ಮುಂಬಯಿ: ಬಾಲಿವುಡ್‌ ಕಿಂಗ್‌ ಖಾನ್ ಶಾರುಖ್‌ ಅವರ ಪ್ಯಾನ್‌ ಇಂಡಿಯಾ ಸಿನಿಮಾ ʼಪಠಾಣ್ʼ ಚಿತ್ರ ತಂಡ ಸೋಮವಾರ ( ಜು.25 ರಂದು) ಚಿತ್ರದ ಮತ್ತೊಂದು ಪ್ರಧಾನ ಪಾತ್ರದ ಪರಿಚಯವನ್ನು ರಿವೀಲ್‌ ಮಾಡಿದೆ.
ಶಾರುಖ್‌ ಖಾನ್ ದೊಡ್ಡ ಬ್ರೇಕ್‌ ಬಳಿಕ ಮತ್ತೆ ಬಣ್ಣದ ಲೋಕಕ್ಕೆ ಕಂಬ್ಯಾಕ್‌ ಮಾಡುತ್ತಿರುವ ಚಿತ್ರ ಪಠಾಣ್. ಈಗಾಗಲೇ ಚಿತ್ರದಲ್ಲಿನ ಶಾರುಖ್‌ ಪಾತ್ರದ ಫಸ್ಟ್‌ ಲುಕ್‌ ರಿಲೀಸ್‌ ಆಗಿ ಪ್ರೇಕ್ಷಕರನ್ನು ಸೆಳೆದಿದೆ.
ಚಿತ್ರದ ಮತ್ತೊಂದು ಪಾತ್ರವನ್ನು ಚಿತ್ರ ತಂಡ ರಿವೀಲ್‌ ಮಾಡಿ ಚಿತ್ರದ ಬಗೆಗಿನ ಕುತೂಹಲವನ್ನು ಹೆಚ್ಚಿಸಿದೆ. ದೀಪಿಕಾ ಪಡುಕೋಣೆ ಪಾತ್ರದ ಮೋಷನ್‌ ಪಿಕ್ಚರ್‌ ರಿಲೀಸ್‌ ಆಗಿದ್ದು ಸದ್ದು ಮಾಡುತ್ತಿದೆ.
ದೀಪಿಕಾ ಪಡುಕೋಣೆ ಗನ್‌ ಹಿಡಿದು ಶೂಟ್‌ ಮಾಡುವಾಗಿನ ಫೋಟೋವಿದ್ದು, ದೀಪಿಕಾ ಅವರ ಹಣೆಯ ಮೇಲೆ ರಕ್ತದ ಕಲೆಗಳಿವೆ. ಇದು ಚಿತ್ರದಲ್ಲಿ ನಾಯಕ – ನಾಯಕಿ ಇಬ್ಬರಿಗೂ ಸಾಹಸ ದೃಶ್ಯಗಳು ಇವೆ ಎನ್ನುವುದನ್ನು ತೋರಿಸುತ್ತದೆ.
ಈ ಹಿಂದೆ ʼಓಂ ಶಾಂತಿ ಓಂʼ, ʼಚೆನ್ನೈ ಎಕ್ಸ್‌ ಪ್ರೆಸ್‌ʼ ನಲ್ಲಿ ಜೋಡಿಯಾಗಿ ಕಾಣಿಸಿಕೊಂಡಿದ್ದ ದೀಪಿಕಾ – ಶಾರುಖ್‌ ಬಾಕ್ಸ್‌ ಆಫೀಸ್‌ ನಲ್ಲಿ ಕಮಾಲ್‌ ಮಾಡಿದ್ದರು. ಈಗ ಮತ್ತೆ ʼಪಠಾಣ್ʼ ಮೂಲಕ ತೆರೆ ಮೇಲೆ ಬರುತ್ತಿದ್ದು ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದೆ.
ಯಶ್‌ ರಾಜ್‌ ಫಿಲ್ಮ್ಸ್‌ ನಿರ್ಮಾಣ ಮಾಡಿರುವ ಪಠಾಣ್ ಗೆ ಸಿದ್ದಾರ್ಥ್‌ ಆನಂದ್‌ ಅವರು ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ಶಾರುಖ್‌ – ದೀಪಿಕಾ ರೊಂದಿಗೆ ಜಾನ್‌ ಅಬ್ರಹಾಂ ಕೂಡ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. 2023 ರ ಜನವರಿ 25 ರಂದು ಚಿತ್ರ ಹಿಂದಿ,ತಮಿಳು,ತೆಲುಗು ಭಾಷೆಯಲ್ಲಿ ತೆರೆಗೆ ಬರಲಿದೆ.
