾ ಪಂದ್ಯ ಇಟಲಿ-ಟರ್ಕಿ ನಡುವೆ ರೋಮ್‌ನಲ್ಲಿ ಏರ್ಪಡಲಿದೆ. ಫೈನಲ್‌ ಹಣಾಹಣಿಯ ಆತಿಥ್ಯ ಲಂಡನ್‌ ಪಾಲಾಗಿದೆ (ಜು. 12).