ಪಠಾಣ್‌ ಸಿನಿಮಾ: ಕೇಸರಿ ಬಿಕಿನಿ ದೃಶ್ಯಗಳಿಗೆ‌ ಅನುಮೋದನೆ ನೀಡಿದ ಸಿಬಿಎಫ್ ಸಿ

ಮುಂಬೈ: ದೇಶಾದ್ಯಂತ ಭಾರೀ ಚರ್ಚೆಗೆ ಗ್ರಾಸವಾಗಿದ್ದ ಪಠಾಣ್‌ ಸಿನಿಮಾದ ಬೇಷರಂ ಹಾಡಿನಲ್ಲಿ ನಟಿ ದೀಪಿಕಾ ಪಡುಕೋಣೆ ಧರಿಸಿರುವ ಕೇಸರಿ ಬಿಕಿನಿ ದೃಶ್ಯಗಳಿಗೆ‌ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (ಸಿಬಿಎಫ್ ಸಿ ) ಅನುಮೋದನೆ ನೀಡಿದೆ.

ಬೇಷರಂ ರಂಗ್‌ ಹಾಡಿನಲ್ಲಿ ನಟಿ ಕೇಸರಿ ಬಿಕಿನಿ ಧರಿಸಿದ್ದನ್ನು ವಿರೋಧಿಸಿ ದೇಶಾದ್ಯಂತ ಪ್ರತಿಭಟನೆಗಳು ನಡೆದಿದ್ದಲ್ಲದೇ, ಹಾಡಿನಲ್ಲಿ ಕೇಸರಿ ಬಣ್ಣದ ಬಿಕಿನಿಯ ದೃಶ್ಯಗಳಿಗೆ ಕತ್ತರಿ ಹಾಕುವಂತೆ ಹಲವು ಸಂಘ-ಸಂಸ್ಥೆಗಳು ಒತ್ತಾಯಿಸಿದ್ದವು. ಆದರೆ,ಸಿಬಿಎಫ್ ಸಿ ಹಾಗೂ ಅದರ ಅಧ್ಯಕ್ಷರಾದ ಪ್ರಸೂನ್‌ ಜೋಶಿ ಕೇಸರಿ ಬಿಕಿನಿ ದೃಶ್ಯಗಳಿಗೆ ಅನುಮೋದನೆ ನೀಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಮತ್ತೊಂದೆಡೆ ಚಿತ್ರತಂಡ ಹಾಡನ್ನೇ ಸಿನಿಮಾದಿಂದ ತೆಗೆದುಹಾಕುವ ಬಗ್ಗೆಯೂ ಗಂಭೀರ ಚರ್ಚೆ ನಡೆಸುತ್ತಿದೆ ಎನ್ನಲಾಗಿದೆ.