ಮದಗಜಗಳ ಕಾದಾಟದಲ್ಲಿ ಸಲಗ ಸಾವು

ಹುಣಸೂರು: ಮದಗಜಗಳ ಕಾದಾಟದಲ್ಲಿ ಸಲಗವೊಂದು ಮೃತಪಟ್ಟಿರುವ ಘಟನೆ ನಾಗರಹೊಳೆ ರಾಷ್ಟ್ರೀಯ ಉದ್ಯಾನವನದಲ್ಲಿ ಸೋಮವಾರ ಮುಂಜಾನೆ ನಡೆದಿದೆ. 

ನಾಗರಹೊಳೆ ರಾಷ್ಟ್ರೀಯ ಉದ್ಯಾನವನದ ಆನೆ ಚೌಕೂರು(ಮತ್ತಿಗೋಡು) ವಲಯದಲ್ಲಿ ಮದಗಜಗಳ ಕಾದಾಟದಲ್ಲಿ ಸುಮಾರು 40 ವರ್ಷದ ಸಲಗವೊಂದು ಮೃತಪಟ್ಟಿದೆ. ವಲಯದ ಮತ್ತಿಗೋಡು ಬೀಟ್‌ನ ಹೊಸಗದ್ದೆ ಬಳಿ ಘಟನೆ ನಡೆದಿದ್ದು, ಕಾದಾಟದ ವೇಳೆ ಮೃತ ಆನೆಯ ಹೊಟ್ಟೆಗೆ ಮತ್ತೂಂದು ಸಲಗ ದಂತದಿಂದ ತಿವಿದಿದ್ದು, ಹೊಟ್ಟೆ ಭಾಗಕ್ಕೆ ತೀವ್ರ ಪೆಟ್ಟು ಬಿದ್ದು, ತೀವ್ರ ರಕ್ತಸ್ರಾವವಾಗಿ ಸ್ಪಲ್ಪ ದೂರ ನಡೆದು ನಿತ್ರಾಣಗೊಂಡು ಮೃತಪಟ್ಟಿದೆ ಎಂದು ಎಸಿಎಫ್ ಪ್ರಸನ್ನಕುಮಾರ್‌ ತಿಳಿಸಿದ್ದಾರೆ. 

ಬೀಟ್‌ನಲ್ಲಿದ್ದ ಸಿಬ್ಬಂದಿ ಗಾಯಗೊಂಡಿದ್ದ ಆನೆಯನ್ನು ಕಂಡು ಹಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡಿದ ಮೇರೆಗೆ ಸ್ಥಳಕ್ಕೆ ಅಧಿಕಾರಿಗಳು ಹಾಗೂ ವೈದ್ಯರು ತೆರಳುವ ವೇಳೆಗೆ ಆನೆ ಮೃತಪಟ್ಟಿತ್ತು. ಸ್ಥಳಕ್ಕೆ ಎಸಿಎಫ್ ಪ್ರಸನ್ನಕುಮಾರ್‌, ಆರ್‌ಎಫ್ಒ ಕಿರಣ್‌ಕುಮಾರ್‌ ಹಾಗೂ ವನ್ಯಜೀವಿ ಮಂಡಳಿಯ ಸದಸ್ಯ ಸುಬ್ಬೂರು ಭೇಟಿ ನೀಡಿ ಪರಿಶೀಲಿಸಿದರು. ನಾಗರಹೊಳೆ ಪಶು ವೈದ್ಯ ಡಾ.ಮುಜೀಬ್‌ ರೆಹಮಾನ್‌ ಮರಣೋತ್ತರ ಪರೀಕ್ಷೆ ನಡೆಸಿದರು.