ವಿದ್ಯುತ್‌ ಬಿಲ್‌: ಗೊಂದಲ ಬೇಡ

ಬಾಗಲಕೋಟೆ: ಜಿಲ್ಲಾ ಹೆಸ್ಕಾಂ ವೃತ್ತ ವ್ಯಾಪ್ತಿಯಲ್ಲಿ ಬರುವ ಗ್ರಾಹಕರಿಗೆ ಮೇ-2020 ನೇ ತಿಂಗಳಿನಲ್ಲಿ ಮಾಪಕ ಓದುಗರು ನೇರವಾಗಿ ಗ್ರಾಹಕರ ಮಾಪಕಗಳನ್ನು ಓದಿ ರೀಡಿಂಗ್‌ ಪ್ರಕಾರ ಬಿಲ್ಲನ್ನು ನೀಡಲಾಗುತ್ತಿದೆ ಎಂದು ಬಾಗಲಕೋಟೆ ಹೆಸ್ಕಾಂನ ಅಧಿಧೀಕ್ಷಕ ಅಭಿಯಂತರು ತಿಳಿಸಿದ್ದಾರೆ.

ಕೋವಿಡ್‌-19 ಹರಡುವುದನ್ನು ತಡೆಗಟ್ಟುವ ಹಾಗೂ ಮುಂಜಾಗ್ರತೆ ಕ್ರಮ ಅನುಸರಿಸುವ ಸಂಬಂಧ ಹಿನ್ನಲೆಯಲ್ಲಿ ಗ್ರಾಹಕರ ಆರೋಗ್ಯದ ಹಿತದೃಷ್ಟಿಯಿಂದ ಹೆಸ್ಕಾಂ ಜಿಲ್ಲಾ ವೃತ್ತ ವ್ಯಾಪ್ತಿಯಲ್ಲಿ ಬರುವ ಗ್ರಾಹಕರಿಗೆ ಏಪ್ರಿಲ್‌ನಲ್ಲಿ 3 ತಿಂಗಳಿನಲ್ಲಿ ಸರಾಸರಿ ವಿದ್ಯುತ್‌ ಬಳಕೆಯ ಆಧಾರದ ಮೇಲೆ ಬಿಲ್‌ ಮಾಡಲಾಗಿತ್ತು. ಆದರೆ ಮೇ ತಿಂಗಳಿನ ಬಿಲ್‌ನಲ್ಲಿ ಹೊಂದಾಣಿಕೆ ಮಾಡಿ ಬಿಲ್‌ ನೀಡಲಾಗುತ್ತಿದೆ. ಮೇ ತಿಂಗಳಿನ ಬಿಲ್‌ ಒಟ್ಟು ಎರಡು ತಿಂಗಳ ಬಳಕೆಯ ಬಿಲ್‌ ಆಗಿದೆ. ಗ್ರಾಹಕರು ಮೇ ತಿಂಗಳಿನಲ್ಲಿ ಅಧಿಕ ಬಿಲ್ಲು ಬರುವುದು ಎಂದು ಹಾಗೂ ಹೆಚ್ಚಿನ ಸ್ಲ್ಯಾಬ್‌ ಲೆಕ್ಕಾಚಾರ ಆಗುತ್ತದೆ ಎಂದು ಆತಂಕ ಪಡುವ ಅವಶ್ಯಕತೆ ಇರುವುದಿಲ್ಲ. ಏಪ್ರಿಲ್‌ನ ಸರಾಸರಿ ಬಿಲ್ಲನ್ನು ಪಾವತಿಸಿದ್ದಲ್ಲಿ ಮೇ ಮಾಹೆಯ ಬಿಲ್ಲಿನಲ್ಲಿ ಆ ಮೊತ್ತವನ್ನು ಕಡಿತಗೊಳಿಸಿ ಬಾಕಿ ಇಲ್ಲವೆಂದು ನಮೂದಿಸಲಾಗಿರುತ್ತದೆ. ಒಂದು ವೇಳೆ ಪಾವತಿ ಮಾಡದಿದ್ದಲ್ಲಿ ಬಾಕಿಯ ಕಾಲಂನಲ್ಲಿ ಬಾಕಿ ಎಂದು ತೋರಿಸಿ, ಮೇ ಮಾಹೆಯ ಬಿಲ್‌ನಲ್ಲಿ ಏಪ್ರಿಲ್‌ ಮಾಹೆಯ ಸರಾಸರಿ ಆಧಾರದ ಮೇಲಿಂದ ಮಾಡಿದ ಬಿಲ್‌ನ ಮೊತ್ತವನ್ನು ಕಡಿತಗೊಳಿಸಿ ಬಿಲ್ಲನ್ನು ನೀಡಲಾಗುತ್ತಿದೆ. ಹೆಚ್ಚಿನ ಮಾಹಿತಿಗಾಗಿ ಉಪ ವಿಭಾಗ, ಶಾಖಾ ಕಚೇರಿಗಳ, ನಗದು ಕೌಂಟಟ್‌ಗೆ ಭೇಟಿ ನೀಡಿ, ಬಿಲ್‌ ಬಗ್ಗೆ ಮಾಹಿತಿ ಪಡೆಯಬಹುದಾಗಿದೆ.