ಬೆಂಗಳೂರು: ಕೈಗಾರಿಕೆಗಳು ಉಗುಳುವ ಹೊಗೆಯನ್ನು ನೀವು ವೈಜ್ಞಾನಿಕವಾಗಿ ಹಿಡಿದಿಟ್ಟರೆ, ನಿತ್ಯ ಅದರಿಂದ ಲಕ್ಷಾಂತರ ರೂಪಾಯಿ ಗಳಿಸಬಹುದು! ಇದು ನ್ಯಾನೋ ತಂತ್ರಜ್ಞಾನದ ಚಮತ್ಕಾರ ಜಾಗತಿಕ ಮಟ್ಟದಲ್ಲಿ ದೊಡ್ಡ ಸಮಸ್ಯೆಯಾಗಿ ಕಾಡುತ್ತಿರುವ ಶಾಖೋತ್ಪನ್ನ ಘಟಕಗಳು, ಬೃಹತ್ ಕೈಗಾರಿಕೆಗಳು ಉಗುಳುವ ಹಾಗೂ ಕೃಷಿ ತ್ಯಾಜ್ಯ ಸುಡುವುದರಿಂದ ಹೊರಹೊಮ್ಮುವ ಹೊಗೆಯನ್ನು ಆದಾಯದ ಮೂಲವಾಗಿ ಪರಿವರ್ತಿಸುವ ತಂತ್ರಜ್ಞಾನವನ್ನು ಮೊಹಾಲಿಯ ಇನ್‌ಸ್ಟಿಟ್ಯೂಟ್‌ ಆಫ್ ನ್ಯಾನೊ ಸೈನ್ಸ್‌ ಟೆಕ್ನಾಲಜಿ (ಐಎನ್‌ಎಸ್‌ಟಿ) ಅಭಿವೃದ್ಧಿಪಡಿಸಿದ್ದು, ಈಗಾಗಲೇ ಇದರ ಪ್ರಯೋಗ ಕೂಡ ನಡೆಸಿದೆ. ಬೆಂಗಳೂರು ಇಂಡಿಯಾ ನ್ಯಾನೊದಲ್ಲಿ ಇದನ್ನು ಕಾಣಬಹುದು.
ಈ ಮೂಲಗಳಿಂದ ಬರುವ ಅನಿಲವನ್ನು ಹಿಡಿದಿಟ್ಟು, ವೈಜ್ಞಾನಿಕವಾಗಿ ಸಂಸ್ಕರಿಸಿದಾಗ ಸೋಡಿಯಂ ಕಾರ್ಬೋನೇಟ್‌ ಉತ್ಪತ್ತಿಯಾಗುತ್ತದೆ. ಸಾಮಾನ್ಯವಾಗಿ ಡಿಟರ್ಜಂಟ್‌ ಪೌಡರ್‌, ದ್ರವ ಅಥವಾ ಸೋಪು ತಯಾರಿಕೆಗೆ ಇದನ್ನು ಬಳಸಲಾಗುತ್ತದೆ. ಅಪ್ಪಟ ನ್ಯಾನೊ ಸೋಡಿಯಂ ಕಾರ್ಬೋನೇಟ್‌ಗೆ ಮಾರುಕಟ್ಟೆಯಲ್ಲಿ ಭಾರಿ ಬೇಡಿಕೆ ಇದ್ದು, ಒಂದು ಕೆ.ಜಿಗೆ 90ರಿಂದ 95 ಸಾವಿರ ರೂ. ಆಗುತ್ತದೆ. ಆದರೆ, ಈ ಪ್ರಕ್ರಿಯೆಗೆ 15-16 ಸಾವಿರ ರೂ. ಖರ್ಚಾಗುತ್ತದೆ. ಒಂದು ವೇಳೆ ನೂರಾರು ಕೈಗಾರಿಕೆಗಳಲ್ಲಿ ಇದನ್ನು ಅಳವಡಿಸಿದರೆ, ಅನಾಯಾಸವಾಗಿ ಲಕ್ಷಾಂತರ ರೂ. ಗಳಿಸಬಹುದು ಎಂದು ಐಎನ್‌ಎಸ್‌ಟಿಯ ಡಾ.ಸುಜಿತ್‌ ವಿವರಿಸುತ್ತಾರೆ.
