ಸಾಲಬಾಧೆ: ಒಂದೇ ಕುಟುಂಬದ 6 ಮಂದಿ ಆತ್ಮಹತ್ಯೆ

ಕೊಪ್ಪಳ: ಮನೆಯ ಹೆಣ್ಣು ಮಕ್ಕಳ ಸಂಸಾರ ಸರಿಯಾಗದೆ ಇರುವುದು, ಕೌಟುಂಬಿಕ ಕಲಹ ಹಾಗೂ ಸಾಲಬಾಧೆ ತಾಳದೆ ಒಂದೇ ಕುಟುಂಬದ ಆರು ಮಂದಿ ಆತ್ಮಹತ್ಯೆ ಮಾಡಿಕೊಂಡ ದುರ್ಘ‌ಟನೆ ತಾಲೂಕಿನ ಮೆತಗಲ್‌ ಗ್ರಾಮದಲ್ಲಿ ನಡೆದಿದೆ.

ಆತ್ಮಹತ್ಯೆ ಮಾಡಿಕೊಂಡವರನ್ನು ರೈತ ಶೇಖರಯ್ಯ ಬೀಡನಾಳ (48), ಶೇಖರಯ್ಯನ ಪತ್ನಿ ಜಯಮ್ಮ ಬೀಡನಾಳ (41), ಪುತ್ರಿಯರಾದ ಬಸಮ್ಮ ಬೀಡನಾಳ(23), ಗೌರಮ್ಮ ಬೀಡನಾಳ(22), ಸಾವಿತ್ರಮ್ಮ (20) ಹಾಗೂ ಪಾರ್ವತಿ(15) ಎಂದು
ಗುರುತಿಸಲಾಗಿದೆ.

ಶನಿವಾರ ಬೆಳಗ್ಗೆ ಮನೆಯ ಬಾಗಿಲು ತೆರೆಯದ ಹಿನ್ನೆಲೆಯಲ್ಲಿ ಓಣಿಯ ನಿವಾಸಿಗಳು ಮನೆಯಹೊರಗಡೆಯಿಂದ ಕೂಗಿದ್ದಾರೆ. ಯಾವುದೇ ಶಬ್ದ ಬಾರದ ಹಿನ್ನೆಲೆಯಲ್ಲಿ ಅನುಮಾನಗೊಂಡು ಬಾಗಿಲು ಒಡೆದು ಒಳ ಪ್ರವೇಶಿಸಿದ್ದಾರೆ. ಆಗ ಮನೆಯ ಆರೂ ಜನ ಮೃತಪಟ್ಟಿರುವ ವಿಷಯ ತಿಳಿದಿದ್ದು, ಕೂಡಲೇ ಪೊಲೀಸರಿಗೆ ತಿಳಿಸಿದ್ದಾರೆ.

ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ ಪೊಲೀಸರು, ಐವರು ಮಹಿಳೆಯರಿಗೂ ವಿಷ ಮಿಶ್ರಿತ ಜ್ಯೂಸ್‌ ಕುಡಿಸಿ ಬಳಿಕ ಶೇಖರಯ್ಯ ಬೀಡನಾಳ, ನೇಣಿಗೆ ಶರಣಾಗಿರುವ ಕುರಿತು ಶಂಕೆ ವ್ಯಕ್ತಪಡಿಸಿದ್ದಾರೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೊಪ್ಪಳ ಗ್ರಾಮೀಣ ಠಾಣೆಯಲ್ಲಿ ಮೂವರು ಸಂಬಂಧಿಕರ ವಿರುದಟಛಿ ಪ್ರಕರಣ ದಾಖಲಾಗಿದೆ.

ಘಟನಾ ಸ್ಥಳಕ್ಕೆ ಕೃಷಿ ಸಚಿವ ಶಿವಶಂಕರಡ್ಡಿ, ಡಿಸಿಪಿ. ಸುನೀಲಕುಮಾರ, ಎಸ್ಪಿ ರೇಣುಕಾ ಸುಕುಮಾರ ಭೇಟಿ ನೀಡಿ ಮಾಹಿತಿ ಪಡೆದರು.ಸಾಮೂಹಿಕ ಅಂತ್ಯಸಂಸ್ಕಾರ: ಸಂಜೆ ಗ್ರಾಮದಲ್ಲಿ ಮೃತದೇಹಗಳ ಸಾಮೂಹಿಕ ಅಂತ್ಯ ಸಂಸ್ಕಾರ ನಡೆಸಲಾಯಿತು. ಬೆಳಗ್ಗೆ ಮೃತದೇಹಗಳ ಮರಣೋತ್ತರ ಪರೀಕ್ಷೆಗಾಗಿ ಜಿಲ್ಲಾಸ್ಪತ್ರೆಯ ಶವಾಗಾರಕ್ಕೆ ತರಲಾಗಿತ್ತು. ಮರಣೋತ್ತರ ಪರೀಕ್ಷೆ ನಂತರ ಸಾಮೂಹಿಕ ಅಂತ್ಯಸಂಸ್ಕಾರ ನಡೆಸಲಾಯಿತು.

