ಢಾಕಾ: ಬಾಂಗ್ಲಾದೇಶವನ್ನು ದ್ವಿತೀಯ ಪಂದ್ಯದಲ್ಲಿ 132 ರನ್ನುಗಳಿಂದ ಬಗ್ಗುಬಡಿದ ಇಂಗ್ಲೆಂಡ್‌ ಏಕದಿನ ಸರಣಿಯನ್ನು ವಶಪಡಿಸಿಕೊಂಡಿದೆ.ಜೇಸನ್‌ ರಾಯ್‌ ಅವರ 12ನೇ ಶತಕ ಸಾಹಸದಿಂದ ಇಂಗ್ಲೆಂಡ್‌ 7 ವಿಕೆಟಿಗೆ 326 ರನ್‌ ಪೇರಿಸಿದರೆ, ಬಾಂಗ್ಲಾ 44.4 ಓವರ್‌ಗಳಲ್ಲಿ 194ಕ್ಕೆ ಆಲೌಟ್‌ ಆಯಿತು. ಜೇಸನ್‌ ರಾಯ್‌ ಅವರ ಸ್ಕೋರ್‌ ಮತ್ತು ಬಾಂಗ್ಲಾದ ಸೋಲಿನ ಅಂತರದ ಒಂದೇ ಆಗಿದ್ದೊಂದು ಕಾಕತಾಳೀಯ.
ಜೇಸನ್‌ ರಾಯ್‌ 124 ಎಸೆತಗಳಿಂದ 132 ರನ್‌ ಬಾರಿಸಿದರು (18 ಬೌಂಡರಿ, 1 ಸಿಕ್ಸರ್‌). 76 ರನ್‌ ಮಾಡಿದ ನಾಯಕ ಜಾಸ್‌ ಬಟ್ಲರ್‌ ಮತ್ತೋರ್ವ ಪ್ರಮುಖ ಸ್ಕೋರರ್‌. ಸ್ಯಾಮ್‌ ಕರನ್‌ ಮತ್ತು ಆದಿಲ್‌ ರಶೀದ್‌ ತಲಾ 4 ವಿಕೆಟ್‌ ಕೆಡವಿದರು.
ಬಾಂಗ್ಲಾ ಪರ ಶಕಿಬ್‌ ಅಲ್‌ ಹಸನ್‌ 58, ನಾಯಕ ತಮಿಮ್‌ ಇಕ್ಬಾಲ್‌ 35 ರನ್‌ ಹೊಡೆದರು.
ಮೊದಲ ಪಂದ್ಯವನ್ನು ಇಂಗ್ಲೆಂಡ್‌ 3 ವಿಕೆಟ್‌ಗಳಿಂದ ಗೆದ್ದಿತ್ತು. ಅಂತಿಮ ಏಕದಿನ ಸೋಮವಾರ ನಡೆಯಲಿದೆ.
