ವನಿತಾ ಕೆರಿಬಿಯನ್‌ ಲೀಗ್‌: ಟ್ರಿನ್‌ಬಾಗೊ ನೈಟ್‌ರೈಡರ್ ಚಾಂಪಿಯನ್‌

ಬಸೆಟರ್‌ (ಸೇಂಟ್‌ ಕಿಟ್ಸ್‌): ಸಣ್ಣ ಮೊತ್ತದ ವನಿತಾ ಕೆರಿಬಿಯನ್‌ ಲೀಗ್‌ ಫೈನಲ್‌ನಲ್ಲಿ ಟ್ರಿನ್‌ಬಾಗೊ ನೈಟ್‌ರೈಡರ್ ಚಾಂಪಿಯನ್‌ ಆಗಿ ಮೂಡಿಬಂದಿದೆ. ಫೈನಲ್‌ನಲ್ಲಿ ಅದು ಬಾರ್ಬಡಾಸ್‌ ರಾಯಲ್ಸ್‌ ವಿರುದ್ಧ 10 ರನ್ನುಗಳ ರೋಚಕ ಜಯ ಸಾಧಿಸಿತು.

ಮೊದಲು ಬ್ಯಾಟಿಂಗ್‌ ನಡೆಸಿದ ಟ್ರಿನ್‌ಬಾಗೊ ಗಳಿಸಿದ್ದು 7 ವಿಕೆಟಿಗೆ 100 ರನ್‌ ಮಾತ್ರ. ಈ ಸಣ್ಣ ಮೊತ್ತವನ್ನೂ ಅದು ಉಳಿಸಿಕೊಂಡದ್ದು ಕೂಟದ ಅಚ್ಚರಿ ಎನಿಸಿತು. ಜವಾಬಿತ್ತ ಬಾರ್ಬಡಾಸ್‌ 18.4 ಓವರ್‌ಗಳಲ್ಲಿ 90 ರನ್ನಿಗೆ ಕುಸಿಯಿತು.

ಎರಡೂ ತಂಡಗಳ ಬ್ಯಾಟಿಂಗ್‌ ಸರದಿಯಲ್ಲಿ ಮಿಂಚಿದ್ದು ನಾಯಕಿಯರು ಮಾತ್ರ. ಟ್ರಿನ್‌ಬಾಗೊ ನೈಟ್‌ರೈಡರ್ ನಾಯಕಿ ಡಿಯಾಂಡ್ರ ಡಾಟಿನ್‌ ಸರ್ವಾಧಿಕ 59 ರನ್‌ ಬಾರಿಸಿದರು. ಬಾರ್ಬಡಾಸ್‌ ನಾಯಕಿ ಹ್ಯಾಲಿ ಮ್ಯಾಥ್ಯೂಸ್‌ 46 ರನ್‌ ಹೊಡೆದರು. ಈ ಪಂದ್ಯದಲ್ಲಿ ಇವರಿಬ್ಬರನ್ನು ಹೊರತುಪಡಿಸಿ ಎರಡಂಕೆಯ ಗಡಿ ದಾಟಿದ ಏಕೈಕ ಆಟಗಾರ್ತಿ ಟ್ರಿನ್‌ಬಾಗೊ ತಂಡದ ಸುನೆ ಲುಸ್‌ (12).

ಇದು ಸಂಪೂರ್ಣವಾಗಿ ಬೌಲರ್‌ಗಳ ಪಂದ್ಯವಾಗಿತ್ತು. ಹ್ಯಾಲಿ ಮ್ಯಾಥ್ಯೂಸ್‌ 22 ರನ್ನಿಗೆ 3 ವಿಕೆಟ್‌ ಉರುಳಿಸಿ ಮಿಂಚಿದರು. ಟ್ರಿನ್‌ಬಾಗೊ ಬೌಲಿಂಗ್‌ ಸರದಿಯಲ್ಲಿ ಅನೀಸಾ ಮೊಹಮ್ಮದ್‌ 16ಕ್ಕೆ 3, ಸುನೆ ಲುಸ್‌ 17ಕ್ಕೆ 2, ಹ್ಯಾಲಿ ಜೆನ್ಸೆನ್‌ 18ಕ್ಕೆ 2, ಶೆನೆಟಾ ಗ್ರಿಮ್ಮಂಡ್‌ 22ಕ್ಕೆ 2 ವಿಕೆಟ್‌ ಕಿತ್ತರು.

ಸ್ಯಾಂಡಲ್‌ವುಡ್‌ ಸುದ್ದಿ