ಮೃತ್ಯುಪತ್ರ: ಸಾವಿಗೆ ಹಲವು ಕಾರಣಗಳನ್ನು ತಿಳಿಸಿ ರೈತ ಶೇಖರಯ್ಯ ಬರೆದಿಟ್ಟಿರುವ ಮೃತ್ಯುಪತ್ರವೊಂದು ಪತ್ತೆಯಾಗಿದೆ. ನನಗೆ ನಾಲ್ವರು ಹೆಣ್ಣು ಮಕ್ಕಳಿದ್ದು, ಹಿರಿಯ ಮಗಳು ಬಸಮ್ಮಳನ್ನು ಯಲಬುರ್ಗಾತಾಲೂಕಿನ ದಮ್ಮೂರಿಗೆ ಕಳೆದ ಎರಡು ವರ್ಷದ ಹಿಂದಷ್ಟೆ ಸಾಲ ಮಾಡಿ ಮದುವೆ ಮಾಡಿಕೊಡಲಾಗಿತ್ತು. ಆದರೆ, ಆಕೆಯ ಗಂಡನ ಕಡೆಯವರು ಮಗಳನ್ನು ಕರೆದುಕೊಂಡು ಹೋಗಿರಲಿಲ್ಲ. ಸಂಸಾರ ಸರಿಯಾಗಿರಲಿಲ್ಲ. ಎರಡನೇ ಮಗಳು ಗೌರಮ್ಮಳನ್ನು ಕೆಲವೇ ತಿಂಗಳ ಹಿಂದಷ್ಟೇ ಮದುವೆ ಮಾಡಿಕೊಡಲಾಗಿತ್ತು. ಆಸ್ತಿಗಳ ವಿಂಗಡಣೆ ಆಗಿರಲಿಲ್ಲ. ಅಲ್ಲದೇ ಕಷ್ಟಪಟ್ಟು ಮಕ್ಕಳಿಗೆ ಸಾಲ ಮಾಡಿ ಮದುವೆ ಮಾಡಿದ್ದೆ. ಆದರೆ, ಅವರ ಸಂಸಾರ ಸರಿಯಾಗಿರಲಿಲ್ಲ. ಬೆಳೆ ಸಾಲವನ್ನೂ ಮಾಡಿದ್ದೆ.ಇದೆಲ್ಲದಕ್ಕೆ ಮನನೊಂದು ಆತ್ಮಹತ್ಯೆಗೆ ಶರಣಾಗುತ್ತಿರುವುದಾಗಿ ಶೇಖರಯ್ಯ ಡೆತ್‌ನೋಟ್‌
ಬರೆದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಒಂದೇ ಕುಟುಂಬದಲ್ಲಿ ಆರು ಜನರು ಸಾವಿಗೆ ಶರಣಾಗಿರುವುದು ನಿಜಕ್ಕೂ ದಾರುಣ ಘಟನೆ. ಇಂತಹದುರ್ಘ‌ಟನೆ ನಡೆದಿದ್ದು, ನಿಜಕ್ಕೂ ವಿಷಾದನೀಯ. ತನಿಖೆಯಿಂದ ಎಲ್ಲವೂ ಬೆಳಕಿಗೆ ಬರಲಿದೆ.
– ಶಿವಶಂಕರ ರೆಡ್ಡಿ, ಕೃಷಿ ಸಚಿವ.

ಡೆತ್‌ನೋಟ್‌ ಪತ್ತೆಯಾಗಿದೆ.ಅದರಲ್ಲಿ ಕೌಟುಂಬಿಕ ಕಲಹ, ಆಸ್ತಿ ಭಾಗ ಆಗದಿರುವುದು ಸೇರಿ ಸಾಲ ಮಾಡಿ ಕೊಂಡ ಕುರಿತು ಬರೆದಿದ್ದಾರೆ. ನಾಲ್ವರಿಗೆ ಜ್ಯೂಸ್‌ ಬಾಟಲ್‌ನಲ್ಲಿ ವಿಷ ಮಿಶ್ರಣ ಮಾಡಿ ಕುಡಿಸಿ ನಂತರ ಶೇಖರಯ್ಯ ನೇಣಿಗೆ ಶರಣಾಗಿದ್ದಾರೆ. ಈ ಕುರಿತು ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
– ರೇಣುಕಾ ಸುಕುಮಾರ,
ಪೊಲೀಸ್‌ ವರಿಷ್ಠಾಧಿಕಾರಿ.