Movie review ಈ ಪಟ್ಟಣಕ್ಕೆ ಏನಾಗಿದೆ: ಪಟ್ಟಣದ ಸುತ್ತ ಜೂಜು ಅಡ್ಡೆ!

ಜೂಜು ಮತ್ತು ಬೆಟ್ಟಿಂಗ್‌ ಮಾಫಿಯಾ ಯುವ ಜನರನ್ನು ಹೇಗೆ ಹಾಳು ಮಾಡುತ್ತದೆ. ಅದರ ಹಿಂದೆ ಬಿದ್ದವರು ಮುಂದೆ ಏನೆಲ್ಲಾ ತೊಂದರೆ ಅನುಭವಿಸುತ್ತಾರೆ ಎಂಬ ಅಂಶದೊಂದಿಗೆ ಈ ವಾರ ತೆರೆಗೆ ಬಂದಿರುವ ಚಿತ್ರ “ಈ ಪಟ್ಟಣಕ್ಕೆ ಏನಾಗಿದೆ’.

ಇಲ್ಲಿನ ನಾಯಕ ರಾತ್ರೋರಾತ್ರಿ ಶ್ರೀಮಂತನಾಗುತ್ತಾನೆ, ಮೋಜು-ಮಸ್ತಿ, ಶೋಕಿ ಜೀವನ ನಡೆಸುತ್ತಾನೆ. ಇದಕ್ಕೆಲ್ಲಾ ಕಾರಣ ಏನು, ಮುಂದೆ ಅವನ ಲೈಫ್ನಲ್ಲಿ ಏನೇನು ತಿರುವುಗಳು ಬರುತ್ತವೆ ಎಂಬ ಅಂಶದೊಂದಿಗೆ ಈ ಚಿತ್ರ ಸಾಗುತ್ತದೆ. ರವಿ ಸುಬ್ಬರಾವ್‌ ಚಿತ್ರವನ್ನು ನಿರ್ದೇಶಿಸಿ, ನಟಿಸಿದ್ದಾರೆ.

ಇಡೀ ಸಿನಿಮಾವನ್ನು ನೈಜವಾಗಿ ಕಟ್ಟಿಕೊಡಬೇಕೆಂಬ ಅವರ “ಹಂಬಲ’ ತೆರೆಮೇಲೆ ಎದ್ದು ಕಾಣುತ್ತದೆ. ಅದರ ಪರಿಣಾಮವಾಗಿಯೇ ಸಿನಿಮಾದಲ್ಲಿ ಅತಿರೇಕದ, ಫ್ಯಾಮಿಲಿ ಆಡಿಯನ್ಸ್‌ಗೆ ಮುಜುಗರ ತರುವ ಸಾಕಷ್ಟು ದೃಶ್ಯಗಳಿವೆ. ಅತಿಯಾದ ಹಸಿಬಿಸಿ ದೃಶ್ಯ, ಸಂಭಾಷಣೆ, ಪಾತ್ರಧಾರಿಗಳ ವರ್ತನೆ… ಬೇಸರ ತರಿಸದೇ ಇರದು. ಸಿನಿಮಾವನ್ನು ಸಿಕ್ಕಾಪಟ್ಟೆ ಬೋಲ್ಡ್‌ ಆಗಿ ಕಟ್ಟಿಕೊಡಬೇಕೆಂಬ ನಿರ್ದೇಶಕ ರವಿ ಅವರ “ಉದ್ದೇಶ’ವೇ ಇದಕ್ಕೆ ಕಾರಣ.

ಇನ್ನು, ಬೆಂಗಳೂರಿನಿಂದ ಆರಂಭವಾಗುವ ಬೆಟ್ಟಿಂಗ್‌ ದಂಧೆ, ಮುಂಬೈ, ಕೋಲ್ಕತ್ತಾ ದುಬೈವರೆಗೂ ಸಾಗುತ್ತದೆ.ಇಲ್ಲಿನ ಒಂದಷ್ಟು ರೋಚಕ ದೃಶ್ಯಗಳನ್ನು ಸಿನಿಮಾದಲ್ಲಿ ಕಟ್ಟಿಕೊಡುವ ಪ್ರಯತ್ನ ಮಾಡಲಾಗಿದೆ. ಇನ್ನು, ಚಿತ್ರದಲ್ಲಿ ನಟಿಸಿರುವ ರವಿ ಸುಬ್ಬರಾವ್‌, ರಾಧಿಕಾ ರಾಮ್‌, ರಿತೇಶ್‌, ಸತೀಶ್‌ ಶೆಟ್ಟಿ ಪ್ರತಿಯೊಬ್ಬರು ನೈಜವಾಗಿ ನಟಿಸಲು ಪ್ರಯತ್ನಿಸಿದ್ದಾರೆ.