ಏಕಸ್ವಾಮ್ಯ ದುರ್ಬಳಕೆ: ಗೂಗಲ್‌ಗೆ EU ದಾಖಲೆಯ 2.7 ಬಿಲಿಯ ಯೂರೋ ದಂಡ

ಲಂಡನ್‌ : ಇಂಟರ್‌ನೆಟ್‌ ಸರ್ಚ್‌ ನಲ್ಲಿನ ಏಕಸ್ವಾಮ್ಯವನ್ನು ದುರುಪಯೋಗಿಸಿಕೊಂಡ ತಪ್ಪಿಗೆ ಐರೋಪ್ಯ ಒಕ್ಕೂಟವು ಗೂಗಲ್‌ಗೆ ಈ ವರೆಗಿನ ದಾಖಲೆಯನ್ನೇ ಮುರಿದಿರುವ, 2.4 ಬಿಲಿಯ ಯೂರೋ ಅಥವಾ 2.7 ಬಿಲಿಯ ಡಾಲರ್‌ಗೂ ಅಧಿಕ ಮೊತ್ತದ ದಂಡವನ್ನು ಇಂದು ಮಂಗಳವಾರ ಹೇರಿದೆ. 

ಗೂಗಲ್‌ ತನ್ನ ಹೊಸ ಶಾಪಿಂಗ್‌ ಸೇವೆಗೆ ಅನುಕೂಲವಾಗುವ ರೀತಿಯಲ್ಲಿ ತನ್ನ ಸರ್ಚ್‌ ಇಂಜಿನ್‌ ಫ‌ಲಿತಾಂಶಗಳು ಮೂಡಿ ಬರುವ ಹಾಗೆ ಕೈಚಳಕ ತೋರಿದೆ ಎಂದು ಆರೋಪಿಸಲಾಗಿದ್ದು ಈ ಕೃತ್ಯವನ್ನು ಅದು ಕಡಿಮೆ ವೆಚ್ಚ ಹೋಲಿಕೆಯ ವೆಬ್‌ಸೈಟ್‌ಗಳನ್ನು ಬಲಿಕೊಡುವ ರೀತಿಯಲ್ಲಿ ಮಾಡಿದೆ ಎಂದು ಆರೋಪಿಸಲಾಗಿದೆ. 

ಭಾರತ ಸಂಜಾತ ಸುಂದರ್‌ ಪಿಚೈ ಅವರು ಪ್ರಕೃತ ಗೂಗಲ್‌ನ ಸಿಇಓ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. 

2009ರಲ್ಲಿ ಇಂಟೆಲ್‌ ಮೇಲೆ ಹೇರಲಾಗಿದ್ದ ಮತ್ತು ಅದು ಪಾವತಿಸಿರುವ 1.1 ಬಿಲಿಯ ಯೂರೋಗಳ ದಂಡವು ಈ ವರೆಗಿನ ಗರಿಷ್ಠ ದಂಡ ಮೊತ್ತವಾಗಿತ್ತು.

ಗೂಗಲ್‌ ತನ್ನ  “ಶೋಧ ಫ‌ಲಿತಾಂಶ’ಗಳು (search resuls) ತನ್ನ ಸೇವೆಗಳಿಗೆ ಅನುಕೂಲಿಸದಂತೆ ಮಾಡುವ ಬದಲಾವಣೆಗಳನ್ನು ತರುವಂತೆ ಐರೋಪ್ಯ ಒಕ್ಕೂಟ ಅದನ್ನು ಬಲವಂತ ಪಡಿಸಲಿದೆ ಎಂದು ಟೆಲಿಗ್ರಾಫ್ ಡಾಟ್‌ ಕೋ ಡಾಟ್‌ ಯುಕೆ ವರದಿ ಮಾಡಿದೆ. 

ಗೂಗಲ್‌ ತನ್ನ ಸರ್ಚ್‌ ಇಂಜಿನ್‌ ಅನ್ನು ತನ್ನದೇ ಇತರ ಸೇವೆಗಳಿಗೆ (ವಿಶೇಷವಾಗಿ ಶಾಪಿಂಗ್‌ ಸೇವೆ) ಅನುಕೂಲಿಸುವ ರೀತಿಯಲ್ಲಿ ತೋರಿರುವ ತಾಂತ್ರಿಕ ಕೈಚಳಕವು ಏಕಸ್ವಾಮ್ಯ ಕಾನೂನುಗಳ ದುರ್ಬಳಕೆಯಾಗಿದ್ದು ಐರೋಪ್ಯ ಒಕ್ಕೂಟವು ಈ ಕುರಿತ ತನಿಖೆಯನ್ನು 2010ರಲ್ಲೇ ಆರಂಭಿಸಿತ್ತು. ಇದರಿಂದ ಇತರ ದರ-ವ್ಯತ್ಯಾಸದ ವೆಬ್‌ಸೈಟ್‌ಗಳು ಅಪಾರ ನಷ್ಟಕ್ಕೆ ಗುರಿಯಾಗಿದ್ದವು. 

ಯುರೋಪ್‌ ಇಂಟರ್‌ನೆಟ್‌ ಸರ್ಚ್‌ನಲ್ಲಿ ಗೂಗಲ್‌ ಶೇ.90ರ ಪಾಲನ್ನು ಹೊಂದಿದೆ.  ಹೀಗಾಗಿ ಇಂಟರ್‌ನೆಟ್‌ ಬಳಕೆದಾರರು ಅಂತರ್ಜಾಲವನ್ನು ಯಾವ ರೀತಿ ಜಾಲಾಡಬೇಕೆಂಬುದನ್ನು ನಿರ್ದೇಶಿಸುವ ಅತ್ಯಂತ ಪ್ರಬಲ ಉಪಕರಣ ಗೂಗಲ್‌ ಕೈಯಲ್ಲಿದೆ.