ಪ್ರಧಾನಿ ಮೋದಿ ಕರೆ; ಜೂ.1ರಿಂದ ಸಿಎಪಿಎಫ್ ಕ್ಯಾಂಟೀನ್ ನಲ್ಲಿ ದೇಶೀಯ ಉತ್ಪನ್ನ ಮಾರಾಟ

ನವದೆಹಲಿ: ಕೋವಿಡ್ 19 ವೈರಸ್ ನಿಂದ ಸಂಭವಿಸಿದ ನಷ್ಟವನ್ನು ಸರಿದೂಗಿಸಲು ಪ್ರಧಾನಿ ನರೇಂದ್ರ ಮೋದಿ ಆರ್ಥಿಕ ನೆರವಿನ ಪ್ಯಾಕೇಜ್ ಘೋಷಿಸಿದ ಸಂದರ್ಭದಲ್ಲಿ, ನಮ್ಮ ಲೋಕಲ್(ಸ್ಥಳೀಯ) ಉತ್ಪಾದನೆ ಹೆಚ್ಚಿಸುವ ಮೂಲಕ ಇದನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯಬೇಕು ಎಂದು ತಿಳಿಸಿದ್ದರು. ಈ ಹಿನ್ನೆಲೆಯಲ್ಲಿ ಈ ಬಗ್ಗೆ ಟ್ವೀಟ್ ಮಾಡಿರುವ ಕೇಂದ್ರ ಗೃಸಚಿವ ಅಮಿತ್ ಶಾ, ಜೂನ್ 1ರಿಂದ ಸಿಎ ಪಿಎಫ್ ಕ್ಯಾಂಟೀನ್ ಗಳಲ್ಲಿ ದೇಶೀಯ ಉತ್ಪನ್ನಗಳನ್ನು ಮಾತ್ರ ಮಾರಾಟ ಮಾಡಬೇಕು ಎಂದು ತಿಳಿಸಿದ್ದಾರೆ.

ಹತ್ತು ಲಕ್ಷ ಮಂದಿ ಸಿಆರ್ ಪಿಎಫ್ ಯೋಧರ 50 ಲಕ್ಷ ಕುಟುಂಬ ಸದಸ್ಯರು ಕೂಡಾ ದೇಶೀಯ ಉತ್ಪನ್ನ ಬಳಸುವಂತಾಗಲಿದೆ ಎಂದು ಈ ಸಂದರ್ಭದಲ್ಲಿ ಹೇಳಿದರು.

ಭಾರತ ಇನ್ಮುಂದೆ ಸ್ವಾವಲಂಬಿಯಾಗಬೇಕು ಇದರಿಂದಾಗಿ ಭವಿಷ್ಯದಲ್ಲಿ ಭಾರತ ವಿಶ್ವದ ಅಗ್ರಗಣ್ಯ ನಾಯಕನಾಗಲು ಸಾಧ್ಯ ಎಂಬ ಪ್ರಧಾನಿ ನರೇಂದ್ರ ಮೋದಿ ಅವರ ಕರೆಯ ಹಿನ್ನೆಲೆಯಲ್ಲಿ ಅಮಿತ್ ಶಾ ಈ ಸೂಚನೆ ನೀಡಿರುವುದಾಗಿ ವರದಿ ತಿಳಿಸಿದೆ.

ಭಾರತೀಯರು ಕೂಡಾ ಹೆಚ್ಚು, ಹೆಚ್ಚು ದೇಶೀಯ ವಸ್ತುಗಳನ್ನೇ ಖರೀದಿಸಬೇಕು ಹಾಗೂ ಇತರರು ಕೂಡಾ ದೇಶೀಯ ವಸ್ತುಗಳನ್ನೆ ಖರೀದಿಸುವಂತೆ ಪ್ರೇರೇಪಣೆ ನೀಡಬೇಕು ಎಂದು ಶಾ ತಿಳಿಸಿದ್ದಾರೆ.