ವಿಶ್ವ ಕುಸ್ತಿ: ಫೈನಲ್ ಪಂದ್ಯವಾಡಲಾಗದೆ ರಜತಕ್ಕೆ ತೃಪ್ತಿ ಪಟ್ಟ ದೀಪಕ್ ಪೂನಿಯಾ

ನೂರ್ ಸುಲ್ತಾನ್: ಜ್ಯೂನಿಯರ್ ವಿಶ್ವ ಚಾಂಪಿಯನ್ ಖ್ಯಾತಿಯ ದೀಪಕ್ ಪೂನಿಯಾ ಸೀನಿಯರ್ ಕುಸ್ತಿ ವಿಶ್ವ ಚಾಂಪಿಯನ್ ಶಿಪ್ ನ ಫೈನಲ್ ನಿಂದ ಹೊರಗುಳಿದು ನಿರಾಸೆ ಅನುಭವಿಸಿದ್ದಾರೆ. ಮಣಿಗಂಟು ಗಾಯಗೊಂಡಿರುವ ಕಾರಣ ದೀಪಕ್ ಚಿನ್ನ ಗೆಲ್ಲುವ  ಅಮೂಲ್ಯ ಅವಕಾಶವನ್ನು ಕಳೆದುಕೊಂಡರು.

ನೋವಿನಿಂದ ನನ್ನ ಎಡ ಕಾಲು ಭಾರ ತಾಳುತ್ತಿಲ್ಲ.ಈ ಪರಿಸ್ಥಿತಿಯಲ್ಲಿ ಆಡುವುದು ಕಷ್ಟ. ನನಗೆ ಗೊತ್ತು ಇದು ಈ ಫೈನಲ್ ನನ್ನ ಜೀವನದ ತುಂಬಾ ಮಹತ್ವದ್ದು. ಆದರೆ ಏನೂ ಮಾಡದ ಪರಿಸ್ಥಿತಿಯಲ್ಲಿದ್ದೇನೆ ಎಂದು ದೀಪಕ್ ಪೂನಿಯಾ ಸುದ್ದಿ ಸಂಸ್ಥೆಗೆ ಹೇಳಿದರು.

ಫೈನಲ್ ನಲ್ಲಿ ದೀಪಕ್ ಹಿಂದೆ ಸರಿದ ಕಾರಣ ಇರಾನಿನ ಹಸನ್ ಚಿನ್ನದ ಪದಕಕ್ಕೆ ಕೊರಳೊಡ್ಡಿದರು.

ಕಳೆದ ವರ್ಷ ಜೂನಿಯರ್ ಕುಸ್ತಿ ಚಾಂಪಿಯನ್ ಶಿಪ್ ಗೆದ್ದಿದ್ದ 20ರ ಹರೆಯದ ದೀಪಕ್ ಈ ವರ್ಷ 86 ಕೆಜಿ ಹಿರಿಯರ ವಿಭಾಗದಲ್ಲಿ ಫೈನಲ್ ಗೇರಿದ್ದರು. ಈ ಮೂಲಕ ಮುಂದಿನ ವರ್ಷ ನಡೆಯಲಿರುವ ಟೋಕಿಯೋ ಒಲಿಂಪಿಕ್ಸ್ ಗೆ ಅರ್ಹತೆ ಪಡೆದಿದ್ದಾರೆ.