ರಫೇಲ್‌ ತನಿಖೆ ಆರಂಭವಾದ್ರೆ ಮೋದಿ ಪ್ರಧಾನಿ ಕಚೇರಿ ಬಿಡ್ತಾರೆ;ರಾಹುಲ್‌ 

ಹೊಸದಿಲ್ಲಿ: ‘ರಫೇಲ್‌ ಯುದ್ಧ ವಿಮಾನ ಡೀಲ್‌ ಕುರಿತಾಗಿ ತನಿಖೆ ಆರಂಭಿಸಿದರೆ ಪ್ರಧಾನಿ ಕಚೇರಿಯನ್ನು  ನರೇಂದ್ರ ಮೋದಿ ಅವರು ತೊರೆಯಬೇಕಾಗುತ್ತದೆ’ ಎಂದು ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ ಮತ್ತೆ ವಾಗ್ಧಾಳಿ ನಡೆಸಿದ್ದಾರೆ.

ಶುಕ್ರವಾರ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು ‘ಈ ಹಗರಣದಲ್ಲಿ ಮೋದಿ ಅವರದ್ದು ಪ್ರಮುಖ ಪಾತ್ರ, ಅವರೇ ನಿರ್ಣಯವನ್ನು ಕೈಗೊಂಡ ವ್ಯಕ್ತಿ. ಮೋದಿ ಅವರೇ ಅನಿಲ್‌ ಅಂಬಾನಿಗೆ 30 ಸಾವಿರ ಕೋಟಿ ರೂಪಾಯಿಗೆ ಡೀಲ್‌ ನೀಡಿದ್ದು’ ಎಂದರು.

‘ಡಸೌಲ್ಟ್ ಏವಿಯೇಶನ್‌ ಸಿಇಓ ಹೇಳಿರುವಂತೆ ಭೂಮಿ ಇದೆ ಎಂದು ರಿಲಾಯನ್ಸ್‌ಗೆ ಡೀಲ್‌ ನೀಡಲಾಗಿಲ್ಲ. ಒಪ್ಪಂದವಾಗುವ ವರೆಗೆ ಭೂಮಿಯ ಪ್ರಶ್ನೆಯೇ ಇರಲಿಲ್ಲ’ ಎಂದು ರಾಹುಲ್‌ ಹೇಳಿದರು. 

ರಾಹುಲ್‌ ಗಾಂಧಿ ಅವರು ಮುಂಬರುವ ಲೋಕಸಭಾ ಚುನಾವಣೆಗೆ ರಫೇಲ್‌ ಡೀಲ್‌ ವಿಚಾರವನ್ನು ದೊಡ್ಡ ಅಸ್ತ್ರವನ್ನಾಗಿ ಉಪಯೋಗಿಸುವುದು ಖಚಿತವಾಗಿದೆ.