ಪಂಜಾಬ್‌ ಸರ್ಕಾರ, ಎನ್‌ಟಿಪಿಸಿ ಆಸಕ್ತಿ: ಪಂಜಾಬ್‌ನಲ್ಲಿ ಕೃಷಿ ತ್ಯಾಜ್ಯ ಸುಡುವುದರಿಂದ ಹೊರಹೊಮ್ಮುವ ಹೊಗೆ ಸ್ಥಳೀಯವಾಗಿ ಸಾಕಷ್ಟು ಸಮಸ್ಯೆಗೆ ಕಾರಣವಾಗುತ್ತಿದೆ. ಆದ್ದರಿಂದ ಅಲ್ಲಿನ ಸರ್ಕಾರವು ಇಂತಹದ್ದೊಂದು ಸಂಸ್ಕರಣಾ ಘಟಕ ಸ್ಥಾಪನೆಗೆ ಆಸಕ್ತಿ ತೋರಿಸಿದ್ದು, ಶೀಘ್ರದಲ್ಲೇ ಘಟಕ ತಲೆಯೆತ್ತಲಿದೆ. ಜತೆಗೆ ಉತ್ತರ ಪ್ರದೇಶದ ದಾದ್ರಿಯಲ್ಲಿನ ರಾಷ್ಟ್ರೀಯ ಶಾಖೋತ್ಪನ್ನ ವಿದ್ಯುತ್‌ ನಿಗಮ (ಎನ್‌ಟಿಪಿಸಿ) ಕೂಡ ಮುಂದೆಬಂದಿದೆ ಎಂದೂ ಡಾ.ಸುಜಿತ್‌ ಮಾಹಿತಿ ನೀಡಿದರು.
ಅಂದಹಾಗೆ, ದೆಹಲಿ ಸುತ್ತಲಿನ ಪ್ರದೇಶಗಳಲ್ಲಿ ಈ ಕೃಷಿ ತ್ಯಾಜ್ಯ ಸುಡುವುದರಿಂದ ಆಗಾಗ್ಗೆ ವಾಯುಮಾಲಿನ್ಯ ಉಂಟಾಗುತ್ತಿದ್ದು, ಅಂತಹ ಕಡೆಗಳಲ್ಲೂ ಈ ತಂತ್ರಜ್ಞಾನ ಪ್ರಯೋಜನಕಾರಿ ಆಗಲಿದೆ. ಒಂದೆಡೆ ವಾಯುಮಾಲಿನ್ಯಕ್ಕೆ ಕಾರಣವಾದ ಹೊಗೆಗೆ ಈ ತಂತ್ರಜ್ಞಾನದಿಂದ ಮುಕ್ತಿ ಸಿಕ್ಕರೆ, ಮತ್ತೂಂದೆಡೆ ಕಡಿಮೆ ಡಿಟರ್ಜಂಟ್‌ ಬಳಕೆ ಮಾಡುವುದರಿಂದಲೂ ನೀರು ಕಲುಷಿತಗೊಳ್ಳುವುದು ಕಡಿಮೆ ಆಗುತ್ತದೆ ಎಂದು ತಜ್ಞರು ವಿಶ್ಲೇಷಿಸುತ್ತಾರೆ.
