Advertisement
ಶನಿವಾರ ವಾಂಖೇಡೆ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಪಶ್ಚಿಮ ವಲಯ ತಂಡವು 20- ಓವರ್ಗಳಲ್ಲಿ 5 ವಿಕೆಟಿಗೆ 149 ರನ್ ಪೇರಿಸಿತು. ಇದಕ್ಕುತ್ತರವಾಗಿ ವಿರಾಟ್ ಸಿಂಗ್ ಮತ್ತು ಇಶಾಂಕ್ ಜಗ್ಗಿ ಅವರ ಅರ್ಧಶತಕದಿಂದಾಗಿ ಪೂರ್ವ ವಲಯ ತಂಡವು 13.4 ಓವರ್ಗಳಲ್ಲಿ ಕೇವಲ 2 ವಿಕೆಟ್ ನಷ್ಟಕ್ಕೆ 153 ರನ್ ಪೇರಿಸಿ ಗೆಲುವು ಸಾಧಿಸಿತು. ಈ ಗೆಲುವಿನಿಂದ ಪೂರ್ವ ವಲಯ ತಂಡವು ಆಡಿದ ನಾಲ್ಕು ಪಂದ್ಯಗಳಲ್ಲಿ ಜಯ ಸಾಧಿಸಿ ಒಟ್ಟು 16 ಅಂಕಗಳೊಂದಿಗೆ ಪ್ರಶಸ್ತಿ ತನ್ನದಾಗಿಸಿಕೊಂಡಿತು.
ಗೆಲ್ಲಲು 150 ರನ್ ಗಳಿಸುವ ಗುರಿ ಪಡೆದ ಪೂರ್ವ ವಲಯ ತಂಡವು ಉತ್ತಮ ಆರಂಭ ಪಡೆಯಿತು. ಅರುಣ್ ಕಾರ್ತಿಕ್ ಮತ್ತು ವಿರಾಟ್ ಸಿಂಗ್ ಕೇವಲ 5.2 ಓವರ್ಗಳಲ್ಲಿ 61 ರನ್ ಪೇರಿಸಿದರು. ಆಬಳಿಕ ವಿರಾಟ್ ಅವರನ್ನು ಸೇರಿಕೊಂಡ ಇಶಾಂಕ್ ಜಗ್ಗಿ ಭರ್ಜರಿ ಆಟವಾಡಿ ತಂಡದ ಅಮೋಘ ಗೆಲುವಿಗೆ ಕಾರಣರಾದರು. ಅವರಿಬ್ಬರು ದ್ವಿತೀಯ ವಿಕೆಟಿಗೆ 80 ರನ್ ಪೇರಿಸಿದರು. ಗೆಲ್ಲಲು 9 ರನ್ ಇರುವಾಗ ಜಗ್ಗಿ ಔಟಾದರು. ಕೇವಲ 30 ಎಸೆತ ಎದುರಿಸಿದ ಜಗ್ಗಿ 3 ಬೌಂಡರಿ ಮತ್ತು 6 ಸಿಕ್ಸರ್ ನೆರವಿನಿಂದ 56 ರನ್ ಸಿಡಿಸಿದರೆ ವಿರಾಟ್ 34 ಎಸೆತಗಳಿಂದ 58 ರನ್ ಗಳಿಸಿ ಅಜೇಯರಾಗಿ ಉಳಿದರು. 5 ಬೌಂಡರಿ ಮತ್ತು 3 ಸಿಕ್ಸರ್ ಬಾರಿಸಿದ್ದರು.