ಬಾಂಗ್ಲಾ ವಿರುದ್ಧ ಭರ್ಜರಿ ಜಯ; ಸೆಮಿ ಫೈನಲ್ ಪ್ರವೇಶಿಸಿದ ಇಂಗ್ಲೆಂಡ್ ವನಿತೆಯರು

ವೆಲ್ಲಿಂಗ್ಟನ್: ಲೀಗ್ ಹಂತದ ತಮ್ಮ ಕೊನೆಯ ಪಂದ್ಯದಲ್ಲಿ ಭರ್ಜರಿ ಜಯ ಸಾಧಿಸಿದ ಇಂಗ್ಲೆಂಡ್ ವನಿತೆಯರು ವನಿತಾ ಏಕದಿನ ವಿಶ್ವಕಪ್ ಕೂಟದ ಸೆಮಿ ಫೈನಲ್ ಪ್ರವೇಶಿಸಿದ್ದಾರೆ.

ಇಲ್ಲಿನ ಬಾಸಿನ್ ರಿಸರ್ವ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ಆರು ವಿಕೆಟ್ ನಷ್ಟಕ್ಕೆ 234 ರನ್ ಗಳಿಸಿದರೆ, ಬಂಗ್ಲಾ ವನಿತೆಯರು ಕೇವಲ 134 ರನ್ ಗಳಿಗೆ ಆಲೌಟಾದರು.

ಇಂಗ್ಲೆಂಡ್ ಗೆ ಸೋಫಿಯಾ ಡಂಕ್ಲಿ ಅರ್ಧಶತಕ ಸಿಡಿಸಿ ನೆರವಾದರು. ಡಂಕ್ಲಿ 67 ರನ್ ಗಳಿಸಿದರೆ, ಸೀವರ್ 40 ರನ್, ಬ್ಯೂಮಂಟ್ 33 ರನ್ ಗಳಿಸಿದರು. ಬಾಂಗ್ಲಾ ಪರ ಸಲ್ಮಾ ಖತುನ್ ಎರಡು ವಿಕೆಟ್ ಕಿತ್ತರು.

ಬಾಂಗ್ಲಾ ಪರ ಲತಾ ಮೊಂಡಲ್ 30 ರನ್ ಗಳಿಸಿದರೆ, ಶಮಿಮಾ ಸುಲ್ತಾನ ಮತ್ತು ಶರ್ಮಿನ್ ಅಖ್ತರ್ ತಲಾ 23 ರನ್ ಗಳಿಸಿದರು. ಇಂಗ್ಲೆಂಡ್ ಪರ ಸೋಫಿ ಎಕ್ಲೆಸ್ಟೋನ್ ಮತ್ತು ಶಾರ್ಲೋಟ್ ಡೀನ್ ತಲಾ ಮೂರು ವಿಕೆಟ್ ಕಿತ್ತರು. ಬಾಂಗ್ಲಾ ತಂಡ 48 ಓವರ್ ಗಳಲ್ಲಿ 134 ರನ್ ಗೆ ಆಲೌಟಾಯಿತು. ಇದೊಂದಿಗೆ ಇಂಗ್ಲೆಂಡ್ 100 ರನ್ ಅಂತರದ ಭರ್ಜರಿ ಜಯ ಸಾಧಿಸಿತು.

ಇದನ್ನೂ ಓದಿ:ಐಪಿಎಲ್ 2022: ಲಸಿತ್ ಮಾಲಿಂಗ ದಾಖಲೆ ಸರಿಗಟ್ಟಿದ ಸಿಎಸ್ ಕೆ ಯ ಡ್ವೇನ್ ಬ್ರಾವೋ

ಈ ಗೆಲುವಿನೊಂದಿಗೆ ಇಂಗ್ಲೆಂಡ್ ಸೆಮಿ ಫೈನಲ್ ಪ್ರವೇಶಿಸಿತು. ಮೊದಲು ಮೂರು ಪಂದ್ಯಗಳಲ್ಲಿ ಸೋಲು ಕಂಡಿದ್ದ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ನಂತರ ಸತತ ಪಂದ್ಯಗಳನ್ನು ಗೆದ್ದು ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೆ ನೆಗೆಯಿತು.

ಅಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ ಮತ್ತು ಇಂಗ್ಲೆಂಡ್ ತಂಡಗಳು ಸೆಮಿ ಸ್ಥಾನ ಖಾತ್ರಿ ಪಡಿಸಿಕೊಂಡಿದೆ. ನಾಲ್ಕನೇ ಸ್ಥಾನಕ್ಕೆ ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಪಂದ್ಯದ ಫಲಿತಾಂಶ ಬರಬೇಕಿದೆ. ಭಾರತ ಗೆದ್ದರೆ ಸೆಮಿ ಪ್ರವೇಶ ಪಡೆಯಲಿದ್ದು, ದಕ್ಷಿಣ ಆಫ್ರಿಕಾ ಗೆದ್ದರೆ ವೆಸ್ಟ್ ಇಂಡೀಸ್ ತಂಡವು ಸೆಮಿ ಫೈನಲ್ ಗೇರಲಿದೆ.