ರನ್ ಶಿಖರವೇರಿದ ಧವನ್: ಸುರೇಶ್ ರೈನಾ ದಾಖಲೆ ಮುರಿದ ಗಬ್ಬರ್

ಅಹಮದಾಬಾದ್: ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಸುಲಭ ಜಯ ಗಳಿಸಿದೆ. ಆರಂಭಿಕರಾದ ಪೃಥ್ವಿ ಶಾ ಮತ್ತು ಶಿಖರ್ ಧವನ್ ಭರ್ಜರಿ ಬ್ಯಾಟಿಂಗ್ ಕಾರಣದಿಂದ ಕೆಕೆಆರ್ ನೀಡಿದ್ದ ಸವಾಲನ್ನು ಪಂತ್ ಹುಡುಗರು ಅನಾಯಾಸವಾಗಿ ಜಯಿಸಿದರು.

ಶಿಖರ್ ಧವನ್ 46 ರನ್ ಗಳಿಸಿ ಪ್ಯಾಟ್ ಕಮಿನ್ಸ್ ಗೆ ವಿಕೆಟ್ ಒಪ್ಪಿಸಿದರು. ಆದರೆ ಇದೇ ವೇಳೆ ಧವನ್ ಹೊಸ ದಾಖಲೆಯೊಂದನ್ನು ಬರೆದರು. ಐಪಿಎಲ್ ನಲ್ಲಿ ಅತೀ ಹೆಚ್ಚು ರನ್ ಗಳಿಸಿದವರ ಪಟ್ಟಿಯಲ್ಲಿ ಧವನ್ ಎರಡನೇ ಸ್ಥಾನಕ್ಕೆ ಏರಿದರು.

ಇದನ್ನೂ ಓದಿ:ಪೃಥ್ವಿ ಶಾ ಬೌಂಡರಿಗೆ ಬೆಚ್ಚಿದ ಕೆಕೆಆರ್‌

ಇದುವರೆಗೆ ಸುರೇಶ್ ರೈನಾ ಎರಡನೇ ಸ್ಥಾನದಲ್ಲಿದ್ದರು. ರೈನಾ 5489 ರನ್ ಗಳಿಸಿದ್ದಾರೆ. ಗುರುವಾರದ ಪಂದ್ಯದ ವೇಳೆ ಧವನ್ ಈ ದಾಖಲೆ ಮುರಿದರು. ಧವನ್ ಸದ್ಯ 5508 ರನ್ ಗಳಿಸಿದ್ದಾರೆ. ಮೊದಲ ಸ್ಥಾನದಲ್ಲಿರುವ ಆರ್ ಸಿಬಿ ನಾಯಕ ವಿರಾಟ್ ಕೊಹ್ಲಿ 6041 ರನ್ ಗಳಿಸಿದ್ದಾರೆ.

ಶಿಖರ್ ಧವನ್ ಈ ಋತುವಿನಲ್ಲಿ 311 ರನ್ ಗಳೊಂದಿಗೆ ಆರೆಂಜ್ ಕ್ಯಾಪ್ ಹೊಂದಿದ್ದಾರೆ. ಕೆಕೆಆರ್ ವಿರುದ್ಧ ಶಾ ಜೊತೆಗೂಡಿ ಧವನ್ 132 ರನ್ ಜೊತೆಯಾಟವಾಡಿದರು.