ಮಗನ ಮೇಲೆ ಬಾಂಬ್ ಎಸೆದು ಕೊಲ್ಲಲು ಹೋದ ತಂದೆಯೇ ಸ್ಫೋಟಕ್ಕೆ ಬಲಿ

ನವದೆಹಲಿ: ಕಚ್ಛಾ ಬಾಂಬ್ ಎಸೆದು ಮಗನನ್ನೇ ಕೊಲ್ಲಲು ಹೊರಟಿದ್ದ ತಂದೆಯೇ ಸ್ಫೋಟಕ್ಕೆ ಬಲಿಯಾದ ಘಟನೆ ಉತ್ತರ ಕೋಲ್ಕತಾದ ಕಾಶಿಪುರ್ ರಸ್ತೆ ಸಮೀಪ ನಡೆದಿರುವುದಾಗಿ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ:ಪ್ರೇಮಿಗಳಲ್ಲಿ ವೈಮನಸ್ಸು: ಆತ್ಮಹತ್ಯೆಗೆ ಶರಣಾದ ಯುವತಿ

ಘಟನೆಯಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದ ತಂದೆ ಶೇಕ್ ಮಟ್ಲಾಬ್ ಮತ್ತು ಮಗನನ್ನು ಆರ್ ಜಿ ಕರ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಶೇಕ್ ಸಾವನ್ನಪ್ಪಿರುವುದಾಗಿ ವೈದ್ಯರು ಘೋಷಿಸಿದ್ದು, ಪುತ್ರ ಶೇಕ್ ನಜೀರ್ ಗೆ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ವರದಿ ತಿಳಿಸಿದೆ.

ಸ್ಥಳೀಯರ ಹೇಳಿಕೆ ಪ್ರಕಾರ, ಕುಡಿದ ಅಮಲಿನಲ್ಲಿ ಶೇಕ್ ಮಟ್ಲಾಬ್ (65) ಮನೆಗೆ ಬರುತ್ತಿದ್ದು, ಪ್ರತಿದಿನ ಜಗಳವಾಡುತ್ತಿದ್ದ. ಮಗ ನಜೀರ್ ಫ್ಯಾಕ್ಟರಿಯಲ್ಲಿ ಕೆಲಸ ಮಾಡುತ್ತಿದ್ದ. ಕೆಲಸ ಮುಗಿಸಿ ನಜೀರ್ ಮನೆಗೆ ವಾಪಸ್ ಆದ ನಂತರ ತಂದೆ ಮತ್ತು ಮಗನ ನಡುವೆ ವಾಗ್ವಾದ ಶುರುವಾಗಿತ್ತು ಎಂದು ತಿಳಿಸಿದ್ದಾರೆ.

ತೀವ್ರ ಆಕ್ರೋಶಗೊಂಡ ತಂದೆ ಕಚ್ಛಾ ಬಾಂಬ್ ಕೈಯಲ್ಲಿ ಹಿಡಿದು ದಾಳಿ ನಡೆಸಲು ಬಂದಾಗ ಮಗ ಅಪ್ಪನನ್ನು ತಡೆದಿದ್ದು, ಈ ಸಂದರ್ಭದಲ್ಲಿ ಬಾಂಬ್ ಕೆಳಗೆ ಬಿದ್ದು, ಸ್ಫೋಟಗೊಂಡಿತ್ತು.  ಘಟನೆಯಲ್ಲಿ ಅಪ್ಪ-ಮಗ ಇಬ್ಬರೂ ಗಂಭೀರವಾಗಿ ಗಾಯಗೊಂಡಿದ್ದರು. ನಂತರ ಇಬ್ಬರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಆದರೆ ತಂದೆ ತೀರಿ ಹೋಗಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.

ಬಾಂಬ್ ಸ್ಫೋಟದಿಂದ ಶೇಕ್ ನಜೀರ್ ಬೆರಳುಗಳು ಛಿದ್ರವಾಗಿ ಹೋಗಿದ್ದು, ಹೆಚ್ಚಿನ ಚಿಕಿತ್ಸೆಗಾಗಿ ಎಸ್ ಎಸ್ ಕೆಎಂ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ ಎಂದು ವರದಿ ಹೇಳಿದೆ.