Advertisement
ಫ‌ುಟ್‌ಬಾಲನ್ನು ಭಾರತದಲ್ಲಿ ಜನಪ್ರಿಯಗೊಳಿಸ ಬೇಕೆಂದಾದರೆ ಅದನ್ನು ಸ್ವತಂತ್ರವಾಗಿಯೇ ನಡೆಸಬೇಕು. ಬೇರೆ ಕೂಟಗಳ ವೇಳಾಪಟ್ಟಿ ನೋಡಿಕೊಂಡು ಐಎಸ್‌ಎಲ್‌ ವೇಳಾಪಟ್ಟಿ ರೂಪಿಸುವುದನ್ನು ನಿಲ್ಲಿಸಬೇಕು. ಭಾರತ ಕ್ರಿಕೆಟ್‌ನಂತಹ ಜನಪ್ರಿಯ ಕ್ರೀಡೆಯನ್ನು ಹೊಂದಿರುವುದು ಖುಷಿಯ ವಿಚಾರ. ಆದರೆ ಇನ್ನೊಂದು ಕ್ರೀಡೆಯೂ ಅಷ್ಟೇ ಜನಪ್ರಿಯತೆ ಪಡೆಯುತ್ತದೆ ಎಂದು ಹೆದರಬಾರದು. ಕ್ರಿಕೆಟ್‌ಗಾಗಿ ಫ‌ುಟ್‌ಬಾಲ್‌ ನಷ್ಟ ಅನುಭವಿಸಬಾರದು ಎಂದು ಸ್ಟಿಮಾಕ್‌ ಹೇಳಿದರು.
“ನಾನು ಭಾರತದ ಕೋಚ್‌ ಹುದ್ದೆ ವಹಿಸಿ ಕೊಂಡಾಗ ನಿರೀಕ್ಷೆ ಮಾಡಿದ ಸ್ಥಿತಿ ಬೇರೆಯೇ ಇತ್ತು. ಪ್ರತಿಯೊಬ್ಬರೂ ಭಾರತ ತಂಡವನ್ನು ಔನ್ನತ್ಯಕ್ಕೇರಿ ಸುವುದಕ್ಕೆ ಭಾರೀ ಬದ್ಧತೆ ಹೊಂದಿದ್ದಾರೆಂದು ನಾನು ಭಾವಿಸಿದ್ದೆ. ಆದರೆ ಪರಿಸ್ಥಿತಿ ಹಾಗಿಲ್ಲ. ಪ್ರಮುಖ ಆಟಗಾರರು ಕೆಲವೊಮ್ಮೆ ಶಿಬಿರಕ್ಕೆ ಬರುವಾಗ ತಮ್ಮ ಕ್ಲಬ್‌ಗಳ ಕರ್ತವ್ಯ ಮುಗಿಸಿ ಕೇವಲ ಒಂದು ಅಥವಾ ಅರ್ಧ ಗಂಟೆ ಮುಂಚೆ ಬಂದಿದ್ದೂ ಇದೆ. ಇನ್ನು ಕೆಲವೊಮ್ಮೆ ಬಹುಮುಖ್ಯ ಆಟಗಾರರು ಶಿಬಿರಗಳ ವೇಳೆ ಗಾಯವಾಗಿದೆ ಎಂದು ದಿಢೀರ್‌ ಮಾಹಿತಿ ನೀಡಿದ್ದಾರೆ. ಹಾಗಾಗಿ ಆಡುವ 11 ಮಂದಿಯಲ್ಲಿ ಹೊಂದಾಣಿಕೆ ಮಾಡಿಕೊಳ್ಳುವ ಪರಿಸ್ಥಿತಿ ಬರುತ್ತಿತ್ತು’ ಎಂದು ಸ್ಟಿಮಾಕ್‌ ತಾವೆದುರಿಸಿದ ಸವಾಲನ್ನು ವಿವರಿಸಿದ್ದಾರೆ.