ಮಹಿಳಾ ಪೊಲೀಸರಿಗೆ 8 ಗಂಟೆ ಕೆಲಸ!

ಮುಂಬಯಿ: ಮಹಾರಾಷ್ಟ್ರದ ಪೊಲೀಸ್‌ ಇಲಾಖೆ ಮಹಿಳಾ ಕಾನ್‌ಸ್ಟೆಬಲ್‌ಗಳಿಗೆ ಸಿಹಿಸುದ್ದಿ ನೀಡಿದೆ. ಇಲಾಖೆಯಲ್ಲಿರುವ ಮಹಿಳಾ ಸಿಬಂದಿಯ ಕೆಲಸದ ಅವಧಿಯನ್ನು ಈಗಿರುವ 12 ಗಂಟೆಯಿಂದ 8 ಗಂಟೆಗೆ ಇಳಿಸುತ್ತಿರುವುದಾಗಿ ಡಿಜಿಪಿ ಸಂಜಯ್‌ ಪಾಂಡೆ ಘೋಷಿಸಿದ್ದಾರೆ.

ಈಗಾಗಲೇ ನಾಗಪುರ, ಪುಣೆ, ಅಮರಾವತಿ ಮತ್ತು ನವಿ ಮುಂಬಯಿಯಲ್ಲಿ ಮಹಿಳಾ ಪೊಲೀಸ್‌ ಸಿಬಂದಿಯ ಕೆಲಸದ ಅವಧಿಯನ್ನು 8 ಗಂಟೆಗೆ ಇಳಿಸಲಾಗಿದೆ. ಇದೀಗ ಈ ನಿಯಮವನ್ನು ರಾಜ್ಯಾದ್ಯಂತ ವಿಸ್ತರಿಸಿರುವುದಾಗಿ ಅವರು ಘೋಷಿಸಿದ್ದಾರೆ.

ಅನೇಕ ಮಹಿಳಾ ಸಿಬಂದಿ 12 ಗಂಟೆ ಕೆಲಸ ಮಾಡುತ್ತಿದ್ದುದರಿಂದ ಕುಟುಂಬ ನಿರ್ವಹಣೆಗೆ ಸಾಕಷ್ಟು ತೊಂದರೆ ಆಗುತ್ತಿರುವುದಾಗಿ ಇಲಾಖೆಯ ಮುಖ್ಯಸ್ಥರಿಗೆ ಹೇಳಿಕೊಂಡಿದ್ದರು. ವೃತ್ತಿ ಹಾಗೂ ಕೌಟುಂಬಿಕ ಬದುಕಿನಲ್ಲಿ ಸಮತೋಲನ ಕಾಯ್ದುಕೊಳ್ಳಲು ನೆರವಾಗುವ ಸಲುವಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದೂ ಪಾಂಡೆ ತಿಳಿಸಿದ್ದಾರೆ.