ಟ್ವೆಂಟಿ20ಯಲ್ಲಿ  6,000 ರನ್‌: ಧೋನಿ ಭಾರತದ ಐದನೇ ಆಟಗಾರ

ಮುಂಬಯಿ: ಯಶಸ್ವಿ ನಾಯಕ ಎಂಎಸ್‌ ಧೋನಿ ತನ್ನ ಮಹೋನ್ನತ ಕ್ರಿಕೆಟ್‌ ಬಾಳ್ವೆಯಲ್ಲಿ ಇನ್ನೊಂದು ಗರಿ ಸೇರಿಸಿಕೊಂಡಿದ್ದಾರೆ. ಟ್ವೆಂಟಿ20 ಕ್ರಿಕೆಟ್‌ನಲ್ಲಿ 6,000 ರನ್‌ ಪೂರ್ತಿಗೊಳಿಸುವ ಮೂಲಕ ಧೋನಿ ಈ ಸಾಧನೆ ಮಾಡಿದರು.  ದಿಲ್ಲಿಯಲ್ಲಿ ಡೆಲ್ಲಿ ಡೇರ್‌ ಡೆವಿಲ್ಸ್‌ ವಿರುದ್ಧ ನಡೆದ ಪಂದ್ಯದಲ್ಲಿ ಧೋನಿ ಈ ಸಾಧನೆ ಬರೆದರು. 

ಧೋನಿ ಟ್ವೆಂಟಿ20ರಲ್ಲಿ 6,000 ರನ್‌ ಪೂರ್ತಿಗೊಳಿಸಿದ ಭಾರತದ ಐದನೇ ಆಟಗಾರರಾಗಿದ್ದಾರೆ. ಈ ಮೊದಲು ಸುರೇಶ್‌ ರೈನಾ (7,708), ವಿರಾಟ್‌ ಕೊಹ್ಲಿ (7,621), ರೋಹಿತ್‌ ಶರ್ಮ (7,303) ಮತ್ತು ಗೌತಮ್‌ ಗಂಭೀರ್‌ (6,402) ಈ ಸಾಧನೆ ಮಾಡಿದ್ದರು.ಡೆಲ್ಲಿ ವಿರುದ್ಧದ ಪಂದ್ಯ ಮೊದಲು ಧೋನಿಗೆ 6,000 ಕ್ಲಬ್‌ಗ
ಸೇರಲು 10 ರನ್‌ ಬೇಕಿತ್ತು. ಟ್ರೆಂಟ್‌ ಬೌಲ್ಟ್ ದಾಳಿಗೆ ಔಟಾಗುವ ಮೊದಲು ಅವರು 17 ರನ್‌ ಗಳಿಸಿದ್ದರು. 36ರ ಹರೆಯದ ಧೋನಿ 290 ಟ್ವೆಂಟಿ20 ಪಂದ್ಯಗಳನ್ನಾಡಿದ್ದು 6,007 ರನ್‌ ಗಳಿಸಿದ್ದಾರೆ.

ಗೇಲ್‌ ನಂಬರ್‌ ವನ್‌
ವೆಸ್ಟ್‌ಇಂಡೀಸ್‌ನ ಸ್ಫೋಟಕ ಆಟಗಾರ ಕ್ರಿಸ್‌ ಗೇಲ್‌ ಟ್ವೆಂಟಿ20ಯಲ್ಲಿ ಗರಿಷ್ಠ ರನ್‌ ಗಳಿಸಿದವರಲ್ಲಿ ನಂಬರ್‌ ವನ್‌ ಸ್ಥಾನದಲ್ಲಿದ್ದಾರೆ. ಟ್ವೆಂಟಿ20ಯಲ್ಲಿ ಜಮೈಕಾದ ಗೇಲ್‌ 21 ಶತಕ ಮತ್ತು 50 ಅರ್ಧಶತಕ ಸಹಿತ 11,436 ರನ್‌ ಗಳಿಸಿದ್ದಾರೆ. ನ್ಯೂಜಿಲ್ಯಾಂಡಿನ ಬ್ರೆಂಡನ್‌ ಮೆಕಲಮ್‌ ದ್ವಿತೀಯ ಸ್ಥಾನದಲ್ಲಿದ್ದಾರೆ. ಅವರು 335 ಪಂದ್ಯಗಳನ್ನಾಡಿದ್ದು 30.70 ಸರಾಸರಿಯೊಂದಿಗೆ 9,119 ರನ್‌ ಪೇರಿಸಿದ್ದಾರೆ.