ಇಶಾನ್‌ ಕಿಶನ್‌, ದೀಪಕ್‌ ಚಹರ್‌ಭಾರತ “ಎ’ತಂಡಕ್ಕೆ ಸೇರ್ಪಡೆ

ನವದೆಹಲಿ: ದಕ್ಷಿಣ ಆಫ್ರಿಕಾ ಪ್ರವಾಸಕ್ಕಾಗಿ ಟೀಮ್‌ ಇಂಡಿಯಾದ ಕ್ರಿಕೆಟಿಗರಾದ ಇಶಾನ್‌ ಕಿಶನ್‌ ಮತ್ತು ದೀಪಕ್‌ ಚಹರ್‌ ಅವರನ್ನು ಭಾರತ ಎ’ ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ.

ಸದ್ಯ ಇವರಿಬ್ಬರೂ ಕೋಲ್ಕತಾದಲ್ಲಿದ್ದು, ನ್ಯೂಜಿಲ್ಯಾಂಡ್‌ ಎದುರಿನ ಟಿ20 ಸರಣಿ ಮುಗಿದ ಬಳಿಕ ಬ್ಲೋಮ್‌ಫಾಂಟೇನ್‌ಗೆ ತೆರಳಲಿದ್ದಾರೆ.

ನ. 24ರಂದು ಮುಂಬೈಯಿಂದ ದಕ್ಷಿಣ ಆಫ್ರಿಕಾ ವಿಮಾನ ಏರಲಿರುವ ಇಶಾನ್‌ ಕಿಶನ್‌, ದೀಪಕ್‌ ಚಹರ್‌ ಜತೆಗೆ ಆಲ್‌ರೌಂಡರ್‌ ಶಾರ್ದೂಲ್ ಠಾಕೂರ್‌ ಕೂಡ ತೆರಳುವ ಸಾಧ್ಯತೆ ಇದೆ.

ಪ್ರಿಯಾಂಕ್‌ ಪಾಂಚಾಲ್‌ ನೇತೃತ್ವದ ಭಾರತ ಎ’ ತಂಡ ಈಗಾಗಲೇ ದಕ್ಷಿಣ ಆಫ್ರಿಕಾ ತಲುಪಿದೆ. ಅಲ್ಲಿ 3 ಚತುರ್ದಿನ ಟೆಸ್ಟ್‌ ಪಂದ್ಯಗಳನ್ನು ಆಡಲಿದೆ. ಎಲ್ಲ ಪಂದ್ಯಗಳೂ ಬ್ಲೋಮ್‌ಫಾಂಟೇನ್‌ನಲ್ಲಿ ನಡೆಯಲಿವೆ. ನ. 23ರಂದು ಮೊದಲ ಮುಖಾಮುಖಿ ಆರಂಭವಾಗಲಿದೆ.

ಇದನ್ನೂ ಓದಿ:ಚೊಚ್ಚಲ ಪಂದ್ಯದಲ್ಲೇ ಹೆಲ್ಮೆಟ್‌ಗೆ ಬಡಿದ ಚೆಂಡು, ಆಸ್ಪತ್ರೆಗೆ ದಾಖಲಾದ ವಿಂಡೀಸ್‌ ಆಟಗಾರ

ಹೆಚ್ಚುವರಿ ಆಟಗಾರರು
ಇದರೊಂದಿಗೆ “ಎ’ ತಂಡಕ್ಕೆ ಹೆಚ್ಚುವರಿಯಾಗಿ ಸೇರ್ಪಡೆಗೊಂಡ ಆಟಗಾರರ ಸಂಖ್ಯೆ ಮೂರಕ್ಕೆ ಏರಿದೆ. ಇದಕ್ಕೂ ಮುನ್ನ ನ್ಯೂಜಿಲೆಂಡ್‌ ಎದುರಿನ ಟೆಸ್ಟ್‌ ಸರಣಿಗೆ ಆಯ್ಕೆಯಾಗದ ಹನುಮ ವಿಹಾರಿ ಅವರನ್ನು “ಎ’ ಟೀಮ್‌ಗೆ ಸೇರಿಸಿಕೊಳ್ಳಲಾಗಿತ್ತು.

ಇಶಾನ್‌ ಕಿಶನ್‌ ಈ ತಂಡದ ಎರಡನೇ ಕೀಪರ್‌ ಆಗಲಿದ್ದಾರೆ. ಮೊದಲ ಆಯ್ಕೆಯ ಕೀಪರ್‌ ಆಗಿರುವವರು ಉಪೇಂದ್ರ ಯಾದವ್‌.

ದೀಪಕ್‌ ಚಹರ್‌ ಸೇರ್ಪಡೆಯೊಂದಿಗೆ ತಂಡದ ವೇಗಿಗಳ ಸಂಖ್ಯೆ 5ಕ್ಕೆ ಏರಿದೆ. ಈಗಾಗಲೇ ನವದೀಪ್‌ ಸೈನಿ, ಉಮ್ರಾನ್‌ ಮಲಿಕ್‌, ಇಶಾನ್‌ ಪೊರೆಲ್‌ ಮತ್ತು ಅರ್ಜಾನ್‌ ನಗವಸ್ವಾಲಾ ತಂಡದಲ್ಲಿದ್ದಾರೆ.