Diamond League Finals: ನೀರಜ್ ಚೋಪ್ರಾಗೆ 2ನೇ ಸ್ಥಾನ

 

ಅಮೆರಿಕಾ: ವಿಶ್ವಖ್ಯಾತಿಯ ಜಾವೆಲಿನ್‌ ತಾರೆ ನೀರಜ್‌ ಚೋಪ್ರಾ ಡೈಮಂಡ್ ಲೀಗ್ ಫೈನಲ್‌ನಲ್ಲಿ 83.80 ಮೀಟರ್ ದೂರ ಜಾವೆಲಿನ್‌ ಎಸೆಯುವ ಮೂಲಕ ಎರಡನೇ ಸ್ಥಾನವನ್ನು ಪಡೆದುಕೊಂಡರು.

ಸೆ.16ರ ಶನಿವಾರ ಅಮೇರಿಕಾದ ಯುಜೀನ್‌ನಲ್ಲಿ ನಡೆದ ಡೈಮಂಡ್ ಲೀಗ್ ಫೈನಲ್‌ ಪಂದ್ಯದ ವೇಳೆ ಹಾರ್ವರ್ಡ್‌ ಅಂಗಳದಲ್ಲಿ ಸ್ಪರ್ಧೆ ನಡೆಯುತ್ತಿದ್ದ ವೇಳೆ ಗಾಳಿ ಬಲವಾಗಿ ಬೀಸಿದ್ದರಿಂದ ಚೋಪ್ರಾ ಪ್ರದರ್ಶನಕ್ಕೆ ಅಡ್ಡಿಯಾಯಿತು.

ನೀರಜ್‌ ಚೋಪ್ರಾ ಮೊದಲ ಪ್ರಯತ್ನದಲ್ಲಿ ಫೌಲ್‌ ಆದರು. ಎರಡನೇ ಪ್ರಯತ್ನದಲ್ಲಿ 83.80 ಮೀ ದೂರಕ್ಕೆ ಜಾವೆಲಿನ್‌ ಎಸೆದರು. ಮೂರನೇ ಎಸೆತದಲ್ಲಿ 81.37 ಮೀ ದೂರಕ್ಕೆ ಜಾವೆಲಿನ್‌ ಎಸೆದರು.

ಆ ಮೂಲಕ ಎರಡನೇ ಸ್ಥಾನಕ್ಕೆ ತೃಪ್ತಿ ಪಟ್ಟು ಡೈಮಂಡ್ ಲೀಗ್‌ ಚಾಂಪಿಯನ್‌ ಪಟ್ಟ ಉಳಿಸಿಕೊಳ್ಳುವಲ್ಲಿ ವಿಫಲರಾದರು.

ಜೆಕ್ ರಿಪಬ್ಲಿಕ್‌ನ ವಾಡ್ಲೆಜ್‌ ಫೈನಲ್‌ನಲ್ಲಿ 84.24 ಮೀಟರ್‌ಗಳ ಅತ್ಯುತ್ತಮ ಪ್ರಯತ್ನದಿಂದ ಡೈಮಂಡ್ ಟ್ರೋಫಿ ಗೆದ್ದು, ಫಿನ್‌ಲ್ಯಾಂಡ್ ನ ಆಲಿವರ್ ಹೆಲ್ಯಾಂಡರ್ 83.74 ಮೀಟರ್‌ಗಳ ಅತ್ಯುತ್ತಮ ಎಸೆತದೊಂದಿಗೆ 3 ನೇ ಸ್ಥಾನ ಪಡೆದರು.

2022 ರಲ್ಲಿ ನಡೆದ ಡೈಮಂಡ್ ಲೀಗ್ ಫೈನಲ್‌ ನಲ್ಲಿ 88.44 ಮೀ. ದೂರ ಜಾವೆಲಿನ್‌ ಎಸೆಯುವ ಮೂಲಕ ನೀರಜ್‌ ಪ್ರಶಸ್ತಿ ಪಡೆದುಕೊಂಡಿದ್ದರು.