ಗ್ರಾಪಂನಿಂದ ಬಟ್ಟೆ ಬ್ಯಾಗ್‌ ವಿತರಣೆ

ಚನ್ನಪಟ್ಟಣ: ಸ್ವಚ್ಛ ಶುಕ್ರವಾರದ ಅಂಗವಾಗಿ ತಾಲೂಕಿನ ಚಕ್ಕೆರೆ ಗ್ರಾಮದಲ್ಲಿ ಪಂಚಾಯ್ತಿ ವತಿಯಿಂದ ಪ್ರತಿ ಮನೆಗೆ ಉಚಿತವಾಗಿ ಬಟ್ಟೆಯ ಬ್ಯಾಗ್‌ ವಿತರಣೆ ಮಾಡಲಾಯಿತು.

ಚಕ್ಕೆರೆ ಗ್ರಾಪಂ ಅಭಿವೃದ್ಧಿ ಅಧಿಕಾರಿ ಯತೀಶ್‌ ಚಂದ್ರ ಹಾಗೂ ಸಿಬ್ಬಂದಿ ಮನೆ ಮನೆಗೆ ತೆರಳಿ ಪ್ಲಾಸ್ಟಿಕ್‌ ಮುಕ್ತ ಅಭಿಯಾನದಡಿ ಜನರಿಗೆ ಉಚಿತ ಬಟ್ಟೆ ಬ್ಯಾಗ್‌ ವಿತರಣೆ ಮಾಡಿದರು. ಪಿಡಿಒ ಯತೀಶ್‌ ಚಂದ್ರ ಮಾತನಾಡಿ, ಇತ್ತೀಚಿ ನಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಪ್ಲಾಸ್ಟಿಕ್‌ ಬಳಕೆ ಹೆಚ್ಚಾಗುತ್ತಿದೆ. ಪ್ಲಾಸ್ಟಿಕ್‌ ಬಳಕೆಯಿಂದಾಗಿ ಪರಿಸರಕ್ಕೆ ಹೆಚ್ಚಿನ ಹಾನಿ ಆಗುತ್ತಿರುವುದರಿಂದ ಪ್ರತಿ ಮನೆ ಗಳಿಗೂ ಬಟ್ಟೆ ಬ್ಯಾಗ್‌ ಕೊಡಬೇಕು ಎಂದು ನಿರ್ಧಾರ ಮಾಡಿ ವಿತರಣೆ ಮಾಡಲಾಗಿದೆ ಎಂದು ತಿಳಿಸಿದರು.

ಗ್ರಾಮಸ್ಥರು ಯಾವುದೇ ವಸ್ತು ಖರೀದಿ ಮಾಡಲು ಹೋಗುವಾಗ ಬಟ್ಟೆ ಬ್ಯಾಗುಗಳನ್ನೇ ಬಳಸಬೇಕು, ಪ್ಲಾಸ್ಟಿಕ್‌ ಕವರ್‌ ತಿರಸ್ಕರಿಸಬೇಕು ಎಂದರು. ಈ ಬ್ಯಾಗ್‌ಗಳನ್ನು ಖರೀದಿ ಮಾಡಲು ಪಂಚಾಯ್ತಿ ಸದಸ್ಯರ ಒಪ್ಪಿಗೆ ಮೇರೆಗೆ ಅವರ ಗೌರವಧನ ಹಾಗೂ ಪಂಚಾಯ್ತಿ ತೆರಿಗೆ ಮೊತ್ತದಿಂದ ವೆಚ್ಚ ಮಾಡಲಾಗಿದೆ ಎಂದು ತಿಳಿಸಿದರು. ಕಾರ್ಯದರ್ಶಿ ರಮೇಶ್‌, ಸಿಬ್ಬಂದಿಗಳಾದ ನಾಗರಾಜು, ಯೋಗೀಶ್‌ ಮತ್ತಿತರರಿದ್ದರು.