ದೀಪಿಕಾ, ಅಂಕಿತಾಗೆ ಟೋಕಿಯೊ ಅರ್ಹತೆ

ಬ್ಯಾಂಕಾಕ್‌: ಏಶ್ಯನ್‌ ಆರ್ಚರಿ ಚಾಂಪಿಯನ್‌ಶಿಪ್‌ನಲ್ಲಿ ಕ್ರಮವಾಗಿ ಚಿನ್ನ ಹಾಗೂ ಬೆಳ್ಳಿ ಪದಕ ಜಯಿಸಿದ ದೀಪಿಕಾ ಕುಮಾರಿ ಮತ್ತು ಅಂಕಿತಾ ಭಕತ್‌ ಮುಂದಿನ ವರ್ಷದ ಟೋಕಿಯೊ ಒಲಿಂಪಿಕ್ಸ್‌ ಅರ್ಹತೆ ಸಂಪಾದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಇವರಿಬ್ಬರೂ ವನಿತಾ ರಿಕರ್ವ್‌ ವಿಭಾಗದಲ್ಲಿ ಈ ಸಾಧನೆಗೈದರು.

ಬುಧವಾರ ಸೆಮಿಫೈನಲ್‌ ತಲಪುವುದರೊಂದಿಗೆ ಇವರಿಗೆ ಒಲಿಂಪಿಕ್‌ ಅರ್ಹತೆ ಲಭಿಸಿತ್ತು. ಇಲ್ಲಿಂದ ಮುಂದಡಿ ಇರಿಸಿದ ಇವರಿಬ್ಬರೂ ಫೈನಲ್‌ನಲ್ಲಿ ಮುಖಾಮುಖೀಯಾದರು. ಈ ಏಕಪಕ್ಷೀಯ ಸ್ಪರ್ಧೆಯಲ್ಲಿ ದೀಪಿಕಾ ಕುಮಾರಿ 6-0 ಅಂತರದಿಂದ ಅಂಕಿತಾ ಭಕತ್‌ಗೆ ಸೋಲುಣಿಸಿದರು.

ಸೆಮಿಫೈನಲ್‌ನಲ್ಲಿ ದೀಪಿಕಾ ವಿಯೆಟ್ನಾಮ್‌ನ ಎನ್‌ಗುಯೆಟ್‌ ಅವರನ್ನು ಹಾಗೂ ಅಂಕಿತಾ ಭೂತಾನ್‌ನ ಕರ್ಮಾ ಅವರನ್ನು ಪರಾಭವಗೊಳಿಸಿದರು. ಪರಾಜಿತರಿಬ್ಬರೂ ಟೋಕಿಯೊ ಒಲಿಂಪಿಕ್ಸ್‌ ಅರ್ಹತೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಭಾರತವಿನ್ನು ಆರ್ಚರಿ ತಂಡ ಸ್ಪರ್ಧೆಯಲ್ಲಿ ಒಲಿಂಪಿಕ್ಸ್‌ ಅರ್ಹತೆ ಗಳಿಸುವ ಯೋಜನೆಯಲ್ಲಿದೆ. 2020ರ ಬರ್ಲಿನ್‌ ಆರ್ಚರಿ ಚಾಂಪಿಯನ್‌ಶಿಪ್‌ ಇದಕ್ಕೆ ಕೊನೆಯ ಅವಕಾಶ ಒದಗಿಸಲಿದೆ.