ದೇವರ ವಿಗ್ರಹಗಳನ್ನು ಕದಿಯುತ್ತಿದ್ದ ಖತರ್ನಾಕ್ ಕಳ್ಳಿಯ ಬಂಧನ

ಕಲಬುರಗಿ: ನಗರದಲ್ಲಿ ಬೆಳ್ಳಿಯ ದೇವರ ವಿಗ್ರಹಗಳನ್ನು ಕಳ್ಳತನ ಮಾಡುತ್ತಿದ್ದ ಮಹಿಳೆಯೊಬ್ಬಳನ್ನು ಎಂ.ಬಿ. ನಗರ ಠಾಣೆ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ತಾಲೂಕಿನ ಫರಹತಾಬಾದ್ ಗ್ರಾಮದ ಬಸಮ್ಮ ನಂದಿಕೂರ ಬಂಧಿತ ಮಹಿಳೆ. 2.62 ಲಕ್ಷ ರೂ. ಮೌಲ್ಯದ ಬೆಳ್ಳಿಯ ವಿಗ್ರಹಗಳನ್ನು ‌ಕಳ್ಳತನ ಮಾಡಿದ್ದಳು‌ ಎಂದು ನಗರ ಪೊಲೀಸ್ ಆಯುಕ್ತ ‌ಎಂ.ಎನ್.ನಾಗರಾಜ‌ ತಿಳಿಸಿದರು.

ಕಳೆದ ಒಂದು ತಿಂಗಳಿಂದ ನಾಲ್ಕು ಮನೆಗಳಲ್ಲಿ ಕಳ್ಳತನ ಮಾಡಿದ್ದಳು. ನೀರು ಕೇಳುವ ನೆಪದಲ್ಲಿ ಮನೆಗಳಿಗೆ ವಿಗ್ರಹಗಳನ್ನು ‌ಕಳ್ಳತನ ಮಾಡುತ್ತಿದ್ದಳು. ಮರುದಿನ ಪೂಜೆ ಮಾಡುವಾಗಲೇ ವಿಗ್ರಹಗಳು ಕಳ್ಳತನವಾಗಿದ್ದು ಮಾಲೀಕರ ಗಮನಕ್ಕೆ ಬರುತ್ತಿತ್ತು.

ದೇವರ ವಿಗ್ರಹಗಳನ್ನು ಕದ್ದರೆ ಸಿಕ್ಕಿ ಬೀಳುವುದಿಲ್ಲ ಎಂಬ ನಂಬಿಕೆಯಿಂದ ಕಳ್ಳತನದಲ್ಲಿ ತೊಡಗಿದ್ದಳು ಎಂದು ತನಿಖೆ ವೇಳೆ ತಿಳಿದು ಬಂದಿದೆ ಎಂದು ಹೇಳಿದರು.

ಕಳ್ಳತನ ಮಾಡುವ ದೃಶ್ಯ ದೃಶ್ಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಎಂ.ಬಿ.ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.