ಅನಿಲದಲ್ಲಿ ಏನಿರುತ್ತೆ?: ಕಲ್ಲಿದ್ದಲು ಅಥವಾ ಕೃಷಿ ತ್ಯಾಜ್ಯವನ್ನು ಸುಟ್ಟಾಗ, ಅದರಿಂದ ಹೊರಹೊಮ್ಮುವ ಅನಿಲದಲ್ಲಿ ಸಾರಜನಕ, ಗಂಧಕ, ಇಂಗಾಲದ ಅಂಶಗಳು ಇರುತ್ತವೆ. ಇವು ವಾಯುಮಾಲಿನ್ಯಕ್ಕೆ ಮಾರಕ. ಆದರೆ, ಈ ಅನಿಲದಲ್ಲಿನ ನ್ಯಾನೋ ಕಣಗಳನ್ನು ಹೀರಿಕೊಂಡು, ಸಂಸ್ಕರಿಸಿದಾಗ ದ್ರವ ರೂಪಕ್ಕೆ ಪರಿವರ್ತನೆ ಆಗುತ್ತದೆ. ಅದೇ ನಂತರದಲ್ಲಿ ಸೋಡಿಯಂ ಕಾರ್ಬೋನೇಟ್‌ ಆಗುತ್ತದೆ. ಸಾಮಾನ್ಯ ಡಿಟರ್ಜಂಟ್‌ನಲ್ಲಿರುವ ಸೋಡಿಯಂ ಕಾರ್ಬೋನೇಟ್‌ಗಿಂತ ಇದು ಹೆಚ್ಚು ಪರಿಣಾಮಕಾರಿಯಾಗಿದೆ. ಹಾಗಾಗಿ, ಹತ್ತು ಗ್ರಾಂ ಸಾಮಾನ್ಯ ಡಿಟರ್ಜಂಟ್‌ ಬದಲಿಗೆ, ಈ ನ್ಯಾನೋ ತಂತ್ರಜ್ಞಾನದಲ್ಲಿ ಹೊರಬಂದ ಸೋಡಿಯಂ ಕಾರ್ಬೋನೇಟ್‌ ಒಂದು ಗ್ರಾಂಗಿಂತ ಕಡಿಮೆ ಬಳಸಿದರೂ ಸಾಕು ಎಂದು ಅವರು ಹೇಳಿದರು.
ಶಾಖೋತ್ಪನ್ನ ಘಟಕಗಳಿಂದ ಹೊರಹೊಮ್ಮುವ ಅನಿಲವನ್ನು ಸೋಡಿಯಂ ಕಾರ್ಬೋನೇಟ್‌ ಆಗಿ ಪರಿವರ್ತಿಸುವಲ್ಲಿ ವಿವಿಧ ಐಐಐಟಿ ಮತ್ತಿತರ ಸಂಶೋಧನಾ ಸಂಸ್ಥೆಗಳು ನಿರತವಾಗಿವೆ. ಆದರೆ, ಕೈಗಾರಿಕೆಯಲ್ಲಿ ಇದರ ಪ್ರಯೋಗ ಮೊದಲ ಬಾರಿಗೆ ಐಎನ್‌ಎಸ್‌ಟಿ ಮಾಡುತ್ತಿದೆ. ಈ ಸಂಸ್ಕರಣಾ ಪ್ರಕ್ರಿಯೆಗಾಗಿ ಪ್ರತ್ಯೇಕ ಮಾದರಿ (ಪ್ರೋಟೋಟೈಪ್‌) ಯನ್ನು ಸಿದ್ಧಪಡಿಸಲಾಗಿದೆ. ಈಗಾಗಲೇ ಸ್ಥಳೀಯ ಕುಮಾರ್‌ ಸೋಪ್‌ ಆಂಡ್‌ ಡಿಟರ್ಜಂಟ್‌ ಕಂಪೆನಿ ನಮ್ಮೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದು, ಇತ್ತೀಚೆಗೆ ಒಂದು ಕೆಜಿ ಸೋಡಿಯಂ ಕಾರ್ಬೋನೇಟ್‌ ಪೂರೈಸಲಾಗಿದೆ.
* ವಿಜಯಕುಮಾರ್‌ ಚಂದರಗಿ
