ನೀತಿ ಸಂಹಿತೆ ಉಲ್ಲಂಘನೆ: ಇಮ್ರಾನ್‌ ಖಾನ್‌ ಮತ ಅಸಿಂಧು ಸಾಧ್ಯತೆ

ಇಸ್ಲಾಮಾಬಾದ್‌ : ಪಾಕ್‌ ಸಂಸತ್ತಿಗೆ ಇಸ್ಲಾಮಾಬಾದ್‌ ಕ್ಷೇತ್ರದಿಂದ ಸ್ಪರ್ಧಿಸುತ್ತಿರುವ ಪಾಕಿಸ್ಥಾನ್‌ ತೆಹರೀಕ್‌ ಎ ಇನ್ಸಾಫ್ ಪಕ್ಷದ ಮುಖ್ಯಸ್ಥ ಇಮ್ರಾನ್‌ ಖಾನ್‌ ಅವರು ಮಾಧ್ಯಮ ಮತ್ತು ಕ್ಯಾಮೆರಾಗಳಿಗೆ ಸ್ಪಷ್ಟವಾಗಿ ಕಾಣುವ ರೀತಿಯಲ್ಲಿ  ಮತ ಚಲಾಯಿಸುವ ಮೂಲಕ ಚುನಾವಣಾ ನೀತಿ ಸಂಹಿತೆಯ ಉಲ್ಲಂಘನೆಗೈದಿದ್ದು ಆ ಕಾರಣಕ್ಕೆ ಚುನಾವಣಾ ಆಯೋಗ ಇಮ್ರಾನ್‌ ಖಾನ್‌ ಚಲಾಯಿಸಿರುವ ಮತವನ್ನು ಅಸಿಂಧು ಗೊಳಿಸುವ ಸಾಧ್ಯತೆ ಇದೆ. 

ಮತ ಹಾಕಿದ ಬಳಿಕ ಮಾಧ್ಯಮದೊಂದಿಗೆ ಮುಕ್ತ ಸಂವಾದ ನಡೆಸಿರುವ ಕಾರಣಕ್ಕೆ ಪಿಎಂಎಲ್‌ಎನ್‌ ಅಧ್ಯಕ್ಷ ಶಹಬಾಜ್‌ ಶರೀಫ್ ಮತ್ತು ಮಾಜಿ ವಿದೇಶ ಸಚಿವ ಖ್ವಾಜಾ ಆಸಿಫ್ ಅವರ ವಿರುದ್ಧ ಚುನಾವಣಾ ಆಯೋಗ, ನೀತಿ ಸಂಹಿತೆಯ ಉಲ್ಲಂಘನೆಗಾಗಿ, ಕಠಿನ ಶಿಸ್ತು ಕ್ರಮ ತೆಗೆದುಕೊಳ್ಳುವ ಸಾಧ್ಯತೆ ಇದೆ. 

ಕ್ಯಾಮೆರಾ ಮುಂದೆ ಮತ ಹಾಕಿದವರು ಮತ್ತು ಮತದಾನದ ಬಳಿಕ ಮಾಧ್ಯಮದ ಮುಂದೆ ಭಾಷಣ ಮಾಡಿದವರ ನಡೆ-ನುಡಿ ಮೇಲೆ ಕಣ್ಣಿಡಲಾಗಿದೆ; ತಪ್ಪುಗಾರರೆಂದು ಕಂಡು ಬಂದಲ್ಲಿ ಅಂತಹವರ ವಿರುದ್ಧ ಕಠಿನ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಚುನಾವಣಾ ಆಯೋಗದ ವಕ್ತಾರ ನದೀಂ ಕಾಸಿಂ ಹೇಳಿರುವುದನ್ನು ಎಕ್ಸ್‌ಪ್ರೆಸ್‌ ಟ್ರಿಬ್ಯೂನ್‌ ವರದಿಮಾಡಿದೆ.