ನವದೆಹಲಿ: ಮಹಿಳೆಯ ಹಲ್ಲು ಮುರಿದಿದ್ದಾರೆ ಎಂಬ ಆರೋಪಕ್ಕೆ ಗುರಿಯಾಗಿದ್ದ ಏಳು ಮಂದಿಯನ್ನು ದೆಹಲಿಯ ಸ್ಥಳೀಯ ಕೋರ್ಟ್ ಸೋಮವಾರ ಖುಲಾಸೆ ಮಾಡಿದೆ. ಮಹಿಳೆ ಏಳು ಮಂದಿ ತನ್ನ ಮೇಲೆ ಹಲ್ಲೆ ಮಾಡಿ ಹಲ್ಲು ಮುರಿದಿದ್ದರು ಎಂದು ಆಪಾದಿಸಿದ್ದರು.
ವಿಚಾರಣೆ ವೇಳೆ ಮುರಿದು ಹೋಗಿದ್ದ ಹಲ್ಲನ್ನು ಕೋರ್ಟಿಗೆ ಒದಗಿಸಲು ಮಹಿಳೆ ವಿಫ‌ಲರಾದ ಹಿನ್ನೆಲೆಯಲ್ಲಿ 7 ಮಂದಿಯನ್ನು ಬಿಡುಗಡೆ ಮಾಡಿ ಆದೇಶಿಸಿದೆ.
ಘಟನೆ ಹಿನ್ನೆಲೆ: ಕ್ಷುಲಕ್ಕ ಕಾರಣಕ್ಕಾಗಿ 2006ರ ಮೇ 17 ರಂದು ದೆಹಲಿಯ ಕೊಟ್ಲ ಮುಬಾರಕ್‌ ಪ್ರದೇಶದಲ್ಲಿ ಮಹಿಳೆ ಮತ್ತು ಒಂದು ಕುಟುಂಬದ ನಡುವೆ ಮಾರಾಮಾರಿ ನಡೆದಿತ್ತು. ಘರ್ಷಣೆಯಲ್ಲಿ ತನ್ನ ಎರಡು ಹಲ್ಲುಗಳು ಮುರಿದಿವೆ ಎಂದು 7 ಮಂದಿ ವಿರುದ್ಧ ಮಹಿಳೆ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಅರ್ಜಿ ವಿಚಾರಣೆ ವೇಳೆ ಎರಡು ಹಲ್ಲುಗಳು ಮುರಿದಿದ್ದವು ಎಂದು ಹೇಳಿದ್ದರು. ಈ ಸಂದರ್ಭದಲ್ಲಿ ನ್ಯಾಯಾಲಯ ಅವುಗಳನ್ನು ಸಾಕ್ಷಿಯಾಗಿ ಹಾಜರುಪಡಿಸುವಂತೆ ಅವರಿಗೆ ಸೂಚಿಸಲಾಗಿದ್ದರೂ ಅವರು ವಿಫ‌ಲರಾದರು. ಹೀಗಾಗಿ ಅರ್ಜಿ ವಜಾಗೊಳಿಸಿ ನ್ಯಾಯಾಲಯ ಆಪಾದಿತರನ್ನು ಬಿಡುಗಡೆ ಮಾಡಿತು. ಜತೆಗೆ ಪೊಲೀಸರೂ ಕೂಡ ತನಿಖೆಗೆ ವೇಳೆ ನೆರೆಹೊರೆಯವರಿಂದ ಘಟನೆ ಬಗ್ಗೆ ಸೂಕ್ತ ಮಾಹಿತಿ ಸಂಗ್ರಹಿಸಲಿಲ್ಲ ಎಂದು ಟೀಕಿಸಿತು.
