ಟೋಕಿಯೊ ಒಲಿಂಪಿಕ್ಸ್‌ ರದ್ದುಗೊಳಿಸಿ : ಮಾಧ್ಯಮದಿಂದಲೇ ಮನವಿ

ಟೋಕಿಯೊ : ಮುಂದಿನ ತಿಂಗಳು ಆರಂಭಗೊಳ್ಳಲಿರುವ ಟೋಕಿಯೊ ಒಲಿಂಪಿಕ್ಸ್‌ ಮತ್ತು ಪ್ಯಾರಾಲಿಂಪಿಕ್ಸ್‌ ಕ್ರೀಡಾಕೂಟಗಳನ್ನು ರದ್ದುಪಡಿಸುವಂತೆ ಕ್ರೀಡಾಕೂಟದ ಅಧಿಕೃತ ಮಾಧ್ಯಮ ಪಾಲುದಾರ ಸಂಸ್ಥೆಗಳಲ್ಲಿ ಒಂದಾದ “ಅಸಾಹಿ ಶಿಂಬುನ್‌’ ಒತ್ತಾಯಿಸಿದೆ.

“ಕೋವಿಡ್‌ ಸಾಂಕ್ರಾಮಿಕ ಭೀತಿಯ ನಡುವೆ ದೇಶದ ನಾಗರಿಕರ ಸುರಕ್ಷತೆ ಮತ್ತು ಆರೋಗ್ಯ ವ್ಯವಸ್ಥೆ ಮೇಲಿನ ಒತ್ತಡ ನಿವಾರಿಸಲು ಕ್ರೀಡಾಕೂಟವನ್ನು ರದ್ದುಗೊಳಿಸುವುದೇ ಸೂಕ್ತ’ ಎಂದು ಪ್ರಧಾನಿ ಯೊಶಿಹಿಡೆ ಸುಗಾ ಅವರಿಗೆ ಪತ್ರ ಬರೆದಿದೆ.

“ಇಂಥ ಸಂದರ್ಭದಲ್ಲಿ ಒಲಿಂಪಿಕ್ಸ್‌ ನಡೆಸುವುದು ದೊಡ್ಡ ಗ್ಯಾಂಬ್ಲಿಂಗ್‌ ಎನಿಸುತ್ತದೆ. ಇಲ್ಲಿ ಪಾಲ್ಗೊಳ್ಳುವ ಪ್ರತಿಯೊಬ್ಬರಿಗೂ ಸುರಕ್ಷತೆ ನೀಡುವುದು ಸಂಘಟಕರಿಗೆ ಸಾಧ್ಯವಾಗದು. ಸಾರ್ವಜನಿಕರ ಅಭಿಪ್ರಾಯ ಕೂಡ ಒಲಿಂಪಿಕ್ಸ್‌ಗೆ
ವಿರೋಧವಾಗಿಯೇ ಇದೆ’ ಎಂದು ಶಿಂಬುನ್‌ ಉಲ್ಲೇಖೀಸಿದೆ. ಒಲಿಂಪಿಕ್‌ ಸಮಿತಿಯ ಉಪಾಧ್ಯಕ್ಷ ಜಾನ್‌ ಕೋಟ್ಸ್‌ ಅವರಿಗೂ ಮನವಿ ಸಲ್ಲಿಸಿದೆ. ಒಂದು ವೇಳೆ ಒಲಿಂಪಿಕ್ಸ್‌ ರದ್ದುಗೊಂಡರೆ ಆಗ ಜಪಾನ್‌ 1.8 ಟ್ರಿಲಿಯನ್‌ ಯೆನ್‌ (16.6 ಬಿಲಿಯನ್‌ ಡಾಲರ್‌) ನಷ್ಟಕ್ಕೊಳಗಾಗಲಿದೆ.