ಕೇಂದ್ರ ವಿರುದ್ಧ ಔಷಧ ವ್ಯಾಪಾರಿಗಳ ಆಕ್ರೋಶ-ಪ್ರತಿಭಟನೆ

ಬೆಳಗಾವಿ: ಔಷಧ ಹಾಗೂ ಕಾಂತಿವರ್ಧಕ 1945ರ ಶೆಡ್ನೂಲ್‌ಕೆ ಕಾಯ್ದೆ ತಿದ್ದುಪಡಿಗೆ ಮುಂದಾಗಿರುವ ಕೇಂದ್ರ ಸರ್ಕಾರದ ಕ್ರಮ ಖಂಡಿಸಿ ಜಿಲ್ಲಾ ರಿಟೇಲ್‌ ಫಾರ್ಮಸಿ ಅಸೋಸಿಯೇಷನ್‌ ನೇತೃತ್ವದಲ್ಲಿ ಔಷಧಿಅಂಗಡಿಗಳ ಮಾಲೀಕರು ಶುಕ್ರವಾರ ಪ್ರತಿಭಟನೆ ನಡೆಸಿದರು.

ಜಿಲ್ಲಾಧಿಕಾರಿ ಕಚೇರಿ ಎದುರು ಪ್ರತಿಭಟನೆ ನಡೆಸಿ ಜಿಲ್ಲಾಧಿಕಾರಿ ಮೂಲಕ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯಕ್ಕೆ ಮನವಿ ರವಾನಿಸಿದ ಪ್ರತಿಭಟನಾಕಾರರು, ಕೇಂದ್ರ ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ, ಕಾಯ್ದೆಗೆ ತಿದ್ದುಪಡಿ ತರುವ ಮೂಲಕ ಅಂಗನವಾಡಿ ಕಾರ್ಯಕರ್ತೆಯರಿಗೆ ಔಷಧ ಮಾರಾಟ ಮಾಡುವ ಅಧಿಕಾರ ನೀಡಲು ಕೇಂದ್ರ ಮುಂದಾಗಿರುವುದು ಸರಿಯಲ್ಲ ಎಂದು ದೂರಿದರು.

1948ರ ಕಾಯ್ದೆ ಪ್ರಕಾರ ಔಷಧಗಳನ್ನು ಫಾರ್ಮಸಿಗಳು ಮಾತ್ರ ನೀಡಬೇಕು. ಆದರೆ ಏನೂ ಗೊತ್ತಿಲ್ಲದವರಿಗೆ ಔಷಧ ಮಾರಾಟ ಮಾಡಲು ಅವಕಾಶ ನೀಡಿದರೆ ರೋಗಿಗಳಿಗೆ ತೊಂದರೆಯಾಗಲಿದೆ. ಏನಾದರೂ ಹೆಚ್ಚು ಕಡಿಮೆಯಾದರೆ ಯಾರು ಹೊಣೆ? ರೋಗಿಗಳ ಜೀವದೊಂದಿಗೆ ಚೆಲ್ಲಾಟ ಆಡುತ್ತಿರುವುದು ಎಷ್ಟರ ಮಟ್ಟಿಗೆ ಸರಿ. ಇಂಥ ಕಾಯ್ದೆಗಳಿಗೆ ಜನರಿಗೆ ತೊಂದರೆ ನೀಡಿದಂತಾಗುತ್ತದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಅಧ್ಯಕ್ಷ ನಂದಕಿಶೋರ ಸಾರಸ್ವತ, ವಿನೋದ ಕೋಳಿವಾಡ, ವಿಜಯ ಸಾಣಿಕೊಪ್ಪ, ಶೈಲೇಂದ್ರ ಜೈನ, ರೋಹಿತ ಸವಾಗುಂಜಿ, ಮಹೇಶಗೌಡ ಪಾಟೀಲ, ಮಹೇಶ ಬೀಳಗಿ, ಪವನ ದೇಸಾಯಿ ಇತರರು ಇದ್ದರು.