Electric: ಆರ್ಥಿಕ ಮಿತವ್ಯಯಿ ಇಲೆಕ್ಟ್ರಿಕ್‌ ಹೆದ್ದಾರಿ ನನ್ನ ಕನಸು: ನಿತಿನ್‌ ಗಡ್ಕರಿ

ನವದೆಹಲಿ: ಆರ್ಥಿಕವಾಗಿ ಕಾರ್ಯಸಾಧ್ಯ­ವಾಗುವ ದೇಶದ ಮೊದಲ ಇಲೆಕ್ಟ್ರಿಕ್‌ ಹೆದ್ದಾರಿಯ ನಿರ್ಮಾಣ ನನ್ನ ಕನಸು. ಪ್ರಾಯೋಗಿಕವಾಗಿ ಈ ಯೋಜನೆಯನ್ನು ನಾಗ್ಪುರದಲ್ಲಿ ಅನುಷ್ಠಾನಗೊಳಿಸಲಾಗುತ್ತದೆ ಎಂದು ಕೇಂದ್ರ ರಸ್ತೆ ಸಾರಿಗೆ ಸಚಿವ ಮತ್ತು ಹೆದ್ದಾರಿ ಸಚಿವ ನಿತಿನ್‌ ಗಡ್ಕರಿ ಹೇಳಿದ್ದಾರೆ.

ನವದೆಹಲಿಯಲ್ಲಿ ಆಯೋಜಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು “ಯೋಜನೆ ಅನುಷ್ಠಾನದ ನಿಮಿತ್ತ ಕೇಂದ್ರ ವಿದ್ಯುತ್‌ ಸಚಿವಾಲಯದ ಜತೆಗೆ ಮಾತುಕತೆ ನಡೆಸಿದ್ದೇನೆ. ವಾಣಿಜ್ಯಿಕ ವಿದ್ಯುತ್‌ಗೆ ಪ್ರತಿ ಯುನಿಟ್‌ಗೆ 11 ರೂ. ದರ ಇದೆ. ಆದರೆ, ಹೆದ್ದಾರಿ ಯೋಜನೆ ಹಿನ್ನೆಲೆಯಲ್ಲಿ ಪ್ರತಿ ಯುನಿಟ್‌ಗೆ 3.50 ರೂ.ನಂತೆ ಖರೀದಿ ಮಾಡುವ ಬಗ್ಗೆ ಮಾತು­ಕತೆ ನಡೆಸಿದ್ದೇನೆ’ ಎಂದರು. ಈ ಯೋಜನೆಗೆ ಬೆಂಬಲ ವ್ಯಕ್ತಪಡಿಸಿದ ಅವರು, ಖಾಸಗಿ ಕಂಪನಿಗಳೂ ಅದರಲ್ಲಿ ಭಾಗವಹಿಸಲು ಅವಕಾಶ ಕಲ್ಪಿಸಿಕೊಡಲಾಗುವ ಸುಳಿವನ್ನು ನೀಡಿದ್ದಾರೆ. ವಿದ್ಯುತ್‌ ಕೇಬಲ್‌ಗ‌ಳ ನಿರ್ವಹಣೆಯಲ್ಲಿ ಅವರು ಭಾಗಿಯಾಗಬಹುದು ಎಂದರು. ಈ ಮೊದಲು ದೇಶದ ಮೊದಲ ಇಲೆಕ್ಟ್ರಿಕ್‌ ಹೆದ್ದಾರಿಯನ್ನು ನವದೆಹಲಿ ಮತ್ತು ಜೈಪುರ ನಡುವೆ ನಿರ್ಮಿಸುವ ಇರಾದೆ ವ್ಯಕ್ತಪಡಿಸಿದ್ದರು.