ವಾಷಿಂಗ್ಟನ್: ಹಾಲಿವುಡ್‌ ಸಿನಿಮಾರಂಗದ ಯುವನಟ 25 ರ ಹರೆಯದಲ್ಲೇ ಇಹಲೋಹ ತ್ಯಜಿಸಿದ್ದಾರೆ. ʼಎಚ್‌ ಬಿಒʼ ನಲ್ಲಿ ಸರಣಿಯಾಗಿ ಪ್ರಸಾರ ಕಾಣುತ್ತಿದ್ದ ‘ಯುಫೋರಿಯಾʼ ದಲ್ಲಿ ನಟಿಸಿ ಸಣ್ಣ ವಯಸ್ಸಿನಲ್ಲೇ ಅಪಾರ ಅಭಿಮಾನಿಗಳ ಪ್ರೀತಿಯನ್ನು ಸಂಪಾದಿಸಿದ್ದ ಆಂಗಸ್ ಕ್ಲೌಡ್ ಸೋಮವಾರ(ಜು.31 ರಂದು) ನಿಧನರಾಗಿದ್ದಾರೆ.
ಕ್ಯಾಲಿಫೋರ್ನಿಯಾದ ಓಕ್ಲ್ಯಾಂಡ್‌ನಲ್ಲಿರುವ ಅವರ ನಿವಾಸದಲ್ಲಿ ಆಂಗಸ್ ಕ್ಲೌಡ್ ಕೊನೆಯುಸಿರೆಳೆದಿದ್ದಾರೆ. ಆದರೆ ಅವರ ನಿಧನ ಯಾವ ಕಾರಣದಿಂದ ಆಗಿದೆ ಎನ್ನುವುದರ ಬಗ್ಗೆ ಇದುವರೆಗೆ ಮಾಹಿತಿ ಲಭ್ಯವಾಗಿಲ್ಲ.
ಇತ್ತೀಚೆಗೆ ನಿಧನರಾಗಿದ್ದ ತಂದೆ: ಕಳೆದ ವಾರ ಅವರ ತಂದೆ ನಿಧನರಾದರು. ಈ ನೋವಿನಲ್ಲಿ ಅವರು ಇದ್ದರು. ಅವರಿಗೆ ಅವರ ತಂದೆಯೇ ಉತ್ತಮ ಸ್ನೇಹಿತರಾಗಿದ್ದರು. ನಮಗಿರುವ ಒಂದೇ ಸಮಾಧಾನವೆಂದರೆ ಅವರೀಗ ಅವರ ತಂದೆಯೊಂದಿಗೆ ಸೇರಿಕೊಂಡಿದ್ದಾರೆನ್ನುವುದು. ಆಂಗಸ್ ಮಾನಸಿಕ ಆರೋಗ್ಯದೊಂದಿಗಿನ ಹೋರಾಟದ ಬಗ್ಗೆ ಹೇಳಿಕೊಂಡಿದ್ದರು. ಅವರ ನಿಧನವು ಇತರರಿಗೆ ಯಾರೂ ಒಬ್ಬಂಟಿಯಾಗಿಲ್ಲ ಮತ್ತು ಮೌನವಾಗಿ ತಮ್ಮದೇ ಆದ ಹೋರಾಟವನ್ನು ಮಾಡಬಾರದು ಎಂಬುದನ್ನು ನೆನಪಿಸುತ್ತದೆ ಎಂದು ನಾವು ಭಾವಿಸುತ್ತೇವೆ. ಅವರ ಹಾಸ್ಯ, ನಗು ಮತ್ತು ಎಲ್ಲರರೊಂದಿಗಿನ ಪ್ರೀತಿಗಾಗಿ ಜಗತ್ತು ಅವರನ್ನು ನೆನಪಿಸಿಕೊಳ್ಳುತ್ತದೆ ಎಂದು ಭಾವಿಸುತ್ತೇವೆ” ಎಂದು ನಟನ ಕುಟುಂಬಸ್ಥರು ತಮ್ಮ ಹೇಳಿಕೆಯನ್ನು ಬಿಡುಗಡೆ ಮಾಡಿದೆ.
ʼಎಚ್‌ ಬಿಒʼ ನಲ್ಲಿ ಸರಣಿಯಾಗಿ ಪ್ರಸಾರ ಕಾಣುತ್ತಿದ್ದ ‘ಯುಫೋರಿಯಾʼ ದಲ್ಲಿ ಆಂಗಸ್ ಕ್ಲೌಡ್ ಡ್ರಗ್ ಡೀಲರ್ ಫೆಜ್ಕೊ ‘ಫೆಜ್’ ಒ’ನೀಲ್ ಆಗಿ ನಟಿಸಿದ್ದರು.
ಒಂದು ದಿನ ಆಂಗಸ್ ಕ್ಲೌಡ್ ನ್ಯೂಯಾರ್ಕ್‌ ನ ಬೀದಿಯಲ್ಲಿ ತನ್ನ ಸ್ನೇಹಿತರೊಂದಿಗೆ ನಡೆದುಕೊಂಡು ಹೋಗುತ್ತಿರುವ ವೇಳೆ ಕಾಸ್ಟಿಂಗ್‌ ಡೈರೆಕ್ಟರ್‌ ಯೊಬ್ಬರು ಅವರನ್ನು ನಟನೆಗೆ ಬರುವಂತೆ ಹೇಳಿದ್ದರು. ಅದರಂತೆ 2019 ರಲ್ಲಿ ಕಾರ್ಯಕ್ರಮದ ಮೊದಲ ಸೀಸನ್‌ ನಲ್ಲಿ ಕಾಣಿಸಿಕೊಳ್ಳುವ ಮೂಲಕ ನಟನಾ ಲೋಕಕ್ಕೆ ಪರಿಚಿತರಾದರು. ನಟನೆಗೆ ಬರುವ ಮುನ್ನ ಅವರು ಹೊಟೇಲ್‌ ನಲ್ಲಿ ವೇಟರ್‌ ಆಗಿ ಕೆಲಸ ಮಾಡುತ್ತಿದ್ದರು.
ಯುವ ನಟನ ನಿಧನಕ್ಕೆ ಹಿರಿಯ ನಟಿ ಕೆರ್ರಿ ವಾಷಿಂಗ್ಟನ್,ನಟಿ ರಾಚೆಲ್ ಜೆಗ್ಲರ್, ಸ್ಟಾರ್ಮ್ ರೀಡ್ ಸೇರಿದಂತೆ ಹಲವು ಕಲಾವಿದರು ಸಂತಾಪ ಸೂಚಿಸಿದ್ದಾರೆ.
