Dunki vs Salaar: ಅಡ್ವಾನ್ಸ್‌ ಬುಕಿಂಗ್‌ನಲ್ಲೇ ಕೋಟಿ ಗಳಿಸಿದ ಶಾರುಖ್‌ – ಪ್ರಭಾಸ್‌ ಸಿನಿಮಾ

ಮುಂಬಯಿ: ವರ್ಷಾಂತ್ಯಕ್ಕೆ ಭಾರತೀಯ ಸಿನಿರಂಗದಲ್ಲಿ ಎರಡು ಬಹುದೊಡ್ಡ ಸಿನಿಮಾಗಳು ರಿಲೀಸ್‌ ಆಗಲಿದೆ. ಪ್ಯಾನ್‌ ಇಂಡಿಯಾ ʼಸಲಾರ್‌ʼ ಹಾಗೂ ಶಾರುಖ್‌ ಖಾನ್‌ ಅವರ ʼಡಂಕಿʼ ಜೊತೆಯಾಗಿಯೇ ರಿಲೀಸ್‌ ಆಗಲಿದ್ದು, ಬಾಕ್ಸ್‌ ಆಫೀಸ್‌ ದಂಗಲ್‌ ಗೆ ದಿನಗಣನೆ ಆರಂಭವಾಗಿದೆ.

ಎರಡೂ ಸಿನಿಮಾಗಳು ಕೂಡ ಬಹು ನಿರೀಕ್ಷಿತ ಸಿನಿಮಾಗಳಾಗಿವೆ. ಪ್ರಶಾಂತ್‌ ನೀಲ್‌ ಹಾಗೂ ರಾಜ್ ಕುಮಾರ್‌ ಹಿರಾನಿ ನಿರ್ದೇಶನದ ಸಿನಿಮಾಗಳನ್ನು ನೋಡಲು ಪ್ರೇಕ್ಷಕರು ಕಾಯುತ್ತಿದ್ದಾರೆ. ಈಗಾಗಲೇ ಟ್ರೇಲರ್‌ ಮೂಲಕ ಪ್ರಭಾಸ್‌ – ಶಾರುಖ್‌ ಕಮಾಲ್‌ ಮಾಡಿದ್ದಾರೆ.

ಬಾಕ್ಸ್‌ ಆಫೀಸ್‌ ನಲ್ಲಿ ʼಡಂಕಿʼvs ‘ಸಲಾರ್‌ʼ ಗಳಿಕೆ ಬಗ್ಗೆ ಚರ್ಚೆ ನಡೆಯುತ್ತಿದೆ. ಇತ್ತ ಅಡ್ವಾನ್ಸ್‌ ಬುಕಿಂಗ್‌ ನಲ್ಲೂ ಎರಡೂ ಸಿನಿಮಾಗಳ ನಡುವೆ ಪೈಪೋಟಿ ಉಂಟಾಗಿದೆ.

ʼಡಂಕಿʼ ಸಿನಿಮಾ ಹಿಂದಿಯಲ್ಲಿ ಮಾತ್ರ ರಿಲೀಸ್‌ ಆಗಲಿದ್ದು, ಹಿಂದಿಯಲ್ಲಿ 2836 ಶೋಗಳಿಗೆ 38,000 ಟಿಕೆಟ್‌ಗಳು ಮುಂಗಡ ಬುಕ್ಕಿಂಗ್‌ನ ಮೊದಲ ದಿನವೇ ಮಾರಾಟವಾಗಿವೆ. ಆ ಮೂಲಕ 1.45 ಕೋಟಿ ರೂಪಾಯಿ ಗಳಿಕೆಯನ್ನು ಮಾಡಿದೆ ಎಂದು ಸ್ಯಾಕ್ನಿಲ್ಕ್.ಕಾಮ್‌ ವರದಿ ಮಾಡಿದೆ.

ಮಹಾರಾಷ್ಟ್ರ, ದೆಹಲಿ, ಪಶ್ಚಿಮ ಬಂಗಾಳ, ಗುಜರಾತ್ ಮತ್ತು ಕರ್ನಾಟಕದಿಂದ ಹೆಚ್ಚು ಟಿಕೆಟ್‌ ಗಳು ಬುಕ್‌ ಆಗಿದೆ ಎಂದು ವರದಿ ತಿಳಿಸಿದೆ.

ಪ್ಯಾನ್‌ ಇಂಡಿಯಾದಲ್ಲಿ ರಿಲೀಸ್‌ ಆಗಲಿರುವ ʼಸಲಾರ್ʼ ಹಿಂದಿ ಆವೃತ್ತಿಯ ಟಿಕೆಟ್‌ ಬುಕಿಂಗ್‌ ಭಾನುವಾರ (ಡಿ.17 ರಂದು) ಓಪನ್‌ ಆಗಿದೆ. ಅಂದಾಜು 6 ಲಕ್ಷ ಮೌಲ್ಯದ 2500 ಟಿಕೆಟ್‌ಗಳು ಹಿಂದಿಯಲ್ಲಿ ಮಾರಾಟವಾಗಿದೆ. ಒಟ್ಟಾರೆ ʼಸಲಾರ್‌ʼ ಪ್ರೀ ರಿಲೀಸ್‌ ಮಾರಾಟವು ತಮಿಳು, ತೆಲುಗು, ಕನ್ನಡ, ಮಲಯಾಳಂನಲ್ಲಿ ಸೇರಿ 1,151 ಪ್ರದರ್ಶನಗಳಿಗೆ ಅಂದಾಜು. 1.55 ಕೋಟಿ ರೂ.ಗಳಿಸಿದ್ದು, 75.8 ಸಾವಿರ ಟಿಕೆಟ್‌ಗಳು ಮಾರಾಟವಾಗಿದೆ ಎಂದು ವರದಿಯಾಗಿದೆ.‌

ಇದೇ ಡಿ.22 ರಂದು ಎರಡೂ ಸಿನಿಮಾಗಳು ತೆರೆಕಾಣಲಿದೆ.